Read Batak Dairi Joel 3 Bible Online

Joel 3 - Batak Dairi bible

Joel 3

¹Nina JAHOWA mo, “Ipas katika idi pesuangenKu mo balik kininduma Jerusalem dekket Juda.

²Pepulungenku mo karina bangsa janah Kuembah mi Napa Perhukumen. Nai irungguken mo i sidi kalak i ibas kejahatenna meradepken bangsangKu kerna ipella-pellaken kalak i tanoh Israel janah ibuang kalak i bangsangKu mi merbagè nagerri.

³Tendung ngo idabuh kalak i barang isè merolihken kalak sitertaban. Ipendèai kalak i ngo simerbaju bak anak perana ibaing mahan hambana. Janah riar kalak i ipakkè lako mendahi sibabijalang dekket menum anggur.

⁴Naing ikekadè kènè ngo Aku dok atè ndènè, alè Tirus, Sidon dekket kènè karina aur Palestina? Naing ngo ko dok atèmu memalesken hellemmu taba Aku? Bagèndari pè, jalo mo pemalesKu sinaing ndor nè roh.

⁵Enggo irampas kono emmas dekket pirakKu, janah ibantun kono hartangKu simaharga mi bages pemèlèenmu.

⁶Ibantun kono ngo pengisi Juda bak Jerusalem ndaoh kan nagerrina nai; kessa i idèaken kènè taba bangsa Junani.

⁷Bagèndari pè embahenKu mo kalak i ruar kan gennep bekkas perdèaen ndènè nai, janah Kubalesken mo kejahaten ndènè meradepken kalak i.

⁸Dèaenku mo anak bak berru ndènè taba pengisi Juda, merdèaken nola taba kalak Syeba, nagerri sindaoh kalohon. Aku JAHOWA ngo simendokken i.

⁹Mongmongken mo boa-boa ènda mendahi karina bangsa: Karina mo kebbas lako mergeraha dekket lako mengadu gegoh! Kebbasi mo karina pakalima bak dubalang; pepulung mo karina soridadu, janah juhap mo!

¹⁰Teppa kènè mo mata bajak ndènè mahan peddang dekket raut penggonting ndènè gabè rencong. Bagi ma kalak sindalmèh pè kennah dokenkenna mo, ‘Ndorok ngo aku juhap tosè bagè soridadu!’

¹¹Aci, kettu mo ndor roh, o kènè karina bangsa silot i tanoh èn! Mertumpu mo kènè i lembeng adoi.” Alè JAHOWA, dokken mo soridaduMu mengkubu kalak i!

¹²Nina JAHOWA dèng ma, “Karina bangsa kennah kebbas janah laus mi Napa Penghukumen. I sidi mo Aku mengerungguken karina bangsa cibal baleng bangsangKu.

¹³Jahat kalohon ngo kalak i; tebbas mo kalak i bagè pemakinmu mi pagè sintasak i juma. Anjaki mo kalak i bagè anggur dom samè orè.

¹⁴Lot ngo merribu-ribu kalak i Napa Perhukumen. Kerna ndor nèngè mo i sidi dapet katikana Ari JAHOWA.

¹⁵Gabè gellap mo mataniari dekket bulan, janah oda nèngè mo mercuhaya karina bintang pè.”

¹⁶Merngaum mo sora JAHOWA kan Sion, i dellengNa nai; dumeggur mo soraNa kan Jerusalem nai. Dumegger mo langit bak tanoh èn kumernaken ia. Tapi dak tong ngo JAHOWA mengampini janah mengkelungkumi Israel, bangsaNa i.

¹⁷“Alè Israel, bagèndari pè bettohenmu mo, magahken Aku ngo JAHOWA Dèbatamu. Merian i Sion ngo Aku, dellengKu simbadia i. Nai gabè kuta simbadia mo Jerusalem, oda nèngè mo ibengketti kalak sidèban kuta i.

¹⁸Ipas katika i dom pekken anggur mo karina delleng. Menjampal mo binatang pakanen i uruk-uruk simeratah dukutna. Oda nè mo nung merkerri-kerrien laèna karina batang laè silot i Juda. Menjarir nola mo sada batang laè kan Bages JAHOWA nai, janah menaptapi Lembeng Akasia deket laè simelamlam.

¹⁹Gabè gurun sindagal nola mo ukum Mesir, janah gabè ndagal mo Edom, oda nè i iani dèba. Kerna enggo ikubu kalak i kalak Juda, janah memunuh pengisi nagerri siso lot salahna.

²⁰Kennah Kutuntut balesna kerna daroh kalak i, matè Kutebbas mo simemunuh kalak i. Tapi ukum Juda dekket Jerusalem dak ngo lot tong pengisina, janah dak tong ngo Kuiani Delleng Sion.”