Read Batak Dairi Daniel 4 Bible Online

Daniel 4 - Batak Dairi bible

Daniel 4

¹Enda mo mongmong Raja Nebukadnezar sinitengeskenna bai karina bangsa, suku bangsa dekket kata i suberri dunia: “Tabè njuah-njuah!

²Sèkel ngo aku naing menukutken kelengangen dekket mujijad sienggo ibaing Dèbata Sintèmbul kalohon i taba aku.

³Oda langlang belgah mujijad sinibakinNa! Oda langlang mahantuna kelengangen sinibakinNa! Dèbata ngo gabè raja soh sidekkah-dekkahna. Merkuasa ngo ia soh seggen.”

⁴Merdamè bana sennang ngo aku merian i bagasen istanangku janah oda kurang barang kadè.

⁵Tapi tikan sada berngin sinderrang meddem aku, ternipi ngo aku janah dapet alaten memaingken gulut kalohon ukurku.

⁶Nai kudilo mo sipandè-pandè silot i Babel lako peterangken baku lapaten nipi idi.

⁷Tapi tikan roh pertendung, sipandè mertabas, kalak simerhèlmu dekket sipandè merketika janah kusukutken nipingku idi taba kalak i, sada kalak poda lot ndorok peterangken lapatenna.

⁸Perpodi roh mo si Daniel sinigeraren ma si Beltsazar codi bagè gerar dèbatangku. Idomi tendi sembahen simbadia ngo si Daniel. Kusukutken ma mo bana nipingku idi, ningku mo,

⁹“Alè, Beltsazar, èkuten kalak simerhèlmu, kubettoh ngo ukum kono idomi tendi dèbata simbadia, asa oda ngo lot rusia mboni ukum bamu. Dengkohken mo nipingku ènda, janah terrangken mo lapatna.

¹⁰Sinderrang meddem aku, kuidah mo pana sada kayu turah i tengah-tengah dunia èn.

¹¹Ndates kalohon ngo kayu idi; mbelgah kalohon ngo batangna janah ntegguh. Soh ngo mi langit pucukna, gabè ndorok idah karina kalak sini tanoh èn.

¹²Luyun kalohon ngo bulungna janah buahna pè ratraten, bias mahan pangaen karina pengisi dunia èn. Mergempangen ngo binatang-binatang meriar i terruh lenggemmen kayu i janah merasar manuk-manuk i dahan-dahanna. Janah karina nasa singgelluh ndorok kipangan buahna.

¹³Tikanna kupekoser-koser ibas ukurku alaten idi, kuidah mo sada kalak malaèkat susur i sorga nai; kebbas ngo ia idahen janah merjaga-jaga.

¹⁴Idiungken mo katana, ‘Tabah mo kayu idi janah pontongi dahan-dahanna, rurus mo bulungna janah hamburken buahna. Buro mo binatang-binatang simergempangen i terruhna dekket manuk-manuk simerasar i dahan-dahanna.

¹⁵Tapi belli mo tonggarna tading i bagasen tanoh. Ekèt mo bak rantè bessi dekket tembaga nai tadingken mo i jampalen. Belli mo ia ibernekki hembun, janah nggelluh rebbak dekket binatang-binatang bak suan-suanen.

¹⁶Belli mo pikiren kejelmaenna gancih gabè pikiren binatang sidekkah pitu tahun.

¹⁷Idi mo keputusen nami malaèkat si dak tong kebbas janah merjaga-jaga. Dok atè nami imo asa karina kalak barang i dikè sambing pè mengakui, Dèbata Sintèmbul kalohon ngo merkuasa taba kerajaen jelma janah iberèken kerajaen idi bai barang isè sambing sinipilihNa, bang bai kalak siso maharga pè!’

¹⁸Alè Beltsazar, idi mo nipingku. Bagèndari pè bagahken mo lapatna taba aku. Sada kalak poda lot sipandè ipas kerajaenku nai ndorok memagahken taba aku, tapi ukum kono ndorok ngo, kerna idomi tendi dèbata simbadia i ngo kono.”

¹⁹Mendengkohken i, tersengget janah bengngap mo si Daniel, sinigeraren ma si Beltsazar sinempas. Nai aku, Raja Nebukadnezar mendokken tabasa, “Alè Beltsazar, ulang kono mbiar kumernaken nipi bak lapatna idi.” Ialoi si Beltsazar mo, “Raja nami, sellohna i nemmuken mula karina simasa siniramalken nipi idi sempa taba musuh-musuh Rajai janah oda taba Rajai.

²⁰Bagi mo datesna kayu siniidah Rajai, soh mi langit pucukna, janah ndorok idah karina jelma sinitanoh èn.

²¹Bulung-bulungna luyun janah buahna pè ratraten gabè bias memerrè pangaen bai karina pengisi dunia. Mergempangen ngo binatang-binatang meriar i terruh lenggemmenna, janah manuk-manuk merasar i dahan-dahanna.

²²Alè Raja nami, Rajai ngo kayu sindates janah ntegguh idi. Muat tambahna ngo kebelgahen Rajai soh mi la- ngit dekket kuasa Rajai soh mi punca dunia èn.

²³Idah Rajai ma ngo sada kalak malaèkat susur i sorga nai ninganna mendokken, ‘Tabah mo kayu èn janah patèken, tapi belli mo tonggarna tading ibagasen tanoh. Rakut mo dekket rantè bessi dekket tembaga nai tadingken mo i jampalen. Belli mo ia ibernekki hembun janah nggelluh rebbak dekket binatang-binatang sidekkah pitu tahun.’

²⁴Alè Raja nami, bagèen ngo lapat nipi ndènè i, janah ènda mo siniputusken Dèbata Sintèmbul i tersèngèt Rajai sendiri.

²⁵Puarenna mo Rajai tarap jelma mbellang nai janah merian i tengah-tengah binatang-binatang sini jampalen. Mangan dukut mo Rajai sidekkah pitu tahun tosè bagè lembu janah meddem i jampalen, gabè itaptapi hembun. Enggo kessa i ipertuhu Rajai mo magahken Dèbata Sintèmbul i ngo merkuasa meradepken kerajaen jelma, janah iberrèken kerajaen idi bai barang isè sambing sinipilihNa.

²⁶Idokken malaèkat i ngo asa itadingken tonggar kayu idi ibagasen tanoh. Merlapaten ngo idi ukum Rajai tong dèng ngo mengolihi gabè raja enggo kessa iaku Rajai Dèbata ngo mengerajai karina dunia èn.

²⁷Kumerna i naing mo nemmuken iuèi Rajai peddah naposo ndènè èn. Ulang nèngè mo merdosa Rajai, tapi ulaken kènè mo kadè simerandal dekket ntèger, janah mermasèh atè mo kènè taba kalak sincor. Merkitè bagidi dak tong mo sennang Rajai.”

²⁸Karinana idi masa taba diringku, Raja Nebukadnezar.

²⁹Enggo kessa sipuluh dua bulan, tikan merdalan-dalan aku i pekken kan babo bages istanangku i Babel,

³⁰ningku mo, “Idah mo, mahantuna i kuta Babel! Aku ngo memajek i gabè induk kuta kerajaenku lako kibuktiken kuasa bak kegegohenku, kinimahangga bak kebelgahenku!”

³¹Sinderrang mak dèng pul aku mengerana terdengkoh mo sora i langit nai, “Alè Raja Nebukadnezar, dengkohken mo ènda! Enggo ibuat kuasa raja bamu nai.

³²Iliplip mo kono bai jelma mbellang nai, janah nggelluh rebbak dekket binatang-binatang i jampalen. Dukut mo panganenmu sidekkah pitu tahun codi bagè lembu. Enggo kessa i iperketuhu ko mo magahken Dèbata Sintèmbul i ngo merkuasa meradepken kerajaen jelma janah iberrèken ngo kerajaen idi bai barang isè sambing sinipilihna.”

³³Ipas kejapkenna i, saut mo masa sinidokkenna idi. Aku, si Nebukadnezar iliplip mo bai jelma mbellang nai janah menggagat dukut codi bagè lembu. Dagingku itaptapi hembun, bukku gabè nasa geddang buk-buk keliki, janah sesèlungku gabè nasa geddang sesèlu manuk-manuk.

³⁴Enggo kessa salpun tikki sipitu tahun i, kutarè mo mi langit, nai balik mo aku satdar. Nai kupoji mo Dèbata Sintèmbul kalohon i. Kupoji janah kupesangap ngo Ia singgelluh soh sidekkah-dekkahna. “Dèbata ngo gabè raja soh mi sidekkah-dekkahna. Merkuasa ngo ia soh seggen.

³⁵Oda merlapaten bangsa-bangsa sini dunia èn. Dèbata ngo mengerajai malaèkat i sorga dekket pengisi dunia. Sada kalak poda ndorok mengalo sinidokkenNa, oda lot kalak mboho mengkusoken kadè sinibahanNa.”

³⁶Tikan enggo kessa satdar aku balik, nai ipesuang mo balik baku kebelgahen, kemahanggaen dekket ketermurmuren kerajaenku. Ioangken karina pugabèngku dekket karina simersangap mo aku, janah iolihken mo aku balik mengkunduli kerajaenku, baliksa tupèh gabè makin belgahen nola kemahanggaenku daripada sienggona.

³⁷Asa bagèndari pè, aku si Nebukadnezar memoji, mengoangken dekket pesangapken Raja Sinisorga. Selloh janah sènteng ngo karina pemakinNa, janah ndorok ngo Ia peteruhken kalak simengulaken tunggang.