Read Batak Dairi Amos 1 Bible Online

Amos 1 - Batak Dairi bible

Amos 1

¹Ukum si Amos imo sada kalak permakan biri-biri i kuta Tekoa nai. Mbangkit gabè nabi ia tikan iperèntah Raja Uzia nagerri Juda, janah Israel iperèntah Raja Jerobeam anak si Joas. Dua tahun tikan madèng masa rènur, ipacidah JAHOWA ngo bai si Amos tersèngèt Israel.

²Bagèen ngo nina si Amos, “Merngengngeng ngo JAHOWA i Delleng Sion nai, gumeruhguh ngo soraNa i Jerusalem nai. Jampalen-jampalen gabè dakkir, ngkerrah-kerring dukut i Delleng Karmel.”

³Idokken JAHOWA, “Enggo ngkatep merdosa pengisi Damsyik, kumarna i pasti kennah Kuhukum kalak i. Kejam kalohon ngo pemaing kalak i taba kalak Gilead,

⁴kumara i Kutengesken mo api mi istana Raja Hazael, janah kerri kulekkup bèntèng-bèntèng Raja Benhadad.

⁵Kucèdai mo pèntu-pèntu pengkeruhen Damsyik, janah Kuripasken karina pengisi Napa Awen i bekkas kalak i merian nai. Kupesusur mo raja Bet-Eden i tahtana nai, janah pengisi Siria itaban janah iembah mi nagerri Kir.”

⁶Idokken JAHOWA mo, “Enggo ngkatep merdosa pengisi Gaza, kumara i pasti ngo Kuhukum kalak i. Enggo ngo itaban kalak i rip sada bangsa, janah idèa gabè hamba taba kalak Edom.

⁷Kumara i Kutenges mo api mi pagar batu Gaza, janah mengelekkup kerri bèntèng-bèntèngna.

⁸Pengisi dekket perkuasa kuta Asdod bak Askelon Kupelaus karinana. Kuhukum mo kuta Ekron, janah karina kalak Palistin sitadingna dèng Kuripasken.”

⁹Idokken JAHOWA, “Enggo ngkatep merdosa pengisi Tirus, kumara i pasti ngo Kuhukum kalak i. Enggo ibuang kalak i rip sada bangsa, janah isohken taba Edom; enggo iosè kalak i padan persupanen.

¹⁰Kumara i Kutenges mo api mi pagar batu Tirus janah mengelekkup kerri bèntèng-bèntèngna.”

¹¹Idokken JAHOWA, “Enggo ngkatep merdosa pengisi Edom, kumara i pasti ngo Kuhukum kalak i. Oda meralang-alang kalak i menjuhap Israel, kaka-anggina i. Dakdak melaga ngo kalak i janah pukpuk merhellem.

¹²Kumara i Kutenges mo api mi kuta Teman, janah mengelekkup kerri bèntèng-bèntèng Bozra.”

¹³Idokken JAHOWA, “Enggo ngkatep merdosa bangsa Amon, kumara i pasti ngo Kuhukum kalak i. Sinderrang mergeraha lako pebelangken nagerri kalak i, ilapah kalak i ngo beltek daberru siberrat-berrat rumah i Gilead.

¹⁴Kumara i, Kutenges mo api mi pagar batu kuta Raba, dekket mengelekkup kerri bèntèng-bèntèngna. Ipas katika i terdengkoh mo sora gulut i pergerahaen janah masa mo geraha gaya-guyu bagè udan ndor.

¹⁵Raja dekket simerpangkat kalak i, itaban mi buangen. Aku, JAHOWA ngo si enggo mendokken i.”