Read Batak Dairi Hesekiel 6 Bible Online

Hesekiel 6 - Batak Dairi bible

Hesekiel 6

¹Idokken JAHOWA mo mbang aku,

²“Alè jelma simangko-angko, tatap mo delleng-delleng Israel, janah bagahken tennahKu tersèngèt hukum bai kalak i.

³Pasulak mo kalak i mendengkohken dekket memperatè-atèken, bakunè sienggo kudokken Dèbata Sintèmbul i taba delleng-delleng i, bak taba uruk-uruk, rebè-rebèen dekket napa-napa. Tuhu-tuhu, kutengesken peddang lako mengelala bekkas-bekkas menembah dèbata siso tuhu.

⁴Irumpakken mo langgatenna janah ipempustakken mo perdahupanna. Karina jelma sini sidi ibunuh i hadeppen sembahenna i.

⁵Mersara-sara mo kubaing bangkè kalak Israel; janah tulan-tulan kalak i pè Kuhamburken i gembar langgatenna i.

⁶Icèdaken mo karina kuta kalak Israel, karina langgaten bak sembahen kerri soar-sair, perdahupanna gontang-ganting, janah bennè mo karina sinibahan kalak i.

⁷Barang i dikè sambing pè dak lot mo jelma terbunuh, janah satdar mo simaluahna, Aku ngo JAHOWA.

⁸Kujamotken mo cituk bai kalak i nai asa ulang rabbat tapi mambur mèrap mo kalak i mersellaten i bangsa-bangsa sidèban;

⁹nggelluh ibas buangen mo kalak i i sidi. Nai terèngèt mo kalak i bangKu janah satdar, Aku ngo menghukum dekket pelèaken kalak i kumara oda setia ukur kalak i bangKu. Itadingken kalak i ngo Aku, janah debata siso tuhu ngo ipilih mahan gancihKu. Nai moyang mo atè kalak i midah dirina sendiri kumernaken karina kejahaten bak singgodo sinibahanken kalak i.

¹⁰Nai ibettoh kalak i mo Aku ngo JAHOWA janah karina sèngèt-sèngèt sienggo Kudokken i, oda pellin asup-asup bagi sambing.”

¹¹Idokken JAHOWA Sintèmbul i, “Bonek mo! Tangis milangi mo! Muo-uo mo baing luina kumarna karina kejahaten dekket kecegonken sienggo ibahanken bangsa Israel. Matè ibaing geraha mo kalak i, rapar dekket sakit uabba.

¹²Karina mo kalak i mengerasaken pengamuk lagangKu. Cioen mo kalak sienggo ibuang ndaoh, nai matè; sinjolmitna matè tikan geraha, janah sitadingna matè rapar.

¹³Mergamparen mo bangkè i kellang-kellang gana-gana sembahen dekket i gembar langgaten-langgaten, darak i gennep uruk ndates, dekket i pucuk karina delleng, i terruh gennep kayu ntemtem bak gennep kayu mbellen; sandok barang i dikè sambing tupèh kalak i menutung pèlèen bai sembahen kalak i. Nai gennep jelma mo satdar, Aku ngo JAHOWA.

¹⁴Uè, Kupekustang mo tanganKu, janah mengereppuk nagerri kalak i, asa gabè longo-longoen mulai i gurun pasir Selatan nai soh mi kuta Ribla i utara. Ibas bekkas siniianen kalak Israel nai, sada poda ipaluah. Nai ibettoh karina jelma mo, Aku ngo JAHOWA.”