Read Batak Dairi Hesekiel 46 Bible Online

Hesekiel 46 - Batak Dairi bible

Hesekiel 46

¹Idokken JAHOWA Sintèmbul i mo, “Kennah igerruk ngo pèntu pengkeruhen kebincaren lako mbengket mi kasèan bagasen sidekkah siennem ari mahan bahaen. Pellin ari Sabat dekket Pèsta Peltak bulan ngo kessa ndorok i buka pèntu pengkeruhen i.

²Tupung ari idi kennah mbengket arap kasèan ruar ngo raja memellus bilik mbellen nai cènder i gembar tihang pengkeruhen, sinderrang memèlèken pèlèen situtungen dekket pèlèen perdamèen bai raja nai imam-imam. Kennah sujud mo ia i pèntu pengkeruhen i janah mersembah taba JAHOWA, nai laus mo ia. Nai soh berngin mo oda ndorok igerruk pengkeruhen i.

³I lebbè pengkeruhen i mo karina ginemgem kennah sujud menembah JAHOWA gennep ari Sabat dekket Pèsta Peltak Bulan.

⁴Tupung ari Sabat kennah ipèlèken raja ngo taba JAHOWA pèlèen situtungen imo ennem anak biri-biri dekket sada biri-biri tonggal, karina i siso mertikas.

⁵Rebbak dekket biri-biri tonggal i kennah ipèlèken ma ngo pèlèen pagè 17,5 sellup buèna, janah rasken dekket gennep anak biri-biri i kennah ipèlèken ngo pèlèen pagè rembang mi perluna. Gennep pèlèen pagè kennah lot ngo adumna ipèlèken tellu sellup minak zaitun.

⁶Tupung Pèsta Peltak Bulan Pèlèen i kennah merumangken sada lembu tonggal, ennem anak biri-biri dekket sada biri-biri tonggal ngo pèlèen i, karinana siso mertikas.

⁷Rasken dekket gennep lembu tonggal dekket kambing tonggal, kennah ipèlèken ngo pagè 17,5 sellup buèna, janah rasken dekket gennep anak biri-biri, barang sadikè mo dok atèna. Gennep pèlèen pagè kennah lot adumna dekket pèlèen tellu sellup minak zaitun.

⁸Mula naing memèlè raja i BagesKu, kennah mbengket arap bilik mbellen ngo ia, janah balik pè arap dalan idi ma mo.

⁹Balikna nola, mula tupung ari-ari mbellen roh jelma nterrem lako menembah JAHOWA, nai kennah mbengket arap pengkeruhen utara ngo kalak i, lako balik kennah arap pengkeruhen selatan enggo kessa pul kalak i mersembah. Janah kalak simbengket arap pengkeruhen selatan, lako balik kennah arap pengkeruhen utara. Igerra ngo kalak balik arap dalan kan dikè kin ia mbengket; kennah arap pengkeruhen i suberrangna ngo kalak i balik.

¹⁰Raja kennah rasken ngo dekket ginemgem mbengket mi Bages JAHOWA janah lako balik pè kennah rasken ma ngo.

¹¹Tupung ari pèsta dekket kerja kennah ipèlèken ngo rasken dekket lembu tonggal i pagè buèna 17,5 sellup, janah rasken dekket gennep anak biri-biri, barang sadikè gerrek atè kalak simerpulung i. Gennep pèlèen pagè kennah lot ngo adumna dekket pèlèen minak zaitun tellu sellup buèna.

¹²Mula sèkel raja memerèken pèlèen gerrek atèna bai JAHOWA, tah pè i pèlèen situtungen barang pèlèen perdamèen, kennah ipedalngah ngo pengkeruhen kebincaren simenghuju mi kasèan bagasen bana. Kennah dos ngo carana memèlèken pèlèen i dekket siniulakenna tupung ari Sabat, tapi mènter igerruk mo ndor pengkeruhen i nola, enggo kessa balik ia.”

¹³Idokken JAHOWA mo, “Gennep ceggen, kennah ipèlèken ngo sada anak biri-biri merumur sitahun janah oda lot tikasna mahan pèlèen situtungen bai JAHOWA.

¹⁴Laènkenna i, kennah ipèlèken ma mo gennep ceggen dua kilo pagè dekket sisellup minak zaitun icampurken dekket pagè i. Imo pèlèen pagè kennah pèlèenken bai JAHOWA; soh mi amman sumendah ngo merlakku hatoren i.

¹⁵Gennep ceggen kennah dak pèlèenken ngo bai JAHOWA: Sada anak biri-biri, pèlèen pagè dekket minak zaitun.”

¹⁶Iperèntahken JAHOWA Sintèmbul i mo, “Mula iberèken raja taba anakna dèba tanoh pusakkana, gabè milik anakna i mo tanoh i janah gabè merumangken tanoh simpangansa.

¹⁷Tapi mula bai hambana ngo iberèken raja i dèba ipas tanoh pusakkana i nai, balik nola ngo tanoh i gabè milik raja i itahun Olihenken. Milikna ngo tanoh i janah pellin ia dekket dukak-dukakna ngo kessa ndorok mersidasaken tanoh i soh mi siterrusna.

¹⁸Oda ndorok ibuat raja i agia cituk pè ipas harta ginemgemna nai. Pellin tanohna sendiri ngo kessa ndorok iberèken taba dukak-dukakna, merkitè i sada kalak poda ndorok i bangsangKu nai isirang ipas milikna nai.”

¹⁹Enggo kessa i iarahken anak laki i mo aku arap pèntu i gembar pengkeruhen mi bilik-bilik simbadia mendempak mi utara. Bai imam-imam ngo ipèmaken bilik-bilik i. Ituduhken anak laki i ngo mi bekkas i punca kan kesunduten,

²⁰janah nina, “I bekkas èn mo kennah ibelgang imam-imam pèlèen kesasaen dosa dekket pèlèen penggancih kerogien dekket menuhur pèlèen pagè, asa cituk pè ulang iembah pèlèen simbadia i mi kasèan ruar, asa ulang mencilakai jelma nterrem.”

²¹Enggo kessa i iarahken nola mo aku mi kasèan ruar janah ituduhken bangku, lot ngo kasèan tersempiten i sokina siempat i, nggeddangna 20 mèter janah bekkangna 15 mèter.

²³Gennep kasèan i ikulilingi pagar batu janah lot ngo dalikan ipas pagar batu i.

²⁴Nina anak laki i mo taba aku, “En mo dapur-dapur bekkas perkebbas Bages JAHOWA memelgang pèlèen sinipèlèken jelma nterrem.”