Read Batak Dairi Daniel 6 Bible Online

Daniel 6 - Batak Dairi bible

Daniel 6

¹Enggo kessa kenna bunuh si Belsyazar, irampasi si Darius kalak Media mo tampuk kerajaen idi. Merumur ennempuluh dua tahun mo ia ibas katika i.

²Ibagi si Darius mo kerajaenna idi gabè siratus duapuluh propinsi janah gennep ngo i iperèntah sada kalak gubèrnur.

³Ipebangkit mo si Daniel, bak dua kalak nai sidèban lako memperdimata karina gubèrnur idi asa ulang irogiken raja i.

⁴Mènter ndor ngo taridah mendèen pengulanken si Daniel daripada karina gubèrnur bak mandur-mandur sidèbankenna i. Kernana i, sekel ngo raja i naing pebangkit kensa gabè perkuasa i suberri kerajaen i.

⁵Tapi mertaki ngo karina gubèrnur dekket mandur menulusi kesalahen si Daniel ipas ulaen pemerèntahen, tapi bagidi nola pè oda ngo merhasil kalak i, kerna setia janah bujur ngo si Daniel janah oda lot mengulaken lalè bahaenna barang mengulaken kesalahen barang kadè pè.

⁶Nai nina kalak i mo, “Pellin ipas simerperdemuen dekket agamana ngo kessa kita ndorok menjupai kesalahen si Daniel.”

⁷Nai laus mo kalak i rebbakken menghadep raja janah mendokken, “Alè Tuan nami Raja Darius, njuah-njuah mo Rajai soh sidekkah-dekkahna!

⁸Kami karina simengkebasi kerajaen Rajai, imo karina mandur, gubèrnur, wakil-wakil gubèrnur, dekket perpangkat sidèbanna, enggo sada taki lako mengidoken asa ibakinken Rajai surat perèntah sikennah uèen tuhu-tuhu. Naing mo nemmuken Rajai memerèntahken asa sidekkah tellupuluh ari sada kalak poda duèen pesakatken pengidoen taba sada kalak jelma barang pè dèbata, laènken taba Rajai sendiri. Barang isè mengelausi perèntah idi ambongenken mo mi bagasen liang singa.

⁹Kupido kami mo asa itèkkèn Rajai surat perèntah idi asa gabè hatoren Media dekket Persia idi siso ndorok icabut balik.”

¹⁰Nai itèkkèn Raja Darius mo surat perèntah idi.

¹¹Tikan idengkoh si Daniel kessa simasa i, balik mo ia mi bagesna. Merjendèla ngo bilikna sikan lotèng mendempakken mi Jerusalem. Janah cemmalna, mersodip ngo ia taba Dèbatana janah memojisa tellu kali sidari merkitè sujud i lebbè jendèla-jendèla simbuka i.

¹²Tikan idah musuh-musuh si Daniel kessa mo tupung mersodip ia taba Dèbatana,

¹³laus mo kalak i karina menghadep raja lako mengaduken si Daniel. Idokken kalak i mo, “Otang enggo itekken Rajai surat perèntah lako menggerra karina kalak sidekkah tellupuluh ari èn pesakatken pengidoen bai barang pai sembahen barang bai sada kalak jelma laènken taba Rajai sambing? Janah nola dèng ma, barang isè mengelausi perèntah idi kennah ambongenken mi bagasen liang singa?” Ialoi Raja i mo, “I ngo tuhu, janah enggo gabè hatoren Media dekket Persia perèntah idi siso ndorok nèngè icabut balik.”

¹⁴Nai nina kalak i mo taba raja i, “Ia si Daniel, sada kalak sibuangen i Juda nai, oda ngo iparduliken Rajai janah oda menuihken perèntah Rajai. Meratur ngo ia mersodip tellu kali sidari.”

¹⁵Mendengkohken idi gabè bonek janah roga mo raja i, gabè itulusi mo dalan lako paluahken si Daniel. Sakat bon ari dak ngo raja i merpikir-pikir dèng.

¹⁶Nai kessa i balik nola mo kalak i menghadep raja i janah mendokken, “Alè Raja nami, kennah ngo nemmuken èngèten Rajai magahken mengèkutken hatoren Media dekket Persia, oda ndorok obah-obahen perèntah sinibaing Rajai.”

¹⁷Dungna iperèntahken raja i mo asa itangkup si Daniel janah iambongken mi bagasen liang singa. Nina raja i mo taba si Daniel, “Katerra pè ipaluah Dèbata sinisembahmi mo kono.”

¹⁸Enggo kessa i igamparken mo sada batu mbellen i babah liang idi, janah icap raja i mo batu idi dekket cap kerajaen dekket cap nasa pengulu, gabè sada kalak poda lot ndorok paluahken si Daniel i singa-singa idi nai.

¹⁹Enggo kessa i balik mo raja i mi istana. Oda uè ia mangan barang pè iapoi. Janah terrus bernginkenna i ia oda ndorok meddem.

²⁰Njengkas kalohon dèng kèkè mo raja i janah rudu-rudu laus mi liang singa i.

²¹Soh kessa mi sidi, dilo-dilo mo ia merdengan sora ringgodoren, “O Daniel, naposo Dèbata singgelluh i! Ndorok ma ngo Dèbata sinisembahmi paluahken kono ipas singa-singa idi nai?”

²²Nai terdengkoh mo sora si Daniel mengaloi, “Njuah-njuah mo Rajai soh sidekkah-dekkahna!

²³Enggo ipasulak Dèbatangku malaèkatna lako mengkontam babah singa-singa idi gabè oda ikekadè kalak i aku. Ipaluah Dèbata ngo aku kerna ibettoh ngo oda lot kubaing kesalahen meradepkensa dekket meradepken Rajai.”

²⁴Sondel mo lolona ukur raja i janah iperèntahken mo asa ipedarat si Daniel ibas liang idi nai. Enggo kessa idalanken perèntah idi, taridah ma mo tuhu cituk pè oda lot ugahen si Daniel, kerna merketoken taba Dèbatana ngo ia.

²⁵Kessa i iperèntahken raja i mo orangna asa itangkup kalak sienggo mengaduken si Daniel. Nai rebbak mo kalak i dekket dukak-dukakna bak sinibages kalak i, iambongken mi bagasen liang singa idi. Madèng giam soh kalak i mi hatap liang i, enggo mo ijerngem singa-singa i kalak i janah mengereprep tulan-tulan kalak i.

²⁶Enggo kessa i itengesken Raja Darius mo surat mendahi karina jelma i gennep bangsa, marga dekket nasa perkataen nai i suberri dunia èn, “Tabè njuah-njuah!

²⁷Kuperèntahken taba karina kalak simerian i aur kerajaenku asa merkebiaren janah pesangapken Dèbata sinisembah si Daniel! Dèbata singgelluh i ngo ia soh mi sidekkah-dekkahna, soh seggen ngo Ia memerèntah. Oda harapen binasa kerajaenNa. Oda merkerri-kerrien kuasaNa.

²⁸Ia ngo maing njuah-njuah dekket paluahken, petupaken mujijad dekket kelengangen i langit bang pè i tanoh èn. Enggo ipaluah si Daniel, i jerngemmen singa singa nai.”

²⁹Bagidi mo si Daniel tong mengkunduli pangkat ndates sidekkah pemerèntahen si Darius dekket si Kores, kalak Persia idi.