Read Batak Dairi Hosea 9 Bible Online

Hosea 9 - Batak Dairi bible

Hosea 9

¹Alè bangsa Israel, ulang mo dak pèstaken nèngè ari-ari raya ndènè bagè bangsa-bangsa sidèbanna i. Enggo itadingken kè Dèbata ndènè janah oda nè setia tabasa. I gennep bekkas pengerriken pagè ngo, idèa kènè diri ndènè gabè sibabijalang bai Dèbata Baal, janah lolo menjalo pagè siniètong ndè upah sembahen idi bai ndènè!

²Tapi oda ndekkah nèngè kurangen pagè bak minak zaitun mo kènè janah kerri mo bak anggur ndènè pè.

³Ukum kènè, alè bangsa Israel, oda nè mo menettap kè merian i tanoh siniberèken JAHOWA bai ndènè. Kennah balik ngo kè mi Mesir, janah kipangan pangaen samur i Assur.

⁴I karina nagerri i mak nè ndorok kè memèlèken anggur bak pinakan lako pesennangken ukur JAHOWA. Gabè samur mo karina kalak sikipangan pangaen ndènè, codi bagè pangaen sinipangan tikan kerja penguburen. Pellin pebessurken beltek ndènè ngo kessa merguna pangaen idi; cituk poda lot ndorok embahen mi Bages JAHOWA mahan pèlènken i sidi.

⁵Tupung ari raya agama lako pesangapken JAHOWA, oda ndorok kènè memaing barang kadè pè lako memèstakensa.

⁶Mula sempa kessa olpek idi, janah iembah kènè mi nagerri sidèban, nai sitadingna dèng bai ndènè nai pepulungen kalak Mesir mo lako bunuhen dekket tanemmen i Memfis! Merturahen mo dukut bak dori menangkemmi karina persapoen dekket ugas-ugasen pirak ndènè simaharga i.

⁷Enggo dapet tikki perhukumen, tikki lako menjalo pemalessen kemulihken karina perulaen. Akapenken Israel mo idi! Idokken kènè ngo, “Moto ngo nabi siniianen tendi ènda! Gila ngo ia!” Idokken kènè bagidi kerna ceggo kalohon ngo ètongen ndènè midah aku janah mbelgah kalohon ngo dosa ndènè.

⁸Ipasulak Dèbata ngo aku sikira nabi lako pesèngètken kènè bangsaNa, tapi barang mikè pè aku laus, dak ngo kè mertaki lako menogongi aku bagè manuk-manuk. I nagerri Dèbata sendiri, imusuhi jelma nterrem ngo kami nabi-nabi.

⁹Jahat kalohon ngo ulah-ulah ndènè codi bagè sienggo nung ibaing dèba i Gibea. Ienget Dèbata ngo kesalahen ndènè, janah hukumenna mo kènè kerna dosa ndènè.

¹⁰Nina Jahowa mo, “Tikan mula-mula jupa Aku Israel lolo ngo Aku tosè bagè kalak sidapetten buah anggur i padang gurun. Tikan mula-mula Kuidah empung ndènè, sennang ngo Kuakap codi bagè kalak si mengidah hasil perlebbè buah kayu arana. Tapi, tikan laus kalak i mi Delleng Peor, ipungkah kalak i mo menembah Baal, dungna gabè samur mo kalak i codi bagè sembahen sinikekelengi kalak i.

¹¹Kebelgahen kalak Israel ngkabang bana mersep tosè bagè manuk-manuk; oda nèngè lot simengkandong, janah oda nè lot anak-mbara itubuhken.

¹²Tapi tukasi nola pè lot anak mbara tubuh janah ipebelgah-belgah buatenku mo kalak i; sada kalak poda duèenku nggelluh. Merjaya mo kènè alè bangsa Israel, mula kutadingken kè!”

¹³Alè JAHOWA, kuidah ngo dukak-dukak kalak i ijalang-jalang janah ibunuh.

¹⁴Kadè ngo ndia sipatut kupido baMu nai lako bai kalak idi? Baing mo nggempus daberru-daberru kalak idi! Baing mo kalak i oda ndorok pepènumken sikèdèk-kèdèkna.

¹⁵Nina JAHOWA mo, “Karina kejahaten kalak i mungkah i Gilgal nai. Isidi nai mo tebenna ceggo atèngku taba kalak i. Kumarna jahat perulaen kalak i, Kupelaus mo kalak i kan nagerringKu ènda nai. Oda nè mo masèh atèngku taba kalak i; karina pengulu kalak i enggo mengalo Aku.

¹⁶HukumenKu mo kalak Israel. Codi bagè suan-suaen siso merbuah mo kalak i, janah uratna pe enggo males. Oda nè mo merdukak kalak i; tapi tukasi pè merdukak kalak i, Kubunuh mo dukak-dukak sinikekelengen kalak idi i.”

¹⁷Itulak Dèbata sikukebasi i mo bangsaNa, kerna oda uè kalak i mendengkohkensa. Merap mo kalak i i tengah-tengah bangsa- bangsa.