Read Batak Dairi Hesekiel 45 Bible Online

Hesekiel 45 - Batak Dairi bible

Hesekiel 45

¹Sinderrang madèng ipella-pellaken tanoh i gabè tanoh pusakka gennep marga, kennah ipejaè sada bagian bai JAHOWA. Nggeddang tanoh i kennah 12,5 kilomèter, dekket bekkangna sipuluh kilomèter. Karina jahjahen i mo idokken simbadia.

²Mahan bekkas Bages JAHOWA ipèmaken mo dèba i tanoh i nai sagi empat 250 mèter gennep bidingna janah ikulilingi kasèan 25 mèter bekkangna, janah kennah i sidi mo ipajek Bages JAHOWA.

³Sitengah i tanoh i nai, nggeddangna 12,5 kilomèter, dekket bekkangna 5 kilomèter ipèmaken lako memajek Bages JAHOWA, idi mo jah- jahen simbadia kalohon.

⁴Simbadia ngo tanoh i, ipèmaken bai imam-imam, simerkebbas mengkebasi pulungen i Bages JAHOWA. Dèba i tanoh i nai gabè bekkas bages kalak i, janah dèba nai mahan bekkas Bages JAHOWA.

⁵Sitengah nai tanoh i imo 12,5 kilomèter nggeddangna dekket 5 kilomèter bekkangna kennah bai kalak Lewi mo i ipèmaken simerkebbas i Bages JAHOWA. I sidi mo ipajek perkutaen bekkas kalak i ndorok merian.

⁶I biding tanoh simbadia i kennah ipejaè dèng ma ngo sinterpuk nai tanoh, nggeddangna sipuluh dua sitengah kilomèter janah bekkangna tengah tellu kilomèter, mahan perkutaen sindorok i iani barang isè sambing i bangsa Israel nai.

⁷Lako bai raja simemerèntah kennah ipèmaken kin ma ngo tanoh. Arur mo tanoh i mulai ibaleng kesunduten jahjahen sienggo ipejaè bai JAHOWA i nai soh mi Laut Tengah, dekket ibaleng jahjahen sinipejaè i kin kan kebincaren i nai soh mi perbalengen kebincaren tanoh i. Jadi nggeddangna dos dekket nggeddang sada ipas perbagianen tanoh siniberèken bai marga-marga Israel.

⁸Gabè milik simemerèntah tanoh Israel mo tanoh i, asa ulang itèndes nèngè bangsangKu, tapi memerèken jahjahen silebbihna i gabè milik marga-marga Israel.

⁹Idokken JAHOWA Sintèmbul i mo, “Enggo mo cukup dosa-dosa ndènè i, alè simemerèntah Israel! Pettadi mo pemahanmu siso selloh i dekket menèndes ginemgem i. Bahanken mo kadè siselloh janah adil. Sandok ulang nèngè pelaus kènè bangsangKu i tanoh kalak i nai. Aku, JAHOWA Sintèmbul i ngo memerèntahken i taba kènè.

¹⁰Pakkè mo dacing dekket sellup bennar:

¹¹Sada efa sukaten singkerrah, kennah dos isina dekket sada bat sukaten barang ncaèr. Patokenna kennah sada homèr. Jadi, kennah bagèen ngo sukaten i: 1 homèr 10 èfa 10 bat

¹²Dacingmu kennah bagèen: 1 syikal 20 gèra 1 mina 60 syikal

¹³Bagèen mo sukaten sinitetapken mahan pèlèen pagè: 1/60 bagien ipas hasil peraninmu nai daba: 1/60 bagien ipas hasil peraninmu nai minak zaitun: 1/100 bagien ipas hasil kayuna nai (Sukaten bat: 10 bat 1 homer 1 kor) biri-biri: 1 biri-biri i gennep 200 biri-biri nai. Kennah pèlèenken ndènè ngo pèlèen pagè, pèlèen situtungen, dekket pèlèen perdamèen, asa iampuni dosa-dosa ndènè. Aku JAHOWA Sintèmbul i ngo simemerèntahken i.

¹⁶Karinana pengisi nagerri kennah me- naruhken pèlèen i mendahi penguasa si- memerèntah Israel.

¹⁷Kennah ia ngo patut menokor pinakan mahan pèlèen situtungen dekket haliu mahan pèlèen pagè dekket anggur bai karina bangsa Israel tupung ari-ari pèsta, imo Pèsta Peltak Bulan, ari Sabat dekket ari pèsta sidèbankenna i. Kennah ipèmaken ngo pèlèen kesasaen dosa, pèlèen pagè, pèlèen situtungen dekket pèlèen perdamèen lako mengido kesasaen dosa bai bangsa Israel.”

¹⁸Idokken JAHOWA Sintèmbul i taba bangsaNa, “I ari sada bulan sada kennah uras kènè BagesKu merkitè memèlèken sada anak lembu siso mertikas.

¹⁹Kennah ibuat imam ngo daroh pèlèen kesasaen dosa i nai, nai ilapuken mo i mi tihang-tihang pèntu BagesKu bagi ma mi soki siempat langgaten dekket mi tihang-tihang pèntu pengkeruhen lako mbengket mi kasèan bagasen.

²⁰Bagidi ma mo baing i ari pitu bulankenna i, imo lako bai karina jelma simerdosa siso inakkati barang kumarna oda ibettoh. Merkitè bagidi enggo ijaga kènè kebadiaen BagesKu.

²¹I ari sipuluh empat bulan sada, kennah rayaken kènè Pèsta Paskah. Sidekkah pitu ari karina jelma kennah mangan roti siso meragi.

²²I ari perlebbè, kennah ipèlèken raja ngo sada lembu tonggal mahan pèlèen kesasaen dosa dirina dekket karina ginemgem.

²³Sidekkah pèsta sipitu ari i, kennah gennep ari ngo ipèlèken pitu lembu tonggal engket pitu biri-biri tonggal siso mertikas bai JAHOWA, nai bolet-bolet ngo i itutung. Kennah ipèlèken ma ngo gennep ari sada kambing tonggal mahan pèlèen kesasaen dosa.

²⁴Laènkenna i kennah ipèlèken dèng ma mo pagè buèna 17,5 sellup adum gennep sada lembu tonggal dekket tellu sellup minak zaitun adum gennep sada biri-biri tonggal.

²⁵Tupung Pèsta Undung-undung bulung, sinitebenai tupung ari sipuluh lima bulan pitu, gennep ari sidekkah pitu ari, kennah ipèlèken raja ma ngo pèlèen dos bagidi, imo pèlèen kesasaen dosa, pèlèen situtungen, dekket pèlèen pagè bak minak zaitun.”