Read Batak Dairi Hesekiel 7 Bible Online

Hesekiel 7 - Batak Dairi bible

Hesekiel 7

¹Idokken JAHOWA mo bangku,

²“Alè jelma simangko-angko, Aku JAHOWA Sintèmbul i naing mendokken kata èn taba tanoh Israel: En mo ujungna karina tanoh èn!”

³Idokken JAHOWA, “Alè Israel, enggo dapet bagèndari persudahmu. Irasai kono mo pungurKu. Kuhukum mo kono tosè mi ulah-ulahmu singgodo i.

⁴Oda nè masèh atèngku barang mengampuni kono. Kuhukum mo kono tosè mi karina pemahanmu singgodo i. Nai satdar mo ko, Aku ngo JAHOWA.”

⁵Bagèen ngo idokken JAHOWA Sintèmbul i taba bangsa Israel, “Dakdak peganci mo sempa olpek bamu.

⁶Enggo mo sondel karina bagèndari. En mo persudahmu. Oda lot nè harapenmu.

⁷Karinana enggo sondel lako bamu, alè bangsa simerian i tanoh èn. Oda lot nèngè bagèndari kerja i langgaten delleng, pellin kogontaren nai ngo kessa lot.

⁸Oda ndekkah nèngè, irasaken kènè mo pungurKu sintengam i. Kuhukum mo kènè tosè mi perulaen ndènè. Kubalesken mo taba kènè karina perulaen ndènè nggodo i.

⁹Oda nè masèh atèngku barang pè me- ngampuni kènè. Kuhukum mo kènè tosè mi karina singgodo ulah-ulah ndènè. Nai satdar mo kènè, Aku ngo JAHOWA janah Aku ngo menghukum kènè.”

¹⁰Enggo dapet ari merjèkat bai bangsa Israel. Mak terkira siso puna-puna. Enggo sondel kejukkaten.

¹¹Kekejamen memaingken muat lahlah kejahaten. Karina kinibèak, kehejien dekket ketermurmuren kalak i, kennah kerri oda giam lot merulbas.

¹²Enggo roh tikkina bagèndari, enggo ndessing arina! Simenokor dekket simerdèa, kadè poda lot laba dapetsa, kumarna sem- pa taba karina jelma ngo hukum JAHOWA.

¹³Oda lot nè sempat saudagar menjalo balik kadè sienggo idèa, kumarna mengenna mo pungur JAHOWA taba barang isè sambing. Oda lot keluahen bai jelma perjahat.

¹⁴Enggo mersora sarunè, janah kebbas mo karina jelma. Tapi sada kalak poda berkat mi perjuhapen, kumarna pungur JAHOWA mengenna taba karina jelma.

¹⁵I karina dalan silot i kuta masa mo geraha, i gennep bages dak lot mo sakit uabba bak kelèhèen. Barang isè sambing i ruar kuta, matè kerna geraha, janah simerian i kuta gabè ibunuh sakit bak lèhè.

¹⁶Dèba maluah janah mperus mi delleng. I sidi mo kalak i dak ialai bagè ndarapati i napa-napa nai, karinana mo gabè menderru kumarna dosana.

¹⁷Gennep jelma gabè eangen tanganna janah menggirgir tèunna.

¹⁸Iolesken kalak i mo oles laklak, janah menggirgir mo karina dagingna. Icukkur mo takal kalak i janah ipemèla.

¹⁹Ipempatakken kalak i mo emmas bak pirak i tengah ndalan bagè empak-empak, kumarna ari JAHOWA lako pepolihken pungurNa, oda ndorok emmas bak pirak i paluahken kalak i, balikna idi nola ngo merembahken kalak i mi bagasen dosa. Oda tergunaken kalak idi i lako pepulakken cubellek barang lako mengisi beltekna.

²⁰Tikala i gegah ngo kalak i kumernaken intanna simerandal i, tapi kumarna ibaing nola i mahan gana-gana kecegonken, gabè ibaing JAHOWA mo harta kalak idi i gabè siburadanenken.

²¹Idokken JAHOWA mo taba bangsa Israel, “Kubelli mo kalak sidèban menamuni kènè. Irampasi janah ilamuni perjahat mo kuta ndènè.

²²Oda sampat aku mula pè icèdai BagesKu janah mekemmer ibaing penamun-penamun.

²³Gontar mo suberri nagerri; barang i dikè pè masa mo pembunuhen dekket keke- jamen.

²⁴Roh mo kubaing bangsa sikejamna kalohon lako menaban bages-bages ndènè. Lubalang-lubalang ndènè simahantuna pè gontar ngo, Kubelli kessa bangsa-bangsa i mengereppuk bekkas ndènè mersembah.

²⁵Sempa mo bai kalak i bonek dekket mendellè, nai itulusi mo kemènaken tapi oda dapet kalak i.

²⁶Olpek dekket berita meroha ngo dak merrohen. Ipidoken kènè mo asa uè nabi-nabi mengeramal, tapi oda terbaing kalak i. Bagi ma ngo bang imam-imam kadè poda lot sinaing ajarenkenna bai bangsa i, janah pengulu-pengulu pè mak lot nè pedahenkenna.

²⁷Menderru mo raja, mendellè mo anakna sinaing menggancih raja janah menggirgir buradan mo ginemgem. Kuhukum mo kènè tosè mi karina ulah-ulah ndènè janah mengerungguken kènè bagè kènè mengerungguken kalak. Nai satdar mo kènè, Aku ngo JAHOWA.”