Read Batak Dairi Amos 3 Bible Online

Amos 3 - Batak Dairi bible

Amos 3

¹Dengkohken mo tennah JAHOWA èn alè bangsa Israel sienggo iarak JAHOWA karuar i Mesir nai! Idokken JAHOWA,

²“Ibas karinana bangsa sini dunia èn, pellin kènè ngo kessa bangsa siKutandai dekket Kuperdatèken. Kumernaken idi ngo asa mbelgah dosa ndènè, janah pasti ngo Kuhukum kènè.”

³Mungkin ngo ndia lot dua kalak laus merdalani tapi oda lebbè merarih?

⁴Lot ngo ndia merngengngeng singa i rambah kum madèng dapetsa panganenna? Merngengngeng ngo ndia anak singa i liangna, kum madèng lot itangkup barang kadè?

⁵Lot ngo ndia manuk-manuk isengkik tinali, kum oda itogong sambil? Lot ngo saip togong-togong, mula oda lot menggerrit sirimanina?

⁶Oda ngo menggirgir jelma i kuta mula mendengkoh sarunè tanda geraha? Lot ngo kuta kenna bencana, ukum oda itenges JAHOWA?

⁷Oda nung JAHOWA Sintèmbul i memaing barang kadè pè kum mak lebbè ibagahken rencanaNa i taba nabi-nabi naposoNa i.

⁸Mula merngengngeng singa, isè mo siso mbiar? Mula mongkam Dèbata JAHOWA, isè terbaingsa sip dekket oda memagahken tennahNa i?

⁹Tingtingken mo èn taba kalak simerian i istana Mesir dekket Asdod, “Tumpu mo kènè i delleng sinigembar Samaria, janah perdatèken kènè mo kegutturen mbellen dekket perkilangen sinibaing kalak i i sidi.”

¹⁰Idokken JAHOWA, “Isini kalak i ngo istana-istanana dekket barang sinikilangna merkitè kekejamen. Tuana dèng cituk poda ibettoh kalak i mengulaken ntèger.

¹¹Kumara i, ikubu musuh mo nagerri kalak i, italuken mo pertahanen kalak i, janah ipupusi mo istana-istana kalak i.

¹²Tosè bagè permakan pellin sempasang nèhè nai ngo kessa dapetsa balik, barang serrap coping biri-birina sinijerngem singa, bagidi ma mo pellin cituk nai ngo kessa nggelluh pengisi Samaria simerasa iakap galè-galè bagèndari i peddemenna ndamel i.”

¹³Idokken JAHOWA Pergegoh Sisotercodi janah Sintèmbul i, “Peratè-atèken mo bagèndari janah pesèngèt mo pemparen si Jakob.

¹⁴Tupung ari Kuhukum kalak Israel kumarna dosana, Kuhabisi mo langgaten-langgaten sini Betel. Gennep langgaten kennah ibohok puncana asa ndabuh mi tanoh.

¹⁵Bages mosin mbergoh dekket bages mosin leggo kennah Kurumpakken. Bages siniokir mergading kennah merumpak; karina bages mbellen kennah merentuh.