Read Batak Dairi Daniel 3 Bible Online

Daniel 3 - Batak Dairi bible

Daniel 3

¹Ipas sada katika ibahan Raja Nebukadnezar mo sada mèjan emmas datesna 27 mèter janah bellangna hampir 3 mèter. Ipejengjeng ia mo idi i napa Dura i propinsi Babel.

²Kessa i idilo raja i mo karina raja aur, nasa gubèrnur, bupati, pemernoi nègara simennep tagan-tagan, perhukum, sipandè hukum, dekket karina pengulu lako mendekketti pèsta petettahken mèjan sienggo nipajekna idi.

³Enggo kessa roh karina kalak i janah cènder i lebbè mèjan idi,

⁴isurakken pengabal raja i mo nggang kalohon, “Kènè karina dengan, ibas karina bangsa, suku bangsa dekket perkataen nai! Dengkohken kènè mo perèntah raja ènda:

⁵Mula mersora kessa sarunè, merdengan sora suling, kucapi, lobat, gendang, sordam, dekket oning-oningen sidèbanna, kennah sujud mo kènè menembah mèjan emmas sienggo nipejengjeng Raja Nebukadnezar.

⁶Barang isè oda menguèi perèntah èn, karangkenna i mo ambongenken ia mi bagasen pinoron simergollah-gollah.”

⁷Nai mendengkoh oning-oningen idi merkata, sujud mo karina bangsa, suku bangsa dekket perkataen, janah menembah mèjan emmas idi.

⁸Barang piga-piga kalak Babel memakè kesempaten idi lako maing jèkat taba kalak Jahudi.

⁹Nina kalak i mo taba Raja Nebukadnezar, “Njuah-njuah mo Rajai soh mi sidekkah-dekkahna!

¹⁰Enggo ngo iruapken Rajai perèntah, magahken enggo kessa ipersora oning-oningen, karina jelma kennah sujud janah menembah mèjan emmas idi,

¹¹janah barang isè oda menguèi perèntah idi ambongenken mo mi bagasen pinoron simergollah-gollah.

¹²Tapi barang piga-piga kalak Jahudi sienggo iperserahi Rajai menjèmak pemerèntahen propinsi Babel iètongi poda lot perèntah Raja idi. Kalakna imo si Sadrakh, si Mesakh, dekket si Abednego. Oda ngo uè kalak i menembah dèbata-dèbata sinisembah Rajai janah oda uè menembah mèjan emmas sinipejengjeng Rajai.”

¹³Mendengkoh i gabè melaga kalohon mo raja i, nai iperèntahken mo asa iembah sitellu kalak i menghadep tabasa.

¹⁴Ikusoken raja i mo taba kalak i, “Ti Sadrakh, ko Mesakh dekket ko Abednego! Tuhuna ngo kènè oda uè menembah dèbata sikusembah janah oda ma uè sujud taba mèjan emmas sienggo kupejengjeng idi?

¹⁵Asa, bagèndari pè, mersudia ngo kènè lako sujud janah menembah mèjan idi tikan mersora kessa nahan oning-oningen? Mula oda uè kènè, memènter mo kènè ambongenken mi bagasen pinoron simergollah-gollah idi. Janah dèbata apai mo ndorok paluahken kènè ibas kuasangku nai?”

¹⁶Ialoi si Sadrakh, si Mesakh dekket si Abednego mo, “Sentabi mo Raja nami, oda uè kami mencuba kibèla dirinami.

¹⁷Mula ndorok ngo Dèbata sikusembah kami i paluahken kami tarap pinoron simergollah-gollah idi nai dekket tarap kuasa Raja idi nai, pasti ngo idi ibakinken.

¹⁸Tapi tah oda nola pè ibakinken bagidi, naing mo ibettoh kènè rajanami ukum kami oda ngo menembah dèbata sinisembah Rajai janah oda menembah mèjan emmas sinipejengjeng Raja idi.”

¹⁹Nai seggat mo laga Raja Nebukadnezar taba si Sadrakh, si Mesakh dekket si Abednego, gabè cara mbara-mbettak mo abèna. Iperèntahken mo asa ibakin pitu kali lempit nggarana pinoron i daripada ncemmalna kin.

²⁰Nai idokken mo barang piga-piga kalak simergegohna kalohon soridaduna lako mengèkèt si Sadrakh, si Mesakh dekket si Abednego, ninganna mengambusken kalak i mi bagasen pinoron simergollah idi.

²¹Mènter mo tuhu telluna kalak i ièkèt pelcik janah merpakèen lengkap imo kamèja, jubah, tangkuluk dekket pakèen sidèbanna, nai iambongken mo mi bagasen pinoron simergollah-gollah i.

²²Kerna bagidi mposina perèntah raja i, pinoron idi pè enggo ngo igergerri mahantu kalohon nggarana gabè matè mo idilat api i kalak simendokong si Sadrakh, si Mesakh dekket si Abednego mi gembar pinoron idi.

²³Bagidi mo telluna kalak i siterèkèt i ndabuh mi bagasen pinoron simergollah-gollah idi.

²⁴Nai sintempu mo Raja Nebukadnezar tersengget. Kèkè mo ia sintempu janah menenggoken taba pugabèna, “Otang tellu kalak ngo tupèh kalak i ndai sièket janah siambongken mi bagasen api idi?” Ialoi kalak i mo, “Imo gia tuhu, Raja- nami.”

²⁵Idokken raja i mo, “Tapi kasa nola empat kalak kuidah merdalan-dalan i tengah-tengah api idi? Oda nè terèkèt kalak i janah laju oda lot kadèen. Janah sipeempatken i tosè bagè sembahen ngo rupana.”

²⁶Nai ijolmiti si Nebukadnezar mo pèntu pi- noron idi janah mendiloken, “O Sadrakh, Me- sakh dekket ko Abednego, naposo Dèbata si Tembul kalohon idi! Karuar mo kènè ibas pinoron idi nai!” Nai karuar mo kalak idi.

²⁷Karina wakil raja, gubèrnur, bupati, dekket pugabè-pugabè sidèbanna mencingkoi kalak i sitellu janah mengidah kalak i cituk poda lot ilèap api i. Buk kalak i poda melakus, janah gedda kalak i poda messeng, salang bau cèmber pè oda giam lot kalak i.

²⁸Nai mdokken raja i mo, “Nipoji mo Dèbata sinisembah si Sadrakh, si Mesakh dekket si Abednego. Enggo ipasulak malaèkatNa lako paluahken telluna naposoNa sipercaya tabasa. Enggo ilausi kalak i perèntahku janah dolien kalak i matè daripada menembah barang memoji dèbata apaina sambing pè laènken Dèbata kalak i sendiri.

²⁹Kerna i kuperèntahken mo taba jelma i gennep bangsa, suku bangsa barang iperkata kadè nai, simengeruapken pengelèaen taba Dèbata sinisembah si Sadrakh, si Mesakh dekket si Abednego, gellohen mo janah rumpakenken sapona janah baingen gabè pinumpuk. Kerna oda lot dèbata sindorok memaingken bagè sienggo ibakin Dèbata idi.”

³⁰Enggo kessa i ipenaik raja i mo pangkat si Sadrakh, si Mesakh dekket si Abednego, asa gabè perpangkat ndates mo kalak i i propinsi Babel.