Read Batak Dairi Hesekiel 48 Bible Online

Hesekiel 48 - Batak Dairi bible

Hesekiel 48

¹Perbalengen tanoh kan utara arur mi kebincaren mulai i Laut Tengah nai mi mayak kuta Hetlon, dalan mbengket mi Hamat, kuta Hazar-Enan, soh mi perbalengen i kellang-kellang kuta Damsyik dekket kuta Hamat. Marga-marga èn mo sikennah terolih sada bagian ibas tanoh siterhampar i perbalengen kebincaren nai menghuju mi kesunduten soh mi Laut Tengah, bagèen mo urutenna i utara nai mi selatan: Dan Asyer Naptali Manasye Efraim Ruben Juda

⁸Dèba nola ma tanoh i kennah ipèmaken jaè mahan keperluen merkedekoen. Nggeddangna kennah 12,5 kilomèter i perbalengen utara nai soh mi selatan. Perbalengen kebincaren dekket kesunduten kennah dos ngo nggeddangna dekket perbagianen siniberèken bai marga-marga Israel. Ipas bagian i ngo ipajek Bages JAHOWA.

⁹Dèba ibas jahjahen i nai ikellini bai JAHOWA, imo sinterpuk tanoh kan tengahna, nggeddangna 12,5 kilomèter, bekkangna 10 kilomèter.

¹⁰Kettan tengah tanoh i mo ipajek Bages JAHOWA. Karina imam kennah terolih ibas jahjahen simbadia i nai. Bagian kalak idi imo 12,5 kilomèter i biding kebincaren nai mi kesunduten, janah lima kilomèter i biding utara nai mi selatan.

¹¹Jahjahen sienggo ipejaè i mo gabè milik imam-imam pem- paren si Zadok. Enggo setia kalak i mengkebasi JAHOWA, oda bagè kalak Lewi dengan kalak i sada marga, sidekket mengulaken dosa rasken dekket kalak Israel sidèbanna i.

¹²Kumara i kennah berèenken ngo tanoh bai pemparen si Zadok, simbalang dekket tanoh sinaing berènken bai kalak Lewi. Janah mbadia kalohon ngo tanoh sinikelini i.

¹³Tanoh kalak Lewi i 12,5 kilomèter mo nggeddangna i kebincaren nai mi kesunduten, janah lima batu nggeddangna i utara nai mi selatan janah pergamparna pè rembang dekket tanoh imam-imam.

¹⁴Sinjengkal pè ipas tanoh idi nai oda ndorok idèaken kalak i barang itukarken; tanoh simerandalna tanoh kalak Israel i nai oda ndorok ilompat mi tangan kalak sidèban, kumarna enggo ikelini tanoh i bai JAHOWA gabè milikNa.

¹⁵Kan selatan tanoh sinikelini i, lot dèng ngo ibana 12,5 kilomèter nggeddangna janah tengah tellu kilomèter bekkangna. Oda ngo mbadia tanoh i janah ndorok ipakkè jelma nterrem gabè kutana dekket mahan jampalen, i tengahna kennah ipajek sada perkutaen.

¹⁶Kennah sagi empat ngo ibahan kuta i, gennep sisina mersibaren dua seperempat kilomèter.

¹⁷I sikuliling kuta i kennah lot tanoh lapang 125 mèter bekkangna.

¹⁸Kan kebincaren bak kesunduten kuta i lot tanoh lapang mersibaren lima kali tengah tellu kilomèter. Sidua nterpuk tanoh i kennah ipakkè mahan perjumaen pengisi kuta i.

¹⁹Karina jelma i marga Israel nai simerian i kuta i ndorok mengula tanoh i.

²⁰Jadi karina tanoh i termasuk tanoh sinikelini dekket tanoh bekkas kuta, sagi empat ngo rumangna, sibarenna 12,5 kilomèter i gennep sisina.

²¹Tanoh kan kesunduten dekket kebincaren tanoh sinikelini i ipèmaken bekkas Bages JAHOWA, imam-imam, kalak Lewi dekket kuta i, imo lako bai pe- nguasa simemerèntah. Kan kebincaren aur ngo tanoh i soh mi perbalengen kebincaren, dekket kan kesunduten soh mi Laut Tengah, i kellang-kellang tanoh Juda bak tanoh Benjamin.

²³Tanoh silot kan Selatan jahjahen sinikelini i, imo bagian marga-marga sidèbankenna i. Bellang tanoh i mulai i perbalengen kebincaren nai mi kesunduten soh mi Laut Tengah janah bagèen mo perbagina i utara nai mi selatan: Benjamin Simeon Isasar Zebulon Gad

²⁸Kan selatan tanoh Gad dapet ngo perbalengen mulai barat daya Tamar nai lampo takal laè Kades-Meriba, nai mi arah barat laut arur perbalengen Mesir soh mi Laut Tengah.

²⁹Idokken JAHOWA Sintèmbul i, “Bagidi mo kennah ipella-pellaken tanoh i bai marga-marga Israel.”

³⁰Pèntu mbengket mi Jerusalem karina lot ngo sipuluh dua. Empatna dingding batuna dua seperempat batu sibarenna, janah tertellu pengkeruhenna. Gennep pengkeruhen igerari mengèkutken marga Israel. Pengkeruhen kan utara mergerar Ruben, Juda dekket Lewi; pengkeruhen kan dingding batu kebincaren mergerar Jusup, Benjamin dekket Dan; silot i dingding selatan gerar-gerar Simeon, Isasar dekket Zebulon; sikan kesunduten ibaing gerarna Gad, Asyer dekket Naptali.

³⁵Karina dingding batu i geddangna sibah kilomèter. Janah mulai bagèndari nai igerari dèba mo kuta i: “I sidi ngo JAHOWA!”