Read Batak Dairi Daniel 8 Bible Online

Daniel 8 - Batak Dairi bible

Daniel 8

¹I tahun petelluken pemerèntahen Raja Belsyazar, kuidah nola mo alaten peduaken.

²Ibas alaten idi kuidah mo pana aku i propinsi Elam, i Susan, induk kuta Persia. Cender ngo aku i gembar Laè Ulai,

³janah taridah mo i biding laè i sada biri-biri tonggal dua tandukna nggeddang, sada narih nggeddangen janah terrimbaruen daripada sisada nai.

⁴Kuidah mo biri-biri tonggal i menambih menuju mi kesunduten, utara dekket selatan. Sada poda lot binatang tahan mengalosa barang mpellut ibas kuasana nai. Lemmo atèna ngo ibahanken janah jukkat ngo ia.

⁵Sintorna kunelnelli tabasa, taridah nola mo sada kambing tonggal lojang-lojang kan kesunduten nai memellus tanoh èn. Nderras kalohon ngo perlojangna sanga oda nè dais nènèhna mi tanoh. I kellang-kellang matana sidua i lot ngo sada tanduk njontil.

⁶Ijolmiti kambing tonggal i mo biri-biri tonggal sikuidah i biding laè i, ninganna mengelentemsa ganas kalohon.

⁷Kudatèken ngo ia mengalo biri-biri tonggal idi. Gasa-gasaen ngo ia sampè menendeng biri-biri tonggal i janah kipenggelken tandukna duana. Oda mergoldè biri-biri tonggal i lako mengalo. Njerbem mo ia mi tanoh i janah idedoh-dedohi, janah sada kalak poda lot ndorok mengurupisa.

⁸Makin muat mbelgahna ngo kambing tonggal i. Tapi enggo kessa tondel dates kuasana, ntalpek mo tandukna si mbellen i, nai tubuh nola mo empat tanduk jaè-jaè i bekkas i, gennep menuduh mi bekkas pejaè-jaè.

⁹Ipas sada tanduk idi nai tubuh nola ma mo tanduk kèdèk, gabè mbelgah kalohon janah kuasana makin rarat mi selatan, mi kebincaren dekket mayak mi tanoh simerandal.

¹⁰Makin muat mbelgahna mo tanduk idi soh tuk gegohna lako mengalo tenterra sorga imo bintang-bintang, janah lot tah piga dèba iambongken mi tanoh janah idedoh-dedohi.

¹¹Sanga ngo iasangi pakalima tenterra sorga, pettadiken pèlèen sinipèlèken gennep ari sinisembahken taba pakalima idi, dekket mengerumpakken bages pemojien tabasa.

¹²Nai itebenai kalak sinisidi mo mengulaken dosa janah oda nèngè memèlèken pèlèen sinitentuken. Asa enggo iambongken mi tanoh i pemojien bennar. Merhasil ngo tanduk i ibas karina bahanna.

¹³Kessa i kudengkoh mo sada kalak malaèkat mendokken taba sidèban, “Sadikè dekkah mo ndia karina sitaridah ibas alaten idi mertahan? Soh ndigan mo ndia dosa mbellen i menggancihi pèlèen sigennep ari? Soh ndigan mo ndia tenterra sorga bak bages pemojien idi idedoh-dedohi?”

¹⁴Kudengkoh mo malaèkat sisada nai mengaloi, “Sakat soh 1.150 ari nai. Sidekkah i mo oda nèngè ipèlèken pèlèen ciboen dekket pèlèen siceggen. Kessa i nola pè asa ipesuang balik bages bekkas pemojien.”

¹⁵Tikan kuoji lako mengeradumi lapaten alaten idi, sintempu mèter cènder mo i lebbengku bagè rupa jelma.

¹⁶Kudengkoh mo sora dilo-dilo i kepar Laè Ulai nai, mendokken, “Alè Gabriel, peterrang mo bana alaten siniidahna idi.”

¹⁷Nai ijolmiti Gabriel sicènder i lebbengku i mo aku. Gabè mbiar kalohon mo aku, dungna jemba mo aku. Idokken Gabriel i mo taba aku, “Alè jelma simangko-angko, kennah bettohenmu ngo ukum alaten idi imo tersèngèt punca jaman.”

¹⁸Sinderrangna mengerana idi ia, pangsan mo aku. Tapi ijèmak janah iurupi mo aku balik cènder. Nai nina mo,

¹⁹“Bagahenkenku mo bamu kadè sinaing masa seggen kerna laga Dèbata. Kerna alatenmu idi menuduhken simasa i punca jaman.

²⁰Biri-biri tonggal siniidahmi, simertanduk dua i, imo menggombarken kerajaen Media dekket Persia.

²¹Kambing tonggal i imo menggombarken kerajaen Junani, janah tanduk siturah i kellang-kellang matana idi imo rajana perlebbè.

²²Empatna tanduk si moldep enggo kessa ntalpek tanduk perlebbè i, merlapaten ukum kerajaen Junani terbagi- bagi nola mo gabè empat kerajaen, tapi sada poda bagè gegoh kerajaen perlebbè idi.

²³Mayak pengujungi kerajaen-kerajaen idi, mula enggo kessa tondel kejahaten, mbangkit mo sada raja perkata sada, janah pandè mengoto-ngotoi.

²⁴Gabè mergegoh kalohon ngo ia, tapi oda kumernaken kegegohenna sendiri. Ia ngo pesempaken kinimago ntengam janah barang kadè sambing iulaken dak ngo merhasil. Iago ngo kalak simerkuasa dekket bangsa Dèbata.

²⁵Kerna ncardik ngo ia, merhasil ngo pengoto-ngotoina. Ipegegah mo dirina, janah oda pella lot merboa-boa ia lako mengago jelma mbellang. Baliksa mboho ngo ia mengalo Raja Simahantu kalohon i. Tapi isalpuni mo ia oda pella merkitè kegegohen jelma.

²⁶Alaten tersèngèt pèlèen ciboen dekket siceggen sienggo kupeterang i bamu, tuhu-tuhu ngo i masa. Tapi ndekkah dèng ngo asa masa i karina i ari luas; asa ulang sukutken barang bai isè pè.”

²⁷Kessa i ndalmeh mo kuakap nai mersakit mo aku tah piga ari dekkahna. Enggo kessa i kèkè mo aku janah balik mengulaken karina ulaenku bai raja. Tapi bulisah ngo aku memikirken alaten-alaten idi janah oda ndorok mengeradumisa.