Read Batak Dairi Hosea 5 Bible Online

Hosea 5 - Batak Dairi bible

Hosea 5

¹Nina JAHOWA mo, “Dengkohken mo, o kènè alè imam-imam! Perdateken mo kènè alè kalak Israel! Dengkohken mo, kènè alè pinempar raja! Enggo idabuh hukum taba kènè. Kerna patutna ngo nemmuken kennah nteger mendabuh hukum, tapi balikna kènè nola ngo enggo gabè jebbak i Mizpa, codi bagè jarat i Delleng Tabor,

²janah codi bagè geddung mbages i Sitim. Kumara i hukumenKu mo kènè karina!

³Kubettoh ngo karinana tersèngèt diri ndènè, alè Israel! Oda lot sindorok irusiaken kènè barang kadè pè ukum bangKu. Isembah kènè ngo gana-gana, janah oda nèngè setia taba Aku. Kerna i, oda patut nèngè orang-orangmu menembah Aku.”

⁴Kejahaten siniulaken kalak Israel ngo memaingken kalak i oda nèngè ndorok balik taba Dèbata kalak i. Enggo ngo iorgohi pemèlèen taba gana-gana i kalak i, gabè mak nèngè ipaduliken kalak i JAHOWA.

⁵Ntarar ngo taridah kegegahen bangsa Israel, janah gabè bukti kesalahen kalak i. Dosa kalak i ngo memaingken kalak i tertuktuk janah geppah, janah dekket ngo bangsa Juda tergempang rasken dekket kalak i.

⁶Laus ngo kalak i menulusi JAHOWA merkitè merembah biri-biri bak lembu mahan pèlèen, tapi karinana ngo i oda merguna. Kerna enggo itadingken JAHOWA kalak i, janah oda jupa kalak i nè ia.

⁷Oda ngo setia kalak i taba JAHOWA; oda ngo dukakna dukak-dukak kalak i. Kerna i oda ndekkah nèngè isalpuni mo kalak i rebbak dekket karina juma kalak i.

⁸Sempul mo sarunè i Gibea! Persora mo tanda mendiloi mergeraha i Rama! Surakken mo lako mendokken geraha i Betel! Kebbas mo kè, kalak Benjamin, berkat mo mergeraha!

⁹Binasa mo Israel, kerna enggo dapet katikana lako menghukumsa. Dengkohken mo, alè ginemgem Israel, kennah masa ngo bagidi.

¹⁰Nina JAHOWA mo, “Melaga ngo Aku kerna enggo ijuhap pengulu-pengulu Juda kalak Israel janah mengerampasi tanohna. Kerna i kupesempa mo hukumen taba kalak i bagè pekiroh laè mengeraja.

¹¹Idersa mo Israel; bennè mo hakna tersèngèt tanohna, kerna dak ngo ijèngèngi mengido pengurupien bai kalak siso tellap mengurupisa.

¹²Kerna i ngo Aku mengago bangsa Israel, dekket mengeripasken kalak Juda.

¹³Satdar mo bangsa Israel dekket bangsa Juda ibas jèkat siroh bana i, nai laus mo Israel mendahi Assur lako mengido pe- ngurupien bai raja siterberita i nai. Tapi oda ngo tellap raja i mengurupi barang pè peliasken simasa bai kalak i.

¹⁴Bagè singa menjerngem, bagidi mo Aku menjuhap kalak Israel dekket Juda. Aku sendiri ngo menegga-negga kalak i, kessa i Kutadingken. Mula kusaran kalak i laus, sada kalak poda lot ndorok paluahken kalak i.

¹⁵TadingenkenKu mo bangsangKu sakat tondel kinipersuk kalak i kerna dosa-dosana, nai roh nola menulusi Aku. Tah bakunè kerna kinipersahna i, gabè itulusi kalak i nola Aku.”