Read Batak Dairi Hosea 10 Bible Online

Hosea 10 - Batak Dairi bible

Hosea 10

¹Codi bagè kayu anggur siratraten buahna ngo Israel. Makin tambah kinibèakna, makin mi buèna langgaten ibahan. Makin nduma, makin merandalna ma mo ibahan mejan-mejan sembahen sinisembahna.

²Karina kalak i simerperukuren tunggang idi, bagèndari kennah ngo ia gemongken dosana. Igeppui Dèbata mo langgaten kalak i, janah mengerumpakken mèjan-mèjan sembahen kalak i.

³Oda ndekkah nèngè dokenken kalak i mo, “Oda lot rajanta kerna oda merkebiaren kita midah JAHOWA. Kadè mo gunana sada kalak raja banta?”

⁴Merkata bual ngo kalak i janah memaing jandi palsu bak mengkelcing padan siso merguna. Iputar balikken ngo hukum dungna mertubuhen mo hukum siso nteger codi bagè suan-suanen simeracun i juma sienggo ipangkuri.

⁵Buradan mo pengisi kuta Samaria; bonek janah tangis mo kalak i bak imam-imam simengkebasi lembu emmas si ni Betel idi kerna enggo mersep karina kinihangga sembahen kalak idi.

⁶Ibantun mo sem- bahen kalak i mi Assur mahan luah bai raja sitermurmur i. Ipèkut-èkut Israel ngo taki simemaingken kememalu dekket kinilèa bai kalak i.

⁷Lako salpun mo Samaria janah ibantun rajana codi bagè sempenggel kayu ianun laè.

⁸Irumpakken mo karina Bages pemèlèen silot i uruk Betel bekkas kalak Israel memèlè gana-gana. Merturahen mo dori bak dukut i langgaten kalak i. Nai pingko-pingko mo kalak i taba delleng-delleng, “Tam- busi mo kami!” dekket taba nasa uruk-uruk, “Dendenni mo kami!”

⁹Nina JAHOWA mo, “Kessa nai kin simasa i Gibea, oda ngo mentadi kalak Israel me- ngulaken dosa mengalo Aku. Kerna i i Gibea pè sempa ma mo geraha bai kalak i.

¹⁰Kujuhap mo kalak simerdosa i, janah menghukum kalak i. Mersada mo bangsa-bangsa lako mengalo kalak i, janah hukumen mo kalak i kerna dosa-dosa kalak i simbuè i.

¹¹Arnia codi bagè lembu anè-anè ngo Israel terlatih mendè, janah ngkasah mengerrik pagè. Oda pella perlu kuampèken gurpang i babo tengkukukna simerandal idi. Tapi ukum bagèndari enggo Kutetahken lako kipaksa ia lako mahan bahaen mberrat. Kupasulak mo Juda memangkur balik, janah Israel Kupasulak mengelotok.

¹²Ningku mo, ‘Alè Israel! Bahan mo juma rembaru bamu, ennahken mo bennih ketegerren, janah perrani mo pasu-pasu sinibuahken kelleng atèmu tuhu-tuhu baKu. Kerna, enggo katikana kono menulusi Aku, JAHOWAmu. Roh nè mo Aku janah mendurusken pasu-pasungKu bamu.’

¹³Tapi sungkar-sungkarna nola ngo iulaken kono; kejahaten ngo itulusi ko janah merani siso ntèger. Enggo ipangan kono buah sinihasilken luapmu.” Nina JAHOWA nola dèng ma, “O kènè alè bangsa Israel, kerna iasangken kènè ngo kurèta-kurèta perang ndènè bak lahlahna soridadu-soridadu ndènè,

¹⁴nai sempa mo geraha bai ginemgem ndènè, janah icèdaken mo karina bèntèng ndènè. Codi ngo simasa i bagè arinkenna Raja Salman menalpuni kuta Bet-Arbel tupung geraha, dekket mengelicat partua ibages bak dukak-dukakna.

¹⁵Bagidi mo sinaing masa taba kènè, alè pengisi Betel, kerna enggo iulaken kènè keja- haten mbellen. Tikan permbincar mataniari, karangkenna i enggo kessa geraha itebenai, matè mo raja ndènè.”