Read Batak Dairi Hosea 3 Bible Online

Hosea 3 - Batak Dairi bible

Hosea 3

¹Idokken JAHOWA mo taba aku, “Laus nola mo kono janah ririt mo sada kalak daberru si uè merlangkah pilit. Kekelengi mo ia codi bagè Aku mengkekelengi kalak Israel tukasi pè itadingken kalak i Aku janah menembah dèbata-dèbata sidèban ninganna kucul memèlèken kuè damar taba sem- bahen i.”

²Nai kugarar mo sipuluh lima kèpèng pirak dekket 150 kilo pagè lako memuat daberru idi.

³Kudokken ngo bana kennah ipèma aku narih ndekkah. Sidekkahna i oda ndorok ia merlangkah pilit barang merkendangen, janah aku pè oda menjolmitisa.

⁴Bagidi ma mo carana bang bangsa Israel pè; ndekkah kalohon ngo kalak i oda lot rajana barang pè pengendengna, oda lot pèlèen barang pè mèjan-mèjan keramat, oda lot sembah-sembahen barang pè kajimat simemagahken rusia i ari podi.

⁵Tapi roh mo katikana balik bangsa Israel taba JAHOWA Dèbata kalak i, dekket mendahi raja kalak i ibas pemparen si Daud nai. Nai merkebiaren janah hormat mo kalak i taba JAHOWA, ninganna menjalo pasu-pasuNa.