Read Batak Dairi Hesekiel 9 Bible Online

Hesekiel 9 - Batak Dairi bible

Hesekiel 9

¹Nai kudengkoh mo idiloken JAHOWA, “Roh mo kè mi sèn alè jelma sinaing pesautken hukumKu mi kuta èn. Embah kènè mo senjata-senjata ndènè.”

²Mèter roh mo rebbakken ennem kalak i ruar pèntu pengkeruhen Bages JAHOWA si kan Utara nai, gennep mersiembah senjatana. Rebbakken dekket kalak i lot kalak merpakèen linen merembah penuraten. Masuk mo kalak i janah cènder mo i gembar langgaten tembaga.

³Nai cuhaya merkillok-killok, pertanda pekiroh Dèbata Israel, merbendella i kerub-kerub idi nai, nai lompat mo i bekkasna mula-mula i nai mi pèntu mbengket Bages JAHOWA. Nai idilo JAHOWA mo kalak simerpakèen linen i, nina mo,

⁴“Dahi kènè mo karina soki-soki kuta èn, janah baing tanda i perdempaken jelma simengerasai bonek dekket susah kumarnaken karina ulah-ulah nggodo sinibaingna i kuta i.”

⁵Kudengkoh mo idokken JAHOWA taba jelma sidèbanna, “Ekutken mo ia mi karina soki-soki kuta i janah bunuh mo gennep jelma ulang meralang-alang.

⁶Bunuh mo karina daholi bak daberru, tua-tua barang poso, partua-partua bak anak-anak. Tapi ulang kekadè barang isè lot tanda i perdempakenna. Mulai i sen nai, i BagesKu èn nai.” Nai itubennai kalak i mo mengulaken ulaenna lako memunuh èkuten kalak Israel sidang cènder i Bages JAHOWA.

⁷Idokken JAHOWA mo taba kalak i, “Lamuni kènè mo BagesKu èn! Domi kènè mo kasèana i dekket bangkè. Mulai kènè mo!” Nai mèter imulai kalak i mo memunuhi jelma silot i kuta i.

⁸Sidekkah masa pembunuhen i, i sidi ngo aku pellin sadaku. Sujud mo aku janah dilo-dilo, “Alè JAHOWA Sintèmbul i, oda nè ngo terpetia-tia lagamu taba Jerusalem asa naing iripasken kono karina silotna dèng i Israel èn?”

⁹Ialoi JAHOWA mo, “Enggo iulaken kalak Israel bak Juda dosa mbelgah kalohon. Enggo memunuh kalak i i suberri bekkas, janah Jerusalem pè enggo ilamuni merkitè kejahaten. Idokken kalak i, Aku, JAHOWA, enggo menadingken nagerri èn, gabè maknè mo nina kuidah ulah-ulah kalak i.

¹⁰Oda nè masèh atèngku taba kalak i. Kubalesken mo taba kalak i bagè pemaingna taba sidèban.”

¹¹Enggo kessa i, balik mo simerpakèen linen i memagahken taba JAHOWA, nina mo, “Enggo saut karina siniperèntahken JAHOWA.”