Read Batak Dairi Amos 6 Bible Online

Amos 6 - Batak Dairi bible

Amos 6

¹Merjaya mo kènè singgelluh mersennang-sennang i Sion, dekket kènè simengerasa mènak i Samaria — kènè alè simpantas niasè bangsa Israel simahantu i; kènè sincemmal kin dak idahi jelma nterrem lako mengido pengurupien.

²Laus mo kènè menengen Kalne, nai puspusken kènè mo merdalan mi kuta Hamat simbellen i, nai nola mi kuta Gat i kuta Palistin. Idokdok kènè ngo merandalen kuta i daripada kerajaen Juda i Israel? Belangen ngo aur kalak i daripada aur ndènè?

³Ijèngèngi kènè ngo mendokken, ndaoh dèng ngo asa dapet ari olpek i, keppèken ulah-ulah ndènè pellin pedorken dapet ari kekejamen i.

⁴Merjaya mo kènè sigalang-galang i peddemmen ndalmuk dekket merpèsta kipangani jukut lembu dekket biri-biri bajar dèng!

⁵Lolo ngo kènè mengarang endè bagè pemaing si Daud, janah ikucapiken kènè mo endè-endè idi.

⁶Iènumi kènè mo anggur sienggo iarirken dom i galas nai, janah iminakken kènè mo minak simerandalna, tapi oda ngo bonek ukur ndènè midah persalpun Israel.

⁷Kumara i kènè ngo perlebbè kalohon iembah mi buangen. Mentadi mo pèsta-pèsta dekket pertamuèen ndènè.

⁸Teggas ngo ibaing Dèbata JAHOWA Pergegoh Sisotercodi janah Sintèmbul i sipesèngèt èn, “Nggogo ngo atèngku midah kegegahen bangsa Israel; oda lemmo atèngku mengidah istana-istana kalak i simèbah i. Kusohken mo bai musuh kuta sabungen rasken karina silot i bagasenna.”

⁹Mula lot dèng sipuluh kalak nai ciboni ibas sada bages, matè ma mo bang kalak i.

¹⁰Roh mo sada kalak kadè-kadèna lako mengurus penguburenna, janah idokong mo mi ruar bangkè kadè-kadèna i. Idiloken mo taba jelma silot i podi bages i, “Lot dèng ngo ndia nggelluh laènken kono?” Nai terdengkoh mo pengaloina, “Oda lot!” Idokken kadè-kadèna simengurus penguburen i mo, “Ulang nè ko mengerana! Oda ndorok sigerari gerar JAHOWA.”

¹¹Enggo kessa iperèntahken JAHOWA, irumpakken mo bages mbellen dekket kèdèk.

¹²Terbaing kuda ngo lojang i uruk batu? Pennah ngo itinggala dèba laut dekket lembu? Tapi ukum kènè enggo memutar balikken ketègerren gabè racun maing matè, dekket situhuna gabè salah.

¹³Ibualken kènè ngo mendokken enggo italuken kènè si Lodebar. Idokken kènè dèng ma, “Cukup ngo gegoh nami lako menaban Karnaim.”

¹⁴Idokken Dèbata JAHOWA Sintèmbul janah Pergegoh Sisotercodi sendiri ngo, “O bangsa Israel, Kupasulak mo soridadu ipas sada bangsa sidèban nai lako menjuhap nagerrimu. Idersa kalak i mo kènè mulai i dalan lako mi Hamat nai i utara soh mi Napa Araba i selatan.”