Read Batak Dairi Hosea 7 Bible Online

Hosea 7 - Batak Dairi bible

Hosea 7

¹Nina JAHOWA ngo, “Gennep mertaki Aku lako pemalumken bangsangKu Israel dekket pesuangken kalak i balik, nai dak ngo pellin kejahaten bak dosa kalak i sambing Kuidah. Mersiakkalen ngo samah kalak i, ibengketti kalak i ngo bages ndèba lako menangko, janah menamun ngo kalak i i dalan-dalan.

²Oda nung tergerrek ibas pikiren kalak i èngètenKu ngo karina kejahaten idi. Tapi ibaluti dosa-dosana ngo kalak i gabè ntangkas kalohon Kuidah.”

³Nina JAHOWA mo, “Merkitè akkal-akkal dekket perulaen jahat ngo sinterrem i lako pesennangken ukur raja bak pengulu-pe- ngulu ibas karajaen.

⁴Penelbuh ngo kalak i karina janah kalak siso setia. Codi bagè api sini ketaring ngo gogo atè kalak i oda igergerri simemahan roti mella makdèng hantar nditak sinisakkorna lako tutungen.

⁵Ipas ari pèsta raja i, ibakin kalak i ngo raja i bak simerpangkat mènum anggur soh mabuk dekket mengulaken ulaen moto. Dungna mersennang-sennang mo raja i rebbak dekket karina penelbuh idi.

⁶Codi bagè api ibas ketaring bagidi ngo niat jahat bak laga kalak i merngetnget ibagasen ukur suntuk berngin, janah siceggenna merdeggup gabè api lakat mengelekup.

⁷Ibagasen penemboh lagana, ibunuh kalak i mo pengulu-penguluna. Karina raja kalak i enggo peganci ibunuh. Tapi tukasi pè enggo bagi merohana simasa i, sada kalak poda lot mersodip taba Aku lako mengido tolong.”

⁸Nina JAHOWA, “Mersada arih ngo bangsa Israel dekket bangsa-bangsa i sikuliling kalak i, dungna enggo codi kalak i bagè roti ntasak serrapen.

⁹Oda satdar kalak i magahken kumerna perarihenna dekket bangsa-bangsa idi nola ngo, makinken mago kegegohen kalak i. Enggo ndessing punca nggelluh kalak i, tapi laju oda satdar kalak i.

¹⁰Ntarar ngo taridah kinitunggang kalak Israel janah gabè bukti kesalahen kalak i. Tukasi pè enggo masa idi karinana, tong ngo oda itulusi kalak i Aku barang pè balik taba Aku, JAHOWA Dèbata kalak i.

¹¹Misèn mi sadoi ngo Israel codi bagè ndarapati moto. Lebbèken ipido orang-orangna mo pengurupien taba Mesir, kessa i nola mperrus mendahi Assur!

¹²Tapi gennep mentas kalak i, Kutogong mo banto janah menangkup kalak i tosè bagè kalak menangkup manuk-manuk. Hukumenku mo kalak i kumerna kejahaten kalak i sienggo Kubettoh.

¹³Merjaya mo kalak i, kerna enggo itadingken kalak i Aku. Mago mo kalak i kerna enggo ialo Aku. Sèkel ngo aku paluahken kalak i, tapi palsu ngo pemojien kalak i taba Aku.

¹⁴Oda ngo tuhu-tuhu kalak i mersodip taba Aku. Mula mersodip kalak i, itulpasken kalak i mo dirina mi pedemmen, janah derru-derru bagè pemaing kalak siso percaya taba Aku. Mula mersodip kalak i mengido pagè barang pè anggur, itorihi kalak i mo dagingna bagè pemakin kalak simenembah sembahen. Sandok tuhu-tuhu ngo kalak i mengalo Aku!

¹⁵Tukasi pè Aku ngo pebelgah-belgahken bak memerèken gegoh bai kalak i, bagidi nola pè mersada taki ngo kalak i mengalo Aku.

¹⁶Dak ngo kalak i tong mengèkutkn dèbata-dèbata siso lot kuasana idi. Oda ngo terharapken kalak i tosè bagè baor mbèluk. Tunggang ngo permongkam pengulu-pengulu kalak i, kerna i ibunuh pedang mo kalak i, janah itaba-tabai kalak Mesir.”