Read Batak Dairi Hosea 1 Bible Online

Hosea 1 - Batak Dairi bible

Hosea 1

¹Bagèen mo tennah siniberèken JAHOWA bai si Hosea anak si Beeri tikan kerajaen Juda peganci iperèntah Raja Uzia, si Jotam, si Ahas, bak si Hizkia janah kerajaen Israel iperèntah si Jerobeam anak si Joahas.

²Tikan perlebbè kalohon mengerana JAHOWA taba bangsa Israel tarapken aku, nina JAHOWA mo, “Alè Hosea, kabini mo sada kalak si nggèut merlangkah pilit, janah dukak-dukakmu pè bagèsa ma mo. Dos ngo bangsangKu dekket sinibagesmu idi; oda ngo setia kalak i taba Aku janah itadingken ngo Aku.”

³Nai kukabini mo sada kalak daberru mergerar si Gomer berru si Diblaim. Enggo kessa itubuhken ia dukak nami buka baju, sada dukak daholi, nina JAHOWA mo taba aku,

⁴“Bakin mo gerar anakmu idi si Jizreel kerna oda ndekkah nè Kuhukum mo raja Israel kumernahken pemunuhen sinibaing si Jehu empung kalak i i Jizreel. Kudungi mo pemerèntahen pemparen si Jehu.

⁵Ibas katika idi kusalpuni mo kegegohen tenterra Israel i Lembeng Jizreel.”

⁶Nai itubuhken sinibagesku nola mo dukaknami peduaken, sada berru. Nina JAHOWA mo taba aku, “Alè Hosea baing mo gerar berrumu idi ‘Siso Nimasèh atèen’, kerna oda nèngè masèh atèngku midah bangsa Israel, janah oda nèngè kuampuni kalak i.

⁷Tapi masèh ngo atèngku midah bangsa Juda. Aku JAHOWA, Dèbata kalak i, paluahenku mo kalak i tapi oda merkitè geraha, oda merkitèken peddang barang panah barang kuda bak simengkundulisa.”

⁸Enggo kessa sirang susu dukak nami sipeduaken i, berrat-berrat rumah nola mo sinibagesku nai itubuhken sada dukak daholi.

⁹Nina JAHOWA mo taba aku, “Baing mo gerar anakmu idi ‘Oda BangsangKu’, kerna oda ngo bangsangKu kalak Israel, janah oda Dèbata kalak i Aku.”

¹⁰Gabè bagè buè kersik i laut mo bangsa Israel, gabè mak nè ndorok ikira barang pè ibilang. Bagèndari pè nina Dèbata ngo taba kalak i, “Oda ngo bangsangKu kènè”, tapi dapet nèngè mo katikana dokenkenna taba kalak i, “Aku ngo Dèbata singgelluh i janah dukak-dukakKu ngo kènè!”

¹¹Pepulungenna nola mo mengolihi bangsa Juda dekket bangsa Israel. Ipebangkit kalak i mo sada kalak pengendeng, janah meppar bana nduma nola mo kalak i i nagerrina. Tuhu-tuhu ngo ari Jizreel gabè ari mbellen!