Read Batak Dairi Joel 2 Bible Online

Joel 2 - Batak Dairi bible

Joel 2

¹Sempul mo sarunè, baingken mo sora tanda lot mara i uruk Sion simbadia i, bekkas Dèbata merian. Menggirgir mo kènè, alè pengisi Juda! Kerna enggo njolmit ari JAHOWA janah ndor nèngè mo roh.

²Gellap ngo ari i janah bulita, dom remmang ntengam. Merrohen mo soridadu balang tosè bagè hembun sangkem i babo delleng. Oda nung dèng lot masa bagidi, janah oda nèngè lot masa bagi soh mi sidekkah-dekkahna.

³Tosè bagè api mengelekkup dekket mengelakusken isalpuni kalak i ngo nasa suan-suanen. I lebbenkenna i, codi bagè Eden, pekken JAHOWA ngo nagerri i, enggo kessa i nola, dos bagè padang gurun ngkerrah. Kadè nè poda lot tading, isè poda lot maluah ibas pengkubu kalak i nai.

⁴Tosè bagè kuda ngo rupa kalak i; perlojangna pè codi bagè kuda i bekkas mersipak.

⁵Mangkat-mangkat ngo kalak i i pucuk delleng, sorana tosè bagè perkumeratak kurèta i pergerahaen dekket bagè perkeratak api mengelekkup rambah. Merbaris ngo kalak i codi bagè nuhnuhen pakalima simergegoh, si kebbas lako mergeraha.

⁶Tikan juhap kalak i, karina kalak buradan, karina kalak gabè mbettak janah melangan.

⁷Juhap ngo kalak i, tosè bagè permabang, janah menangkih pagar batu tosè bagè pakalima. Merbaris ngo kalak i mpènter mi jolo, oda lot menurimpang barang pè pepèolken dalanna.

⁸Oda ngo mersienjar-enjaren kalak i, hot ngo kalak i mengèkutken barisenna merdalan. Rebbak-rebbakken ngo kalak i kitumbur nasa pertahanen, oda ndorok terambaten barisen kalak i.

⁹Ikubu kalak i ngo soh mi bagasen kuta, janah merlojang arap pagar batu kuta i. Menangkih ngo kalak i mi bagasen gennep sapo; tosè bagè penangko, mbengket kalak i arap jendèla.

¹⁰Tikan kebbas kalak i juhap, dumegger mo tanoh èn, janah langit pè dumegger. Nai gellap mo mataniari dekket bulan, janah mèntep mo cuhaya karina bintang.

¹¹Bagè renggur ngo sora JAHOWA, memaingken boa-boa, taba karina tenterrana. Mahantu nai ngo buè soridaduna! Mahantu ngo gegoh soridadu simengulaken perèntahNa! Tengngam kalohon janah mahantu ngo Ari JAHOWA! Sada kalak poda ndorok mertahan.

¹²Nina JAHOWA mo, “Tapi bagèndari pè, balik mo kè taba Aku ibas nasa pusuh peratèen ndènè nai, ninganna merpuasa, derru-derru janah tangis.

¹³Ribaki mo penarihenmu janah ulang geddamu.” Balik mo ko mendahi JAHOWA Dèbatamu. Perlamlam ngo ia janah perkelleng atè selloh merukur janah dom masèh atè. Sennang ngo ukurna menasa dosa janah oda lemmo ètongenna pedalanken hukumen.

¹⁴Tah bakunè merpengulaki ukur JAHOWA Dèbatamu, janah memasu-masu ko nola dekket pasu-pasu mertinèncuk. Gabè ndorok nola mo ko pesakatken pèlèen anggur bak pagè bai JAHOWA, Dèbatamu.

¹⁵Sempul mo sarunè i Sion, delleng Dèbata, mongmongken mo ari merpuasa, petupa mo runggu sinunu.

¹⁶Petumpu mo karina ginemgem, dokken mo gennep bangsa mernuhnuhen. Dokken mo roh nasa situa-tua, anak-anak dekket bagi ma anak mbara. Bagi nasa sirembaru jejap pè kennah mo roh. Dokken mo kalak i menadingken bilikna.

¹⁷Dokken mo imam-imam simengkebasi JAHOWA, tangis i kellang-kellang langgaten dekket èmpèr kettan jolo, ninganna mendokken, “Masèh mo atèmu bai bangsaMu, alè JAHOWA; ulang mo belli milikMu gabè tikas,” gabè mengasangi nola bangsa-bangsa sidèban janah mendokken, “Idikè ma mo Dèbata kalak idi i?”

¹⁸Nai idatèken JAHOWA mo tanohNa, janah masèh mo atèna bangsaNa.

¹⁹Ialoi mo kalak i bagèen, “Bagèndari pè berèenkenKu mo karina bai ndènè: pagè, anggur dekket minak zaitun mahan pangaen, asa karina kènè ipebessur. Oda nè bellienku kènè ilèai barang pè itaba-tabai bangsa sidèban.

²⁰Pelausenku mo nuhnuhen balang siroh i utara nai, kualai mo dèba mi padang gurun. Kusessak mo barisen kettan lebbè mi Laut Matè, Kuenjarken mo barisen kettan podina mi Laut Tengah. Mbau mo karina bangkè-bangkèna. Kusalpuni mo kalak i kerna enggo idersa kènè.

²¹Ulang mo mbiar, kènè nasa juma, pesennang kè mo ukur ndè; èngèt mo karina simahantu sinibakin JAHOWA bai ndè!

²²O kènè karina binatang, ulang mo kènè roga. Karina jampalen bagèndari enggo balik meratah. Ratraten ngo karina kayu merbuah, saraten ngo buah anggur dekket buah kayu ara.

²³O kènè pengisi Sion, merlolo atè mo kè! Meroang-oang janah mersurak-surak mo kènè! Kerna karina mendè basa bai JAHOWA Dèbata ndènè nai. Cukup ngo iberèken udan bai ndènè tikan mosim ardangen. I mosim mbergoh icurahken ia ngo udan, bagima pè i mosim ruahen bagè sienggona.

²⁴Nai sin pagè nola mo balik bekkas pengerriken; mermariren mo anggur dekket minak zaitun i bekkas pengilangen nai.

²⁵Gancihenku mo karina kerogien ndènè tikan i tahunkenna balang kipangani hasil peranien ndènè. Kerna Aku ngo pasulakken nuhnuhen balang idi taba kènè.

²⁶Cukup mo pangaen ndènè janah bessur mo iakap kènè. Perbadiaen ndènè mo JAHOWA Dèbata ndènè kerna ipetupa ia ngo bai ndènè mbuè kelengangen. Oda nèngè mo gabè rèhè-rèhèen ndèba bangsangKu!

²⁷Nai satdar mo kè, alè Israel, magahken i tengah-tengah ndènè ngo Aku, janah Aku, JAHOWA, ngo Dèbata ndènè. Oda lot Dèbata sidèban, laènken Aku sendiri. Oda nè mo ipemèla dèba bangsangKu!”

²⁸“Enggo kessa i Kudomi mo seggen karina kalak dekket tendingKu. Nai pesakaten anak dekket berru ndènè mo karina tennahKu; dapetten nipi mo situa-tua silot i tengah-tengah ndènè iberrèken mo alaten taba anak perana bak simerbaju.

²⁹Ipas katika i Kuorèken mo tendingKu mi babo karina perkebbas daholi bak daberru.”

³⁰Kubaing mo mbuè kelengangen i langit bak i tanoh èn. Masa mo simbara-mbara, api mergollah dekket cember mergolong.

³¹Gabè gellap mo mataniari janah bulan pè gabè mbara tosè bagè daroh. Masa ngo idi karina sinderrang mak dèng dapet Ari JAHOWA, ari simahantu i!

³²Tapi barang isè mengido pengurupien bai JAHOWA, paluahenna ngo. Nina JAHOWA ngo, “Maluah ngo karina kalak siKupilih i Jerusalem.”