Read Batak Dairi Amos 7 Bible Online

Amos 7 - Batak Dairi bible

Amos 7

¹Roh mo bangku sada alaten bai JAHOWA Sintèmbul idi nai. Kuidah mo ihanaken mbuè kalohon balang sinderrang enggo dung isabi jelma dukut lako bai raja, janah enggo nola turah dukut rembaru.

²Ipangani balang i mo karina suan-suanen sinitanoh i sanga naing kerri. Nai ningku mo, “Alè JAHOWA Sintèmbul i, ampuni mo bangsaMu! Ai kètèksu janah ndotèsu ngo kalak i, bakunè mo kalak i ndorok mertahan?”

³Iobah JAHOWA nola mo sura-surana i janah nina mo, “Oda saut masa siniidahmu i.”

⁴Kuidah nola mo sada alaten bai JAHOWA Sintèmbul idi nai. Kuidah mo Ia tupung merkebbas-kebbas lako menghukum bangsaNa merkitè api. Kerri mo isaè api i laut i terruh tanoh, janah mulai mengelekkup juma.

⁵Ningku mo, “Alè Dèbata JAHOWA, pettadi mo nemmu api i! Kètèk ngo bangsaMu i bana ndotè, bakunè mo kalak i ndorok mertahan?”

⁶Iobah JAHOWA nola mo sura-suraNa i janah nina mo, “Enda pè oda saut masa.”

⁷Kuidah nola mo sada alaten sidèban bai JAHOWA nai. Kuidah mo Ia cènder i gembar pagar batu sinibahan merkitè memaing tinali sibar-sibar pantek i babo nai. Ijèmak mo i tanganNa tinali sibar-sibar i lako memettoh tah pantek ma ngo percènder pagar batu i barang tah oda.

⁸Ikusoken mo mbang aku, “Kadè ngo idah kono alè Amos?” Kualoi mo, “Tinali sibar-sibar pantek ibabo nai ngo, alè JAHOWA.” Nai idokken JAHOWA mo, “Kupakkè ngo tinali sibar-sibar èn lako pacidahken ukum bangsangKu tosè bagè pagar batu siso pantek èn. Oda nè mo kuobah sura-surangKu, pasti mo Kuhukum kalak i.

⁹Irumpakken mo bekkas-bekkas mersembah sinipakkè pemparen si Isak. Bekkas-bekkas simbadia kalak Israel irontas mo. Kuripasken mo pemparen Raja Jerobeam.”

¹⁰Si Amazia, imam i Betel menengesken boa-boa taba si Jerobeam raja Israel bagèen. “Enggo mertaki-taki si Amos dekket jelma nterrem lako mengalo Rajai. Kata-katana mengajar-ngajari jelma nterrem ngo gabè sebabna maing melala nagerri èn.

¹¹Idokken ngo, matè i pergerahaen mo raja i, janah kalak Israel pasti iembah mi buangen, ndaoh i nagerrina sendiri nai.”

¹²Nai idokken si Amazia mo mbang si Amos, “Alè nabi, balik mo ko mi Juda! Merjamita mo ko i sidi. Asa kalak i merèken panganmu!

¹³Ulang nèngè kono merjamita i Betel. Merkemeddu ngo kuta èn bai raja, dekket bekkas mersembah karina marga.”

¹⁴Ialoi si Amos mo, “Oda ngo Aku nabi kumerna pangkat. Situhuna permakan dekket sipepulungken buah kayu ara ngo aku.

¹⁵Tapi idiloi JAHOWA mo aku i ulaenku i nai, janah pasulakken aku memagahken tennahNa taba kalak Israel.

¹⁶Asa dengkohken mo bakunè pendokken JAHOWA mbang ko. Kumara igerra ko aku merjamita mengalo bangsa Israel.

¹⁷Idokken JAHOWA, gabè sibabijalang mo sinibagesmu i dalan-dalan kuta, janah ibunuh mo dukak-dukakmu i pergerahaen. Tanohmu pè ibagi-bagiken mo bai kalak sidèban, janah kono sendiri matè i nagerri kalak siso menandai JAHOWA. Kalak Israel pasti itaban mi buangen, ndaoh i nagerrina nai.”