Read Batak Dairi Hosea 14 Bible Online

Hosea 14 - Batak Dairi bible

Hosea 14

¹Kennah hukumen ngo Samaria kerna memberontak mengalo Aku. Mermatèen mo ginemgemna tupung geraha; ilicati mo anak mbarana, janah itaka mo beltek daberru-daberru si mengkandong.”

²Balik mo kènè taba JAHOWA Dèbata ndènè, alè bangsa Israel! Dosa ndènè ngo memaingken kènè tersundalih janah tergempang.

³Balik mo kènè mendahi JAHOWA janah dokken mo sodip ènda sikira pèlèen ndènè tabasa, “Alè JAHOWA, sasa mo karina dosa nami, janah jalo mo sodip nami ènda, nai pojien nami mo kono bagè sienggo kujandiken kami.

⁴Oda ngo ndorok Assur paluahken kami, janah kuda perang pè oda ngo ndorok mengurupi kami. Oda nè pè kudokken kami taba gana-gana sinibahan tangan nami mendokken idi nola dèbata nami. Alè JAHOWA, ikekelengi kono ngo kalak siso lot isè ndorok terasangken kalak i.”

⁵Nina JAHOWA mo, “Kualeng mo balik bangsangKu sienggo menurimpang i janah Kukekelengi ibas nasa ukurku nai; oda nèngè mo Kulagai kalak i.

⁶Tosè bagè udan ngo Aku meradepken kalak Israel simemernekki tanoh ndagal. Muat kembangna mo kalak i codi bagè bunga dekket bagè sempènur mbages uratna.

⁷Nggelluh mo kalak i janah muat tambahna codi bagè suan-suanen mertunas barang idikèna, tosè bagè kayu zaitun merandalna baungkus tosè bagè kayu sempènur!

⁸Balik nola mo kalak i taba Aku janah merian ibagasen pengkelungkumingKu. Ndor ngo kalak i muat merkèkèna, tosè bagè pagè si turah i juma si nggabur tanohna dekket bagè pekken anggur ma. Termurmur ngo gerar kalak i tosè bagè laè anggur Libanon.

⁹Ipatakken kalak Israel mo gana-gana sinisembahna; Kupehèdu-hèdu mo kalak i janah Kuuèi sodipna. Tosè bagè kayu dak ntemtem bulungna lenggemmenKu mo kalak i. Aku ngo benna nasa pasu-pasu bai kalak i. Aku, JAHOWA, ngo mendokken i.”

¹⁰Katerra pè karina mo kalak simpantas mengarusi kadè sitersurat i sènda, janah memperdimatakensa. Bennar ngo karina peddah pengajari bai JAHOWA nai, janah kalak bujur nggelluh mengèkutken karina peddah idi. Tapi ukum kalak perdosa oda isuihken i dungna tersundalih mo ia janah tergempang.