Read Batak Dairi Hosea 12 Bible Online

Hosea 12 - Batak Dairi bible

Hosea 12

¹Nina JAHOWA mo, “Icingkoi bangsa Israel ngo Aku merkitè luap dekket akkal-akkal; dak tong ngo bangsa Juda me- ngalo Aku, Dèbata Simbadia janah setia.

²Karina siniulaken kalak Israel mungkah ceggen nai soh berngin oda merguna janah dak-dak mengagoken sambing bagè angin kebincaren. Muat ntahatna ngo keluhlahen bak kejahaten i tengah-tengah kalak i. Merpadan ngo kalak i dekket Assur janah merembah minak mi Mesir sikira tanda persupan-supanen.”

³Lot ngo perkara JAHOWA meradepken bangsa Juda; hukumenna mo Israel kerna pekilako kalak i. Balesenkenna ngo pemahan kalak i.

⁴Mungkah ibas kurungen manik nai, enggo icekihi si Jakob empung kalak idi i si Esau dengnganna leppa i; janah enggo kessa mbelgah, mergumpil ngo si Jakob dekket Dèbata.

⁵Mergumpil ngo ia dekket sada Malaèkat, janah mennang ngo ia. Nai tangis ia janah mengidoken asa ipasu-pasu. Kessa i nola i Betel, roh ngo Dèbata mendahi si Jakob empungta idi, janah mengerana i dekketsa.

⁶Dèbata idi imo JAHOWA Pergegoh Sisotercodi. Gerarna imo JAHOWA. Merkitè gerar idi ngo Ia merhendak asa roh kalak mersembah tabasa.

⁷Kumerna i, alè kènè pinempar si Jakob, tok mo kènè taba Dèbata ndènè janah balik mo tabasa. Nggelluh mo kènè ibagasen dom kelleng dekket kebujuren, janah sobar mo kènè memèma barang kadè naing ba- kinen Dèbata bai ndènè.

⁸Nina JAHOWA mo taba bangsa Israel, “Jukkat ngo kènè codi bagè kalak Kanaan; nggèut ngo mengoto-ngotoi saudagar ndènè taba sipenokor merkitè dacing siso selloh.

⁹‘Otang bèak ngo kita bagèndari,’ nina kalak i. ‘Merlaba ngo kita! Sada kalak poda ndorok menukas bèak kita merkitè dalan siso selloh.’

¹⁰Tapi Aku, JAHOWA Dèbata ndènè, simerembah kènè mbungkas i Mesir nai, memaing kènè merian nola ibas sapo-sapo bagè arnia sinderrangna roh Aku mendahi kènè i padang gurun.

¹¹Enggo kudokken taba nabi-nabi, janah memerèken mbuè alaten taba kalak i. Merkitè kalak i ngo Aku memagahken barang kadè sura-surangKu bai ndènè, bangsangKu,

¹²tapi bagidi nola pè dak tong dèng ngo lot menembah gana-gana i Gilead, janah memèlèken lembu i babo langgaten i Gilgal. Tapi kalak simenembah gana-gana i kennah matè ngo, janah gabè pulguken batu i juma-juma mo langgaten-langgaten sini Gilgal i.”

¹³Mperrus ngo si Jakob empungta i mi Mesopotamia, nai asa dapetten sinibages, gabè hamba ndèba mo ia i sidi dekket mermakan biri-biri kalak i.

¹⁴Ipasulak JAHOWA ngo sada kalak nabi lako mengarak kalak Israel mbungkas i perhambaen Mesir nai, dekket lako menjamotken kalak i.

¹⁵Enggo melaga kalohon JAHOWA ibaing kalak Israel; patut ngo hukumen kalak i kumerna kejahaten kalak i. Ihukum JAHOWA mo kalak i kumarna ulah-ulah kalak i gabè ileai jelma Ia.