Read Batak Dairi Daniel 7 Bible Online

Daniel 7 - Batak Dairi bible

Daniel 7

¹Tikan i sada berngin, i tahun perlebbè si Belsyazar gabè raja i Babel, datang mo nipi si Daniel janah idah ibas nipina i sada alaten. Kusuratken mo nipi idi janah alaten sikuidah idi bagèen mo ia: Menempul mo angin ndor i karina dèsa siualuh nai janah memaingken masa angin kaba-kaba i tengah laut.

³Nai kessa i moldep mo empat binatang mbellen kalohon i bagessen laè i nai, pejaè-jaè ngo rupa sisada bai sisada nai.

⁴Siperlebbè rupana bagè singa, tapi merkabeng bagè manuk-manuk rajawali. Tikan kunelnelli ia, mèter mberkat mo kabengna janah ntalkas; terpekèkè mo dirina mi babo janah cènder ipas dua nènèhna tosè bagè jelma, nai iberèken bana pikiren jelma.

⁵Binatang si peduaken rupana tosè bagè geppul. Cènder ngo ia ipas nènèhna podi, janah merembah tellu mpenggel tulan rusuk ikertep ibas èpenna. Kudengkoh mo sora mendokken tabasa, “Aci, pangan mo jukut sadikè buè dok atèmu!”

⁶Tikan tupung kudatè-datèken ia, moldep nola mo binatang sidèban. Rupana codi bagè biahat mermèrong-mèrong, tapi ibas gurungna lot kabeng manuk-manuk empat, janah empat ngo takalna. Meheji kalohon ngo ia idahen.

⁷Sinderrangna petengen-tengensa aku, moldep mo binatang pe-empatken. Mergegoh kalohon ngo ia janah mahantu bana merpengerri. Ireprep janah ilumlum ngo sinijerngemna i, dekket èpenna mbellen janah bagè mpihir bessi i, ninganna ilucaki mo iba-ibana. Laèn ngo ia ipas binatang siperlebbè i nai sipuluh ngo tandukna.

⁸Sintorna kudatèken tanduk-tandukna idi, sintempu mènter tubuh nola mo tanduk sidèban i kellang-kellangna. Kèdèk ngo ukum tanduk idi, tapi ndorok mengenjar janah mengerengkat tellu ibas tanduk siperlebbè idi nai. Lot ngo mata tanduk sikèdèk idi codi bagè mata jelma dekket babah tunggang mertukapkap.

⁹Sidekkahna pukpuk aku dak tunelnel, igamparken mo barang piga-piga tahta. Nai kundul mo Ia si nggelluh soh mi sidekkah-dekkahna i i babo sada ipas tahta-tahta idi nai. Mbulan janah mbersih bagè kapas pakèenNa dekket bukNa. TahtaNa bak daling-dalingna mergollah-gollah kerna dilah api,

¹⁰janah marir mo api i tahta idi nai. Merribu kalak mengkebasisa, janah merjuta kalak mercènderren i hadeppenNa. Kessa i itebenai mo runggu perhukumen, janah ibuka mo lapihen.

¹¹Sinderrangna kunelnelli ia, dak ngo dèng kudengkoh tanduk kèdèk idi merbual-gumerèdek. Kessa i ibunuh mo binatang peèmpatken idi, janah iambongken bangkèna mi api sampè melakus.

¹²Binatang-binatang sidèbanna enggo icabut kuasana, tapi iduè dèng ngo kalak i nggelluh soh mi tikki sienggo ibuhul.

¹³Ibas pengidahku bernginna i, kuidah ngo pana sada codi bagè jelma. Roh ngo ia ninganna ikulilingi hembun nai laus mendahisa singgelluh soh mi sidekkahna i janah ipetandaken tabasa.

¹⁴Iberèken ngo bana kesangapen dekket kuasa bagè raja, gabè karina jelma i segala bangsa, suku bangsa dekket perkataen tunduk bana. Hot ngo kuasana soh mi sidekkah-dekkahna, pemerèntahenna pè oda itombalingken.

¹⁵Bingung janah bulisah ngo aku ibaing alaten-alaten idi.

¹⁶Nai kujolmiti mo sada kalak si cènder i sidi janah kupido mo keterangen tersèngèt mi karinana simasa i. Nai ibagahken mo.

¹⁷Nina mo, “Si empat binatang raksasa idi imo empat kerajaen sinaing roh i tanoh èn.

¹⁸Tapi i jalo bangsa Dèbata Sintèmbul kalohon i mo hak lako mengerajai janah hot ngo kerajaenna i soh mi sidekkah-dekkahna.”

¹⁹Kessa i naing ngo dok atèngku bettohenku lapaten binatang sipe-empatken i, sikalih rupana bai sidèbankenna i nai; simaing mengerri janah simengkeriken bak mengelumlum sinisorona merkitè sisèlu tembagana dekket èpen bessina i, bak mendedohi iba-ibana.

²⁰Naing ma ngo dok atèngku bettohenku tersèngèt sisipuluh tanduk ibas takalna dekket tersèngèt tanduk kèdèk simoldep nola ninganna memerkat tellu i tanduk siperlebbè idi nai. Mermata jah merbabah ngo tanduk sikèdèk i janah merbabah dak toal mergudekdek. Tengngamen dèng ngo ia daripada tanduk-tanduk sidèbanna i.

²¹Tikan kudatèken ia, mergeraha ngo tanduk i mengalo bangsa Dèbata janah menaluken kalak i.

²²Kessa i roh mo Ia singgelluh soh sidekkahna i memerèken keputusen pemenangken bennar ngo ummat Dèbata Sintèmbul kalohon i. Enggo dapet katikana kalak i menjalo kuasa lako memerèntah.

²³Enda mo keterangen si jupa aku, “Bin- atang sipe-empatken i imo kerajaen peem- patken sinaing cènder i tanoh èn janah lègan ngo i daripada kerajaen sidèbanna. Isalpuni janah i lumlum kerajaen idi ngo karina tanoh èn janah mendedohi sitadingna.

²⁴Tanduk sisipuluh idi imo raja sisipuluh sinaing memerèntah kerajaen idi. Nai kessa i nola moldep mo sada kalak raja sidèban; merbèda kalohon ngo ia tarapken raja-raja siperlebbè i, janah italuken ngo tellu kalak raja.

²⁵Mongkam mo ia mengalo Dèbata Sintèmbul kalohon i janah menèndes bangsa Dèbata. Iusahaken ia ngo mengobah pati-patien dekket pèsta-pèsta agama bangsa Dèbata, janah irajai ngo kalak i sidekkah tellu sitengah tahun.

²⁶Nai runggu mo pengadilen sorga janah mencabut kuasana janah menalpunisa.

²⁷Iberèken mo karina kuasa dekket kesangapen tanoh en bai bangsa Dèbata Sintèmbul kalohon i. Oda merpunca kuasa kalak i memerèntah janah karina simerkuasa silot i tanoh èn mersembah janah tunduk taba kalak i.”

²⁸Bagidi mo sakatna sukuten ènda. Bulisah kalohon ngo aku sanga mbettak, tapi bai isè poda lot kubagahken tersèngèt karinana idi.