Read Batak Dairi Daniel 9 Bible Online

Daniel 9 - Batak Dairi bible

Daniel 9

¹Tahun perlebbè pemerèntahen si Darius kalak Media, anak si Ahasweros i kerajaen Babel, menjaka bukku-bukku agama mo aku, si Daniel. Kuradum-radumi mo mengèkutken pendokken JAHOWA taba Nabi Jeremia, ukum kuta Jerusalem tong ngo kennah terulang sidekkah pitupuluh tahun.

³Nai mersodip mo aku mertuhu-tuhu taba JAHOWA Dèbata, janah mengido masèh atèna. Merpuasa mo aku janah memakè kaèn goni janah dogok i babo cirabun.

⁴Kutepetti mo karina dosa bangsangku bai JAHOWA Dèbatangku. Ningku mo, “Alè JAHOWA Dèbata, termurmur ngo ko janah kupersangapi kami ngo Ko. Dak ngo ipahèi kono bagah-bagahMu janah ipetuduh kono ngo kelleng atèMu simenettap i bai kalak simengkekelengi kono dekket simengulaken kadè sinidokkenmu.

⁵Enggo merdosa kami, enggo jahat per- ulaen nami, janah mengulaken kesalahen. Enggo mertemboh janah mengelausi perèntahMu kami bagi ma menurimpang ibas pati-patienMu nai.

⁶Oda kudengkohken kami nèngè sora nabi, naposoMu idi, sienggo mengerana merkitè gerarMu taba raja-raja nami, bai karina pengulu, empung nami dekket bai karina bangsa nami.

⁷Alè JAHOWA, dak sènteng ngo pemakinMu janah ntèger, tapi dak perohken kememalu ngo kami bai diri nami, imo kami simerian i Judea dekket i Jerusalem dekket karina kalak dengan nami sada bangsa sienggo nipesomparbaèrkenmu mi nagerri sindaoh dekket njolmit kerna oda setia kalak i taba kono.

⁸Enggo iulaken karina raja nami, karina pengulu bak empung nami kememalu janah enggo merdosa taba kono, alè JAHOWA.

⁹Dom masèh atè janah merpemuati ngo ukurmu, tukasi pè kami enggo mengalo kono.

¹⁰Oda ngo kudengkohken kami soraMu, alè JAHOWA Dèbata nami, tikanna idokken kono kami merpengelako mengèkutken pati-patien sienggo iberèken kono bai nami tarapken nabi-nabi, naposoMu idi.

¹¹Karina Israel enggo mengelausi pati-patienMu janah oda uè mendengkohken soraMu. Merdosa ngo kami taba kono, janah kerna i ngo ipesempa kono bai nami sempetta sitersurat ibagasen Bukku si Musa, naposoMu idi.

¹²Sènteng ngo pemahanmu bagè sienggo niperbagahmu bai nami dekket bai karina perkuasa nami. Enggo ngo ihukum kono Jerusalem mposien daripada kuta apai sambing pè sinidunia ènda.

¹³Karina nasa olpek sitersurat ibagasen Patien si Musa enggo ipesempa kono taba kami. Tapi tukasi pè bagidi, alè JAHOWA Dèbata nami, dak tong dèng ngo kami menonja lako pesennangken ukurMu. Dak tong ngo kami oda uè menadingken dosa-dosa nami janah oda uè mendatèken karina peddahMu.

¹⁴Ukum kono, alè JAHOWA Dèbata nami, enggo ihukum kono kami dekket olpek sienggo ikebbasi ko kin; dak sènteng janah ntèger ngo pemakinMu, tapi oda kudengkohken kami soraMu.

¹⁵Alè JAHOWA, Dèbata nami, enggo ipacidah kono kuasaMu merkitè memabai bangsaMu mbungkas i Mesir nai, janah dak ièngèt dèng ngo kuasaMu idi. Enggo merdosa kami janah mengulaken kesalahen.

¹⁶Enggo isampati ko kami arnia, kumarna i ulang nè mo melaga ko bai Jerusalem, kutaMu i sendiri, urukMu simbadia i. Kumernaken dosa nami dekket kejahaten empung nami, nai karina kalak sikuliling nami pis matana meradepken Jerusalem dekket midah bangsaMu.

¹⁷Alè Dèbata nami, dengkohken mo sodip bak pengidoenku. Pesuang mo balik bagesMu sienggo isalpuni i, pekkadè mo balik asa karina kalak memettoh pellin kono ngo Dèbata.

¹⁸Dengkohken mo kami, alè Dèbata, tatap mo kami janah datèken kinimpersah nami bak perncèda kuta sinigegolen merkitè gerarMu. Mersodip kami taba kono oda ngo kumerna merandal sikubahan kami, tapi kerna permasèh atè mbuè ngo kono.

¹⁹Alè JAHOWA, dengkohken mo kami, merpemuati mo ukurmu bai nami, datèken mo kami janah kebbas mo kono ndor! Ulang mo pedekkah-dekkah nè, asa karina kalak memettoh kono ngo Dèbata. Kerna milikMu merkemeddu ngo Jerusalem dekket bangsaMu.”

²⁰Pukpuk ngo aku mersodip janah menepetti dosangku bak dosa bangsangku Israel, ninganna mengidoken bai JAHOWA Dèbatangku lako pesuangken balik bagesNa simbadia i.

²¹Tikan mersodip i aku, kabang mo roh taba aku, Gabriel sienggo kuidah ibas alatenku siperlebbè i. Tikanna i mo katikana kalak pesakatken pèlèen ciboen.

²²Nai ipeterrang Gabriel i mo bagèen, “Alè Daniel, roh ngo aku lako mengurupi ko mengantusi alaten idi.

²³Tikan ipungkah kono mengido taba Dèbata iberrèken ngo alus. Roh ngo aku pesakatkensa kerna ngkelleng ngo atèna taba ko. Asa, dengkohken mo mendè sinderrang kupeterang lapaten alaten idi.

²⁴Pitu kali pitupuluh tahun imo tikki sinitetapken Dèbata lako paluahken bangsamu dekket kutamu simbadia i i dosa dekket kejahaten nai. Isasa mo karina dosa janah ipecèndek mo kesèntengen simenettap, asa gabè ntarar alaten dekket alamat idi, janah asa balik ipèlèken Bages JAHOWA Simbadia i bai JAHOWA.

²⁵Suratken mo janah radumi mo ènda: Salpun mo pitu kali pitu tahun, mungkah i tikki iruapken perèntah lako pejengjengken balik Jerusalem, sakat mi roh sada kalak èkuten sinipilih Dèbata. Sidekkah pitu kali ennempulu dua tahun ipekadè mo balik dalan-dalan bak parik kuta Jerusalem, tapi dom kepenjetten ngo ibas katika i.

²⁶Ipunca simasa i ibunuh mo èkuten sinipilih Dèbata, keppèken oda ngo ia mersalah. Nai roh mo tenterra sada raja simergegoh, isalpuni mo kuta Jerusalem dekket Bages JAHOWA. Punca jaman i roh codi bagè laè mengeraja merembahken perang dekket kememago, bagè sienggo itetapken Dèbata.

²⁷Ibahan Raja i mo perpadanen ntegguh taba nterrem jelma sidekkah pitu tahun. I pertengahen tikki i, ipettadi mo pepadaken pèlèen dekket pemèlèen. Kessai sada simaing mengerri-ngerri ibaing i mo i Bages JAHOWA sinigeraren Kejahaten simengagoken janah dak tong lot i sidi sakat soh tikkina janah hot lot i sidi soh mi tikki ia simemaing i sidi i iserpai kememago sienggo itetapken Dèbata bana.”