Read Batak Dairi Hesekiel 44 Bible Online

Hesekiel 44 - Batak Dairi bible

Hesekiel 44

¹Enggo kessa i, iteggu anak laki i mo aku mi pengkeruhen kettan kabincaren jahjahen Bages JAHOWA. Tutup ngo pengkeruheni i,

²idokken JAHOWA mo mbang aku, “Kennah dak igerruk ngo pengkeruhen en, oda ndorok ipedalngah. Sada kalak poda ndorok memengkettisa, kumarna aku, JAHOWA Dèbata Israel, enggo mbengket mi BagesKu arap pengkeruhen èn. Jadi, kennah dak tergerruk ngo pengkeruhen èn.

³Tapi ukum perkuasa simemerèntah ndorok ngo laus mi pengkeruhen i lako kipangan pangaen simbadia i hadeppenKu. Kennah arap bilik mbellen ngo ia masuk janah lako balik pè arap i ma mo.”

⁴Nai iarahken anak laki i nola mo aku mi pengkeruhen utara sipedempak-dempak dekket Bages JAHOWA. Kudatèken mo, janah kuidah mo Bages JAHOWA i isangkemmi cuhaya merkillok-killok menandaken pekiroh JAHOWA. Nai sujud mo aku mersembah,

⁵janah idokken JAHOWA mbang aku, “Alè jelma simangko-angko, peratè-atèken mo mendè kadè siniidah dekket sinidengkohmu. Ai naing kubagahken mo karina hatoren dekket pati-patien tersèngèt BagesKu èn. Suratken mo selloh isè sindorok masuk mi BagesKu janah isè siso ndorok.

⁶Bagahken mo taba bangsa Israel sidak uè memberontak i, ukum Aku, JAHOWA Sintèmbul i, oda nè uè memelli kalak i mengulaken simelamun.

⁷Enggo ilèai kalak i BagesKu, kerna ninganna ipèlèken kalak i pèlèen pessoh-pessoh dekket daroh bangKu, ipadiat kalak i ngo mbengket mi bagasen kalak sidèban siso mertakkil, dekket siso menguèi Aku. Merkitè pengelako kalak i simeronah i, enggo iosè kalak i padanKu dekket kalak i.

⁸Ai oda ngo kalak i mengkebasken upacara simbadia ibagasen BagesKu, tapi gabè kalak sidèban ngo idokken kalak i mengkebasi.

⁹Aku, JAHOWA Sintèmbul i meningtingken, kalak sidèban siso itakkil dekket kalak siso menguèi Aku, oda ndorok mbengket mi BagesKu. Merlakku ma ngo i bang taba kalak sidèban simenettap i tengah-tengah bangsa Israel.”

¹⁰Idokken JAHOWA mo mbang aku, “Kuhukum mo kalak Lewi rasken dekket kalak Israel sienggo menadingken Aku dekket gabè menembah sembahen.

¹¹Pellin perkebbas dekket menjaga pengkeruhen mo kessa ndorok ikebbasi kalak idi i BagesKu. Ndorok mo kalak i menembellih pinakan-pinakan mahan pèlèen situtungen dekket sinipèlèken, janah kennah ngo kalak i mengkebasi bangsa i.

¹²Tapi kumarna enggo iuluken kalak idi Israel lako memaing kerja menembah gana-gana, janah merkitè bagidi enggo iruah kalak i bangsa i mi bagasen dosa, jadi Aku, JAHOWA Sintèmbul i menumpahken, kennah ihukum ngo kalak i.

¹³Oda nèngè ndorok kalak i merkebbas Aku sibagè imam, barang mendegges tah kadè sambing pè sienggo iuras lako bangKu, barang memengketti Bekkas Simbadia kalohon. Idi mo hukumen bai kalak i kumernaken ulah-ulahna simelamun sienggo iulaken kalak i.

¹⁴Bagèndari pè Kudokken mo lako mengulaken ulaen mberrat siperlu ulaenken kalak idi i BagesKu.”

¹⁵Idokken JAHOWA Sintèmbul i, “Sinderrang itadingken bangsa Israel Aku, dak tong ngo imam-imam Lewi pemparen si Zadok setia mengkebasi Aku i BagesKu. Kumarna i kennah kalak i ngo mengkebasi Aku dekket roh mi hadeppenKu lako memèlèken pessoh-pessoh dekket daroh sipèlèenken i nai.

¹⁶Pellin kalak i ngo kessa ndorok masuk mi BagesKu mengkebasi Aku i langgaten, dekket menguluken pulungen i BagesKu.

¹⁷Mula ibengketti kalak i pengkeruhen lako menuju kasèan bagasen, kennah memakè pakèen linen ngo kalak i. Oda ndorok ipakkè kalak i wol, sinderrang merkebbas i kasèan bagasen barang i BagesKu.

¹⁸Asa ulang mukupen dekket panasen, kennah ipakkè kalak i ngo selabal linen oda pella merpementing, janah gonjè-gonjèna pè linen ma mo.

¹⁹Mula laus kalak i mi kasèan ruar bekkas bangsa i tumpu, kennah italkasi imam-imam i ngo jubahna i bilik simbadia BagesKu, nai ipakkè mo oles sidèban, asa ulang cilaka bangsa i ibaing pakèen simerkedekoen.

²⁰Imam-imam oda ndorok mencukkur bukna, barang memelli bukna i nggeddang. Kennah joppok ngo bukna i igonting rembang mi hatoren sienggo itentuken.

²¹Oda ndorok iènum kalak i anggur, mula naing masuk mi kasèan bagasen.

²²Pellin simerbaju Israel ngo kessa ndorok ikabini imam-imam, idi pè kennah gadi dèng barang pè sada kalak simengkebaluken imam. Oda ndorok kalak i mengkabini daberru sienggo isirangken.

²³Kennah ipedahken imam-imam ngo taba bangsangKu, asa ibettoh membijaken paina sienggo ikelini bangKu janah paina oda, siapaina mpanting rembang mi agama janah siapaina melamun.

²⁴Mula lot turah persilisihen tersèngèt hatoren, kennah idungi kalak i ngo i rembang mi pati-patinKu. Kennah irayaken kalak i ngo pèsta-pèsta agama, rembang mi hatoren dekket pati-patinKu ninganna pebadiaken ari Sabat, ari sienggo itentuken bangKu.

²⁵Sada kalak Imam oda ndorok mengelamuni dirina merkitè dais mi bangkè laènken bangkè partuana, dukakna, kaka anggina barang turangna simadèng sijahè.

²⁶Enggo kessa ia menguras balik, kennah ipèma pitu ari nai,

²⁷nai laus mo ia mi kasèan i BagesKu, lako memèlèken pèlèen menguras dirina, asa ndorok nola ia mengolihi merkebbas i BagesKu. Aku, JAHOWA Sintèmbul i ngo simendokken i.

²⁸Ijalo imam-imam ulaen imam i sibagè sulangna ibas kadè siKuberèken taba kalak Israel turun-tumurun. Oda ndorok lot milik kalak i barang kadè pè i Israel: Aku ngo harta kalak i.

²⁹Pèlèen pagè kalak i mo kenggelluhenna, dekket pèlèen kesasaen dosa dekket pèlèen penggancih kerogien; bagima karinana sienggo ipepellin bangKu, kennah iberèken bai kalak i.

³⁰Kennah iberèken ngo bai imam-imam bagian simendèna kalohon ipas karina hasil niperanina perlebbè gennep tahun, dekket ipas barang kadè sambing ipèlèken bangKu i nai. Gennep mahan roti kalak Israel, roti perlebbè bai imam-imam ngo i. Nai Kupasu-pasu mo bages bangsa Israel.

³¹Manuk-manuk dekket binatang-binatang sidèban matè bagi sambing, barang ijerngem binatang penjerngem, oda ndorok ipangan imam.”