Read Batak Dairi Amos 5 Bible Online

Amos 5 - Batak Dairi bible

Amos 5

¹Dengkohken mo alè bangsa Israel! Naing Kuendèken bamu sada endè melungun:

²Enggo talu Israel sitertatakken rambu-rambu i dèng, oda nèngè terbaingsa kèkè! Ibelli mo ia i babo tanohna sendiri, oda lot simengurupisa cènder mengolihi.

³Idokken JAHOWA Sintèmbul i, “Sada kuta i Israel pepadaken seribu kalak soridadu, tapi pellin seratus nai ngo kessa balik; kuta sisada pepadaken seratus kalak, pellin sipuluh nai ngo kessa balik.”

⁴Idokken JAHOWA mo taba bangsa Israel, “Mulak mo kènè mendahi Aku, asa nggelluh kènè.

⁵Ulang kènè laus mi Bersyeba lako mersembah. Ulang tulusi kènè Aku i Betel, kumarna lako salpun mo Betel. Ulang ma kènè laus mi Gilgal, kumarna naing itaban mo pengisi kuta i mi buangen.”

⁶Balik mo kènè mendahi JAHOWA, asa nggelluh kènè. Mula oda ngo balik kènè mendahisa, roh mo ia bagè api rarat lako mengelekkup kerri kalak Israel. Oda lot isè ndorok mengènteppi api idi i Betel.

⁷Merjaya mo kènè, kènè alè sipebalik-balikken ketègerren dekket simengerampasi hak ndèba!

⁸JAHOWA ngo menghanaken bintang-bintang i langit bintang perlambuk bak bintang Sendika. Iobah ngo sigellap gabè nterrang janah mahar gabè berngin; laè laut iorèken mi darat. Simemaing karinana idi, JAHOWA ngo gerarNa.

⁹Ibinasaken ngo kalak perkuasa rasken pertahanen kalak i.

¹⁰Nggogo ngo atè ndènè midah simengalo siso adil dekket simendokken situhuna i perhukumen.

¹¹Itèndes kènè ngo kalak sincor, janah irampasi kènè pagèna. Kumara i oda ianen ndènè bages ndènè merandal sienggo ipajek kènè i. Oda ènumen ndènè anggur i pekken anggur sinisuanen ndènè nai.

¹²Kubettoh ngo bakunè belgahna kejahatenmu dekket bakunè buè dosamu. Itèndes kènè ngo kalak simerpengelako mendè; ijalo kènè ngo sisip janah ibelli kènè ngo kalak sincor ipekellah-kellih i perhukumen.

¹³Kumernaken ulah-ulah ndènè bagidi, gabè lotien mo iakap kalak bijak sip sambing tikala masa kejahaten sibagidi.

¹⁴Usahaken kènè mo memaing simerandal janah ulang bahanken jahat, asa nggelluh kènè. Nai tuhu-tuhu mo merian i tengah-tengah ndènè Dèbata JAHOWA Pergegoh Sisotercodi bagè sinidokken ndènè i.

¹⁵Kecegoken mo kejahaten, kekelengi mo simerandal, janah pecèndek mo ketègerren. Katerra pè giam masèh atè JAHOWA midah bangsa Israel sitadingna dèng.

¹⁶Idokken Dèbata JAHOWA Pergegoh Sisotercodi i ngo, “Tangis milangi mo kalak janah dak kekelsohen i dalan kuta kumarna mellui. Kalak peruma-uma pè idiloi mo asa dekket tangis rasken kalak siniupahen lako menangisi simatè.

¹⁷I karina pekken anggur, tangis milangi mo jelma kumarna roh Aku janah menghukum kènè. Aku, JAHOWA ngo mendokken i.”

¹⁸Tuhu-tuhu merjaya mo kènè simengketedohken ari JAHOWA! Kadè gunana ari i bai ndènè? Ai pellin merumangken ari gellap ngo ari i, oda ngo ari nterrang bai ndènè.

¹⁹Rumangna tosè bagè kalak mperrus bai singa nai, tapi simbak nola dekket geppul. Barang bagè kalak simolih mi bages, nai itongkelken mo tanganna mi dingding, keppè mèter itebbi nipè!

²⁰Tuhu ngo mengkerohken sigellap ngo ari JAHOWA, oda ngo nterrang gondem bana mehèjem.

²¹Idokken JAHOWA, “Nggogo janah moyang ngo atèngku midah pèsta-pèsta agama ndènè!

²²Mula iembah kènè pèlèen situtungen dekket pèlèen pagè, oda ngo Kujalo i. Oda uè aku menjalo pinakan-pinakan ndènè singgomok-nggomok i sinipèlèken ndènè bangKu mahan pèlèen perdamèen.

²³Pettadi mo endè-endèmu simenelkingi i; oda uè Aku mendengkoh sora kucapimu.

²⁴Lotien ngo usahaken asa marir ketègerren i bagè laè janah kepènterren bagè laè siso nggèut marsak.

²⁵Alè bangsa Israel, sinderrang Kuteggu kènè memellus padang gurun sidekkah empatpuluh tahun, oda nung Kupido persembah barang pèlèen bai ndènè nai.

²⁶Tapi bagèndari isembah kènè ngo si Sakut siniètong ndènè raja ndènè i, dekket Kewan, bintang sinisembah-sembah ndènè i. Kumara i kennah kènè sendiri mo merembah mèjan-mèjan sinibahan ndènè i.

²⁷Sinderrang Kubuang kènè mi sada nagerri daohen dèng asa Damaskus. Aku JAHOWA Simergerar Dèbata Pergegoh Sisotercodi ngo sienggo mengeruapken i.”