Read Batak Dairi Hosea 6 Bible Online

Hosea 6 - Batak Dairi bible

Hosea 6

¹Nina kalak Israel mo, “Ita kè mo kita balik taba JAHOWA. Ia ngo memaing mbernit siakap, tapi Ia ma ngo si pejuahken. Ia mengugahi, tapi Ia ma ngo tong memalut ugahta idi.

²Ibagasen dua tellu ari èn pemalumenna mo kita, janah nggelluh mo kita ibas pengkelungkumiNa.

³Kerna i aci mo kita mertuhu-tuhu lako menandai JAHOWA. Pasti ngo ia roh mendahi kita codi bagè pekiroh mataniari mbincar, dekket codi bagè udan mendurusi tanoh èn ipunca mosin udan.”

⁴Tapi nina JAHOWA mo, “Alè Israel dekket Juda! Kennah bakunè ngo pana kubaing taba kènè? Ndor ngo mersep kelleng atè ndènè baku codi bagè remmang barang hembun siceggen.

⁵Kerna i ngo asa Kupasulak nabi-nabingKu lako pesakatken bai ndènè keputusenKu magahken kennah ngo hukumen kènè janah ibinasaken. Enggo ngo ntarar janah tangkas kadè sikupergeddo bai ndènè nai:

⁶Lemmoen ngo ètongenku itandai kènè Aku janah dak tong mengkekelengi Aku, daripada menutung bak memèlèken pèlèen kènè taba aku.

⁷Tapi codi bagè si Adam, ilausi kènè ngo jandi ndènè taba Aku.

⁸Ukum kuta Gilead imo kuta sinidomen perjahat bak pemunuh.

⁹Codi ngo imam-imam sinikuta i bagè sinuhnuhen penamun simengambat kalak pemellus. I dalan lako mi bekkas simbadia pè memunuh ngo kalak i! Isengaja kalak i ngo mengulaken karina kejahaten idi.

¹⁰Kuidah ngo simaing mengerri-ngerri i Israel: Ilamuni bangsangKu ngo dirina merkitè me- nembah dèbata sidèban.

¹¹Tersèngèt bagè kènè, alè kalak Juda, enggo ngo Kutiti arina lako menghukum kènè ma kumerna pemahan ndènè.”