Read Batak Dairi Hosea 4 Bible Online

Hosea 4 - Batak Dairi bible

Hosea 4

¹Lot ngo perkara JAHOWA merimbangken pengisi nagerri ènda. Alè Israel, dengkohken mo kadè sinidokkenNa, “Oda lot i nagerri èn kesetiaen barang pè kelleng, janah pengisina oda mengakui Aku Dèbata.

²Merbulaban ngo kalak i, tapi oda ipahèi kalak i; merluap ngo kalak i, memunuh, menangko, dekket merlangkah julu meddem. Kejahaten mertambah, janah masa pembunuhen pegancih-gancih.

³Kumarna i gabè ngkerrah mo nagerri èn, janah matè mo karina singgelluh i sidi. Sagumanna matcam bagè binatang i langit, sinitanoh dekket i laut, radas mo karina.”

⁴Nina JAHOWA mo, “Kènè alè imam-imam, ulang mo lot kènè menalahken barang pè mengelagai bangsangKu, kerna kènè ngo siKusalahken!

⁵Mahar ari berngin ngo kènè memaing kesalahen, bagidi ma ngo nabi-nabi. Kumarna i Kuripasken mo Israel, inang ndènè idi.

⁶Ukum kènè imam imam oda ngo iparduliken kènè nè Aku, nai bangsangKu pè oda nè ma mo ipaduliken Aku dungna cilaka mo kalak i. Itulak kènè ngo karina peddahKu. Jadi, Aku pè Kutulak ma mo kènè, janah dukak-dukak ndènè pè oda Ku akkui nè gabè imam-imamKu.

⁷Makin tambah bilangen ndènè, makin muat merdosana ngo kè taba Aku, alè kènè imam-imam! Kerna i obahenKu mo perrejekien ndènè: Oda nèngè mo ipesangap dèba kènè, baliksa ilèai dèba mo.

⁸Gabè bèak ngo kènè kerna dosa bangsangKu, kerna i sèkel ngo kènè asa pukpuk kalak i merdosa.

⁹Nai ndersa mo akapen ndènè tosè bagè jelma nterrem! HukumenKu mo kènè rembang mi pengelako ndènè.

¹⁰Ipangani kènè mo pèlèn pèlèen sinipèlèken, tapi dak tong ngo kènè melèhè. Ipèlè kènè mo sembahen simemerèken kinigabè, tapi lalap ngo pengisi ndènè oda lot mertambah, kerna enggo itadingken kènè Aku lako menembah dèbata-dèbata sidèban.”

¹¹Nina JAHOWA mo, “Kènè alè bangsangKu, enggo mago keboien ndènè merukur sènteng ibaing anggur sienggo ndekkah bak anggur rembaru.

¹²Mengido ajar ngo kènè kan simpenggel kayu nai. Tongket sada ngo memagahken bai ndè kadè sinaing bettohen ndènè! Codi ngo kènè bagè sada kalak sinibages si gabè merlangkah julu meddem; itadingken kènè ngo Aku janah isohken kènè diri ndè taba dèbata-dèbata sidèban.

¹³I karina bekkas pemèlèen gana-gana i babo uruk bak ipucuk delleng, ipèlèken kènè ngo pèlèen, janah menutung dahupa i terruh kayu mbellen janah ntemtem i sidi kerna melenggem bekkas idi. Tapi kadè ngo alina? Gabè perkendangen mo berru ndènè janah merlangkah julu meddem purmaèn ndènè!

¹⁴Tapi oda ngo Kuhukum ulah-ulah kalak i, kerna kènè sendiri pè laus ngo mendahi daberru sibabijalang simengula i bages bekkas-bekkas pemèlèen idi, janah rebbak ngo kènè dekket kalak i memèlèken pèlèen bai dèbata sidèban. Asa tuhu ngo rana simendokken bagèen: ‘Mago mo bangsa siso lot pengantusinna tersèngèt Dèbata.’

¹⁵O kènè alè kalak Israel, oda ngo setia kènè taba Aku! Tapi, harap ngo Aku ukum Juda oda mengulaken kesalahen sibagidi! Ulang kènè memèlè i Gilgal barang pè i Betel. Ulang mo kènè merbulaban i sidi merkitèken gerar JAHOWA singgelluh i.

¹⁶Ukum kènè alè kalak Israel, mpihir kalohon ngo perukuren ndènè! Bakunè kin mo Aku ndorok mermakani kènè bagè biri-biri i jampalen?”

¹⁷Enggo terpikat bangsa Israel ibaingken gana-gana. Kerna i belli mo kalak i bagidi.

¹⁸Enggo kessa mabuk kalak i kerna mbuèsu mènum anggur, merlangkah pilit mo kalak i merlolo atè. Lemmoen ngo atè kalak i ilèai daripada ipesangap.

¹⁹Kerna i mersep mo kalak i bagè sinisempulken angin. Kennah termèla mo kalak i kerna pèlèen-pèlèen sinipèlèken kalak i taba dèbata sidèban.