Read Batak Dairi Hosea 13 Bible Online

Hosea 13 - Batak Dairi bible

Hosea 13

¹Arnia ipesangap ngo marga Efraim, asa mula lot kessa perèntah bai marga idi nai, mbiar ngo marga-marga sidèban i Israel. Tapi merdosa ngo marga Efraim kerna menembah Baal, kerna i mago mo ia.

²Soh bagèndari ngo kalak Efraim i pukpuk dèng mengulaken dosa; iteppa kalak i ngo gana-gana ibas pirak nai mahan sembahen — gana-gana sinirencanaken pikiren jelma janah ibahan tangan jelma. Nina kalak i ngo, “Pèlèken kènè mo pèlèen bai gana-gana ènda!” Lègan, isanggoh jelma gana-gana anak lembu!

³Kerna i mersep mo kalak i codi bagè remmang barang hembun siceggen. Tosè bagè apa-apa ngo kalak i sinisempul angin i pengeriken pagè, dekket bagè cèmber ruar ibas cerobong nai.

⁴Nina JAHOWA mo, “Aku ngo JAHOWA Dèbata ndènè, simerembah kènè mbungkas i Mesir nai. Oda ngo lot Dèbata sidèban bai ndènè laènken Aku. Pellin aku ngo kessa paluahken kènè.

⁵Aku ngo menjamoti kènè i tanoh ngkersang i padang gurun.

⁶Tapi enggo kessa merbekkas kènè i nagerri merandal, janah bessur bak puas iakap kènè, gabè jukkat ngo kènè bana mengelupaken Aku.

⁷Kerna i Kujerngem mo kènè bagè penjerngen singa. Tosè bagè biahat Kuambat mo kènè i dalan.

⁸Juhapenku mo kènè bagè pemaing geppul sikembalangen anak-anakna. Kusegga-segga mo kènè. Tosè bagè singa bagidi mo Aku menjerngem kènè i bekkas ndènè, janah bagè binatang penoro bagidi mo Aku mencapcapi kènè.

⁹Kugeppui mo kènè alè bangsa Israel! Janah isè mo ndorok mengurupi kènè?

¹⁰Ipido kènè ngo raja bak pengendeng, tapi idikè ngo kalak i karina bagèndari? Terbaing kalak i ngo paluahken ginemgemmu?

¹¹Merdengan laga Kuberèken ngo raja bai ndènè, janah merdengan nggettem Kutarik ngo kalak i balik.”

¹²Nina JAHOWA mo, “Enggo ngo isuratken dosa bak kesalahen Israel, janah ipennep ngo suratna idi.

¹³Lot ngo tikki iberèken bai Israel lako nggelluh, tapi soh mo motona kalak i dungna oda ipergunaken tikki idi. Tosè bagè anak mbara ngo ia sinempas nai asa tubuh tapi oda uè karuar ibas kandongen inangna nai.

¹⁴Oda nèngè paluahenKu bangsa ènda ipas kuasa banua terruh nai. Alè kematèen perarat mo sakit si roh bamu idi nai! Ulaken mo bahanmu lako menalpuni idi! Oda nèngè masèh atèngku taba bangsa ènda.

¹⁵Tukasi nola pè nduma Israel tosè bagè dukut luyun, tengesenKu mo angin kebincaren nggara i padang gurun nai. Ikerrahi angin idi mo takal laè dekket sumur, dungna gabè mersep mo karina simaharga.