Read Batak Dairi Amos 4 Bible Online

Amos 4 - Batak Dairi bible

Amos 4

¹Dengkohken mo alè daberru-daberru Samaria sitambah nggomok bagè lembu tonggal i Basan! Itèndes kènè ngo jelma ndotè, iperroh kènè ngo jelma ncor, janah ipaksa kènè ngo asa ipèmaken sinibalè ndènè ènumen mperngis lako bai ndènè!

²Simbadia ngo Aku JAHOWA Sintèmbul i, enggo mo Kupadanken, iruah mo kènè merkitè ingkir-ingkir; karina mo kènè bagè ikan i mata kail.

³Iruah mo kènè dempak Hermon janah ikebbekken mi ruar, gennep arap lubang pagar batu sindessingna. Aku JAHOWA ngo sienggo mendokken i.”

⁴Idokken JAHOWA Sintèmbul i, “Alè bangsa Israel! Laus sambing mo kènè mi bekkas menembah JAHOWA i Betel janah ulaken mo dosa i sidi! Laus mo kènè mi Gilgal, janah ulaken mo dosa bakunè kessa mo katèmu! Memèlèken pèlèen mo kènè gennep ceggen, janah merembah sipersipuluh ipas karina cinarimu nai sikali tellu ari!

⁵Baing mo pèlèen roti sikira lias atèmu bangKu, janah bagi mo bualken kènè magahken enggo iembah kènè tambah sipèlèenken! Pasti idi ngo asa lolo kènè mengulaken!

⁶Aku ngo pesempaken kelèhèen mi karina kuta ndènè, tapi oda mulak kènè mendahi Aku.

⁷Kugerra ngo roh udan sinderrang iperluken suan-suanen ndènè laè. Kubaing mo roh udan mi kuta sisada, tapi kelegoen kuta sidèbanna. Juma sisada terolih udan darèdè, ukum juma sidèbanna kerrah kerring.

⁸I barang piga-piga kuta sienggo ndotè pengisina kumara muasen, menulusi laè mi kuta sidèban, tapi oda cukup laè sinisidi. Tukasi pè bagidi, lalap ngo oda mulak kènè mendahi Aku.

⁹Kusempulken ngo angin nggara dekket menengesken penakit mencèdai suan-suanen bak pekken-pekken anggur ndènè. Kayu ara bak batang zaitun ndènè enggo kerri ipangani ridap. Tukasi pè bagidi laju ngo oda mulak kènè taba Aku.

¹⁰Kutengesken mo uabba penakit bai ndènè bagè siKutenges mi Mesir. Kupatèken mo simatah daging ndènè tikan geraha, janah irampasi mo kuda-kuda ndènè. Kusini bangkè-bangkè mo perundung-undungen ndènè, bauna melekkis. Tukasi pè bagidi, laju oda balik kènè mendahi Aku.

¹¹Kuripasken mo kènè dèba bagè pengeripaskenKu bai Sodom bak Gomora. Singgelluhna dèng kènè tosè ngo bagè puntung sinibuat i api nai. Tukasi pè bagidi laju ngo oda mulak kènè mendahi Aku.

¹²Kumarna i alè bangsa Israel, Kuhukum mo kènè. Jadi merkebbas mo kènè mengadeppi hukumen sinaing Kusempaken bai ndènè!”

¹³Delleng dekket angin, JAHOWA ngo simenghanakensa; sura-suraNa ibagahken bai jelma manusia. Ibaing ngo mahar dekket berngin i babo pucuk-pucuk tanoh èn ngo Ia merdalan. JAHOWA Pergegoh Sisotercodi, idi ngo gerarNa.