Read Batak Dairi Amos 2 Bible Online

Amos 2 - Batak Dairi bible

Amos 2

¹Idokken JAHOWA, “Enggo ngkatep merdosa pengisi Moab, kumara i pasti ngo Kuhukum kalak i. Ilèai kalak i ngo Raja Edom sienggo matè i, merkitè mengurkuri pendèbanna janah mengamet tulan-tulanna dekket menutungisa gabè abu.

²Kumara i Kutenges mo api mi nagerri Moab dekket mengelekkup kerri bèntèng-bèntèng Keriot. Mermatèen mo kalak Moab tikan purpar geraha, ninganna isempul sarunè, dekket surak geraha idiungken.

³Raja Moab dekket karina perkuasa simemerèntah Kubunuh mo.”

⁴Idokken JAHOWA, “Enggo ngkatep merdosa kalak Juda, kumara i pasti Kuhukum kalak i. Ilalui kalak i ngo perèntahKu janah oda isarihken ajarKu. Ilalingken dèbata siso tuhu sinisembah empungna ngo kalak i.

⁵Kumara i Kutenges mo api mi Juda dekket mengelekkup kerri bèntèng-bèntèng Jerusalem.”

⁶Idokken JAHOWA, “Enggo ngkatep merdosa kalak Israel, kumara i pasti Kuhukum kalak i. Kalak ntèger siso terbaingsa mengulaken sinijualna, enggo idèa kalak i gabè hamba. Bagi ma ngo ulah-ulah kalak i taba kalak sincor siso tergararsa nèngè utangna, kasi pè utangna i pellin harga simpasang cipatu.

⁷Itèndes kalak i ngo kalak sindotè, janah ipelaus kalak sincor. Bapana dekket anakna mercampur mi sada daberru hambana, gabè maing mekemmer gerarKu simbadia.

⁸I gennep bekkas menembah JAHOWA, ipedemmi kalak i ngo baju gadè sinibuat kalak i mahan tahan utang kalak sincor. Iènum kalak i ngo i Bages JAHOWA, anggur siniametna bai kalak simerutang bai kalak i nai.

⁹Kasi pè bagi alè bangsangKu, lako bai ndènè ngo Kubinasaken kalak Amori, kalak nggeddang mbellen bagè kayu mpiangi janah ngkong bagè kayu èngul.

¹⁰Enggo Kuarak kènè karuar i Mesir nai, janah Kuteggu memellus padang gurun empatpuluh tahun dekkahna. Enggo Kuberèken tanoh kalak Amori bai ndènè gabè nagerri ndènè sendiri.

¹¹Enggo kupilih barang piga-piga kalak anak ndènè gabè nabi, dekket piga-piga kalak anak perana ndènè gabè Tegges. Otang tuhu ngo i alè kalak Israel? Aku JAHOWA ngo sienggo mendokken i.

¹²Tapi iberrè kè ngo kalak Tegges i mènum anggur, gabè memaing kalak i mengosè padan. Janah igerra kènè ngo nabi-nabi memagahken tennahKu.

¹³Bagèndari Kudohken mo kènè soh mi tanoh, asa mendeherreng kènè bagè kurèta pelpel merembah pagè.

¹⁴Sinderras lojang pè mak terbaingsa maluah; kalak mergegoh kebennèen gegohna, dekket kalak mahantu oda terpaluahsa dirina sendiri.

¹⁵Pemanah mada ndorok mertahan, sinderras merlojang mak terbaingsa mperrus; dekket penunggang kuda oda ndorok maluah.

¹⁶Tupung ari i soridadu simbohona kalohon pè menadingken senjatana, nai mperrus mo ia. Aku JAHOWA ngo enggo mendokken i.”