Read Batak Dairi Hesekiel 8 Bible Online

Hesekiel 8 - Batak Dairi bible

Hesekiel 8

¹I ari lima bulan ennem i tahun pe- ennemken kami terbuang, roh mo mi bagesku pengulu-pengulu kalak Juda siterbuang, janah rasken kundul-kundul dekket aku. Sintempu mèter ikuasai kuasa JAHOWA Sintèmbul i mo aku.

²Kutarè mo mi babo, kuidah mo lot bagè rumang jelma. I abakna nai mi terruh, bagè api idahen, janah i abakna nai mi dates, merkillok-killok bagè tembaga sinigosok.

³Idoroken mo lot bagè rumang tangan, nai ijambul mo bukku. Nai ibas alaten i, bagè cara idokong Tendi Dèbata mo aku ndates mi babo, janah iembah mi Bages JAHOWA i Jerusalem, i pèntu mbengket mi kasèan tengah sikan utara. I sidi mo lot gana-gana simendungkul laga Dèbata.

⁴Nai kuidah mo ncihur merkillok-killok menandaken pekiroh Dèbata Israel bagè sikuidah tikan i biding Laè Kebar aku.

⁵Idokken Dèbata mo mbang aku, “Alè jelma simangko-angko, tengen mo mi utara.” Kuuèi mo, kan langgaten i gembar dalan mbengket kuidah mo gana-gana simendungkul laga Dèbata i.

⁶Idokken Dèbata mo mbang aku, “Alè jelma simangko-angko, idah kono ngo bakunè simasa i? Perdatèken mo ulah-ulah kalak Israel simeronah i, sipedaohken Aku i BagesKu nai! Roh mo ko, asa Kutuduhken bamu simeronahna dèng.”

⁷Nai iembah mo aku mi pèntu mbengket kasèan kan ruar janah ituduhken sada lubang i dingding.

⁸Nina, “Alè jelma simangko-angko pebelgah mo lubang èn.” Enggo kessa kuulaken, kuidah mo sada pèntu.

⁹Nina mo mbang Aku, “Masuki mo janah tengen mo ulah-ulah nggodo janah meronah sinibaing kalak i i sidi.”

¹⁰Masuk mo aku janah kuidah mo. Enggo iokir dingding i karina matcam bagè nipè dekket binatang binatang haram sidèbankenna i, bagi ma mermatcam bagè gombaren gana-gana sinisembah kalak Israel.

¹¹Pitupuluh kalak mo èkuten bangsa Israel i sidi, dekket mo si Jaazanya anak si Safan. Karina kalak i mersijèmak tersada perdahupaen, cèmberna mertiup.

¹²Idokken JAHOWA mo mbang aku, “Alè jelma simangko-angko, idah kono ngo bakunè ulah-ulah èkuten kalak Israel i dekket cara sipsip? Mersembah ngo kalak idi ibas bekkas sienggo dom gana-gana dekket alasen enggo Kutadingken nina nagerri èn janah oda mengidah ulah-ulah kalak idi i.”

¹³Nai idokken JAHOWA mo mbang aku, “Idahenmu nola mo ulah-ulah kalak silebbih nggodona dèng.”

¹⁴Nai iembah mo aku mi pèntu pengkeruhen Bages JAHOWA kan utara janah ituduhken mo baku daberru-daberru simenangisi permatè Sembahen Tamus.

¹⁵Idokken JAHOWA mo taba aku, “Alè jelma simangko-angko, idah kono ma ngo simasa i? Mèduk dèng ngo lebbih nggodo.”

¹⁶Iembah mo aku mi kasèan kan bagasen Bages JAHOWA. I gembar pèntu mbengket mi bilik simbadia, i kellang-kellang langgaten bak dalan, lot mo duapuluh lima kalak jelma. Itondalken kalak i ngo bilik simbadia, janah sujud mi kebincaren menembah mataniari mbincar.

¹⁷Idokken JAHOWA mo taba aku, “Alè jelma simangko-angko idah ko ma ngo i? Oda dèng ngo polih iakap kalak Juda èn ukum pellin mengulaken simeronah i dekket mahanken ulah-ulah siso puna-puna i suberri nagerri. Gabè i sènda nola dèng ngo ibahanken ibagasen BagesKu simaing muat pungurenna Aku. Tengen mo bakunè carana kalak i mengelèai Aku merkitè sintengamna èn!

¹⁸Iakapi kalak i mo lagangKu sintengamna! Oda malap ukurku barang pè mengampuni kalak i. Tukasi pè isurakken kalak i sodipna taba Aku nggang kalohon, oda uè Aku mendengkohken i!”