Read Batak Dairi Hesekiel 5 Bible Online

Hesekiel 5 - Batak Dairi bible

Hesekiel 5

¹Idokken JAHOWA mo, “Alè jelma simangko-angko, buat mo peddang ntajem, janah pakkè mo i mencukkur kerri janggut dekket bukmu. Nai timbang mo buk i ipas dacing nai pella mo pella tellu.

²Sepertellu kennah tutungenmu i tengah-tengah kuta i, enggo kessa mentadi pengkubuen i. Sepertellu nai kennah gatgati merkitè peddangmu ninganna mengkulilingi kuta i, janah sepertellu sitadingna i, kennah hamburenken mi babo, nai Kuburu mo i merkitè peddangKu.

³Tadingken mo cituk ipas buk idi nai janah balut mi bagasen pengelempiten jubahmu.

⁴Nai buat cituk nai ibas buk idi nari, patakken mi api janah belli messeng. I sidi nai rarat mo api i taba karina bangsa Israel.”

⁵Idokken JAHOWA Sintèmbul i mo, “Tengen, ènda mo Jerusalem. Kubaing ngo Kuta èn i pusat dunia, dekket kerajaen sidèban i sikulilingna.

⁶Tapi enggo itulak Jerusalem perèntahKu janah jahaten ngo ia daripada bangsa-bangsa sidèban, lebbihna i dèng pengalo-ngalona daripada kerajaen sikulilingna. Ilausken Jerusalem ngo perèntah-perèntahKu janah oda nggèut menguèi pati-patinKu.”

⁷Idokken JAHOWA Sintèmbul i, “Dengkohken mo alè Jerusalem! Oda nggèut kono menguèi perèntah bak pati-patinKu; lebbih mengalo-ngalo ngo kono daripada bangsa-bangsa sidèban i sikulilingmu, janah enggo ièkuti kono adat kecemmalen kalak i.

⁸Aku, JAHOWA Sintèmbul i, mendokken, musuhmu ngo Aku. Kuhukum mo ko i hadeppen bangsa-bangsa sidèban.

⁹Kumernaken ulah-ulahmu siKukecegoken, Kuhukum mo pengisimu merkitè hukum ntengam simadèng nung Kubaing, janah oda nèngè Kubaing bagidi i podi ari.

¹⁰Ipangan partuana mo dukakna sendiri janah dukak kipangan partuana. Bagidi mo Kuhukum kalak i, janah Kupemèrap mo singgelluhna sitadingna dèng mi dèsa siualuh.

¹¹Dèbata singgelluh i ngo Aku, JAHOWA Sindatesna, janah èn mo ranangKu: Kumarna enggo mekemmer ibaing kono BagesKu merkitè ulah-ulahmu jahat dekket pemoyangken atè, Kulala mo ko oda meralang-alang.

¹²Sepertellu ibas pengisimu nai mermatèen kerna sakit uabba dekket kumarna lèhè sempa mi kuta i. Sepertellu irabbatken merkitè peddang i ruar kuta, janah sepertellu nai mambur mèrap Kubaing mi dèsa siualuh janah dak Kuletlet merkitè peddang.

¹³Iakapi kono mo ntengamna pungur bak pengamukKu soh lebbè pulak Kuakap. Enggo kessa saut masa karinana idi, tok mo kono, Aku ngo JAHOWA, sienggo mendokken bamu, kumarna melaga Aku kemulihken oda setia kono.

¹⁴Gabè empak-empak nai ngo ko, janah irèhè-rèhèi bangsa-bangsa i sikulilingmu mo ko; gennep lot kalak mentas, pedaohken dirina bamu nai.

¹⁵Mula punguren Aku janah nggerger atèngku midah kono dekket kuhukum kono, mengerri ngo iakap karina bangsa i sikulilingmu. Irèhèi kalak i mo ko janah moyang atèna midah ko.

¹⁶Kuago mo persediaen bekkelmu, janah kubelli mo rapar pengisimu. Irasai kalak i mo bakunè mpiahna rapar, bagè anak panah ntajem simenembus bak memunuh kono.

¹⁷Laènken bala kelèhèen, Kupesempa ma mo sakit uabba, kekejamen bak geraha lako memunuh pengisimu, dekket binatang-binatang lako memunuh dukak-dukak kalak i. Aku, JAHOWA ngo sienggo mendokken i.”