Read Batak Dairi Hesekiel 47 Bible Online

Hesekiel 47 - Batak Dairi bible

Hesekiel 47

¹Iarahken anak laki i nola mo aku balik mi pèntu mbengket mi Bages JAHOWA. Kuidah mo laè menjarir arap terruh pèntu i mi kebincaren, bagè Bages JAHOWA i ma mendempak mi kebincaren. Menjarir ngo laè idi kan terruh pèntu Bages JAHOWA kan sèlatan nai memellus biding langgaten kan selatan.

²Nai iarahken anak laki i mo aku karuar arap pengkeruhen utara janah iteggu aku mi pengkeruhen kebincaren. Laè kètèk i menjarir kan biding selatan pengkeruhen i.

³Ninganna menibar dekket tongket penibarna, iarahken anak laki i ngo aku mengèkut-ngèkut permarir laè i mi kebin- caren sanga 500 mèter daohna, nai ipasulak mo aku suberrang. I bekkas idi pellin singgat mata-mata nènèh ngo kessa bages laè i.

⁴Enggo kessa bagidi isibar nola mo 500 mèter nai, janah laèna i sidi soh mi tèun. Isibar nola ma mo 500 mèter nai, janah laèna enggo soh mi abak.

⁵Isibar nola ma mo sikali nai 500 mèter daohna, janah enggo mo mbagessu laè idi i sidi ukum idalani merdalan nènèh. Mula lot kalak naing suberrang kennah merlangi ngo ia.

⁶Nai idokken jelma i mo mbang aku, “Alè jelma simangko-angko, perdatèken mo èn karinana mendè-mendè.” Enggo kessa bagidi iarahken nola mo aku mulak mengèkut-ngèkut laè,

⁷janah kuidah mo mbuè kalohon kayu i biding laè i kacimbang lambung.

⁸Nina mo mbang aku, “Menjarir ngo laè èn mi kebincaren memellus nagerri èn dekket memellus Napa Laè Jordan marir mi Laut Matè. Soh kessa laè i mi bagasen Laut Matè, mèter itukar mo laè laut masin i gabè malum.

⁹Barang mikè pè laè èn menjarir, i sidi ma mo lot karinana matcam bagè ikan dekket binatang sidèbankenna i. Itukar ngo laè Laut Matè gabè malum, janah barang mikè laè i menjarir, lot mo i sidi kenggelluhen.

¹⁰Mulai i takal laè i En-Gedi nai soh mi takal laè i En-Eglaim, rami mo perikan i biding-bidingna i mencinar jalana. Karina matcam bagè ikan lot mo ibas laè i, tosè bagè silotna i Laut Tengah.

¹¹Tapi ukum laè rabang dekket pèa-pèa arur i bidingna i oda ngo malum, tapi tong ngo i merumangken bekkas pemuaten sira.

¹²Arur i kacimbang-lambung biding laè i, turah ngo karina matcam bagè kayu buah-buahen. Oda pennah males bulung kayu i, janah buahna oda merkerri-kerrien. Merbuahken buah rembaru ngo kayu i gennep bulan, kumarna i Bages JAHOWA nai ngo laè marir memernekkisa. Buahna mahan pa- ngaen janah bulungna gabè tambar.”

¹³Idokken JAHOWA Sintèmbul i mo, “En mo perbalengen tanoh sinaing ipella-pellaken bai sisipuluh dua marga Israel. Marga Jusup menjalo dua bagian.

¹⁴Enggo ngo sanga kupadanken ukum tanoh i Kuberèken bai empungmu. Kumarna i buat mo tanoh i janah pella kènè mo adil bai ndènè.

¹⁵Perbalengen kan utara mulai i Laut Tengah nai mi kebincaren soh mi kuta Hetlon mi arah Hamat, terrus mi kuta Zedad,

¹⁶mi Berota dekket Sibraim (kuta i kellang-kellang kuta Damaskus dekket kuta Hamat), nai kessa i mi kuta Hazar-Enan, i perbalengen kuta Hauran.

¹⁷Jadi, perbalengen kan utara mulai Laut Tengah nai soh mi kebincaren, mi kuta Hazar-Enan; nai jahjahen Damsyik dekket Hamat mo kan utara perbalengen i.

¹⁸Perbalengen kan kebincaren menghuju selatan, mulai kan sada bekkas kellang-kellang jahjahen Damsyik dekket jahjahen Hauran nai. Jadi Laè Jordan mo gabè baleng tanoh Israel kan kesunduten dekket Gilead kan kebincaren, soh mi Tamar i biding Laut Matè.

¹⁹Perbalengen kan selatan menghuju mi barat daya, mulai i Tamar nai soh mi takal laè Kades-Meriba, nai mi barat laut arur mi perbalengen Mesir soh mi Laut Tengah.

²⁰Perbalengen kan kesunduten imo Laut Tengah, nai menghuju mi utara mi sada bekkas kan kesunduten dalan mbengket mi Hamat.

²¹Pella kènè mo tanoh i bai ndènè, rembang mi marga-marga Israel;

²²janah milik ndènè ngo tanoh i soh mi amman sumendah. Kalak sidèban simenettap i tengah-tengah ndènè, janah lot dukak-dukakna tubuh i sidi, kennah terolih ma ngo tanoh i. Kennah ètongen ngo kalak i bagè ripè i bangsa Israel, janah kennah dekket ngo kalak i iundi asa terolih tanoh tikan ibaing tikkina memella tanoh i tengah-tengah marga Israel.

²³Gennep kalak sidèban kennah iberèken ngo tanoh bagianna rasken marga Israel i bekkasna merian i. Aku, JAHOWA Sintèmbul i ngo mendokken i.”