Read Batak Dairi Hosea 11 Bible Online

Hosea 11 - Batak Dairi bible

Hosea 11

¹Nina JAHOWA mo, “Kelleng ngo atèngku taba Israel mungkah kèdèk nai ia Kudiloi ngo anakKu i mbungkas i Mesir nai.

²Tapi makin Kutenggoi anakKu idi makin ipedaoh ngo dirina baku nai. Iembah ngo pèlèen janah menutung dahupa bai Baal dekket dèbata-dèbata sidèbanna.

³Keppè Aku ngo mangajari Israel merdalan, janah mendakepsa merdengan kelleng. Aku ngo pehèdu-hèdukensa tapi oda uè ia mengakukensa.

⁴Ibagasen karinana kelleng atèngKu, Kupejolmit ngo ia mi gembarKu. Karina sitahanenna Kupenahang, janah merkitè mbuas ukurku Kuberrè ia mangan.

⁵Oda ngo uè kalak Israel i balik taba Aku, kerna i kennah mo kalak i balik mi Mesir, janah bangsa Assur mo mengerajai kalak i.

⁶Jibu mo geraha soh mi bagasen karina kuta kalak i, ipencèdaken mo pèntu-pèntu pengkeruhen, janah iripasken mo bangsangKu. Masa ngo i kerna pengèla-ngèla ukur kalak i sendiri,

⁷janah mertahan lako menondalken Aku. Nai tertèndes mo kalak i, tapi oda lot paluahken kalak i tukasi pè tenggo-tenggo kalak i mengido pengurupien.”

⁸Nina JAHOWA mo, “Alè Israel, oda harapen Kubelli barang pè Kutadingken ko. Patut kin mo dok atèmu Kuripasken kono bagè si Adma? Barang pè Kubakinken bagè si Zeboim? Oda mpihir ukurKu memaingken bagi, kerna bagi belgah atèngKu bamu!

⁹Oda ngo hukumenKu kono ibas perpungur lagangKu; oda nèngè ngo Kuagoken kono. Kerna Dèbata ngo Aku, oda ngo jelma. Aku, Simbadia, mendengani kono, janah oda nèngè uè aku melaga taba kono.”

¹⁰Nina JAHOWA mo, “Ekutenken bangsangKu ngo Aku mula merngengngeng Aku bagè singa janah memaingken buradan musuh kalak i. Ndor nè mo roh bangsangKu i kesunduten nai lako menembah Aku.

¹¹Roh mo kalak i i Mesir nai bagè perndor manuk-manuk ngkabang, janah roh i Assur nai bagè nuhnuhen ndarapati. Nai embahenKu mo kalak i balik mi bages kalak i. Aku, JAHOWA ngo simendokken i.”