Read Batak Dairi Amos 8 Bible Online

Amos 8 - Batak Dairi bible

Amos 8

¹Roh nola mo alaten bangku bai JAHOWA Sintèmbul idi nai. Kuidah mo sada kirang sin buah ntasak.

²Mengkuso mo JAHOWA, “Kadè ngo idah kono alè Amos?” Kualoi mo, “Sada kirang sin buah-buah ntasak.” Idokken JAHOWA nola mo, “Enggo ntasak tikkina bai bangsangKu Israel. Oda nèngè kuobah sura-surangKu janah pasti mo kuhukum kalak i.

³Tupung ari i mobah mo endè-endè i istana gabè derru-derru. Mergamparen mo mèrap bangkè-bangkè siniambongken sipsip.”

⁴Dengkohken kè mo alè simenèndes kalak sincor i nagerri èn memaing gabè binasa kalak i!

⁵Dok ndènè ngo taba diri ndè sendiri, “Ndekkahsu nai ngo ari-ari pèsta. Sèkel ngo kita naing ndor nola merdèa pagènta, tapi oda merkedungen dèng pèsta. Ndigan ngo ndia mentadi ari Sabat, asa terbaing kita nola mertiga-tiga? Ai sèkel kalohon ngo kita mengkilang, menipu merkitè sellup, bak memaing lancung merkitè dacing.

⁶Pagè mocip pè ndorok ngo sidèa mahal hargana. Situlusi mo kalak sincor siso tergararsa utangna, tukasi pè utangna i pellin nasa harga sempasang cipatu, janah sitokor mo ia gabè hambanta.”

⁷JAHOWA, Dèbata Israel, enggo menumpahken, “Oda terlupaken Aku pengelako kalak i sijahat i.

⁸Dumegger mo tanoh èn, janah susah mo ukur karina jelma. Goncang mo karina aur janah terombang-ambing bagè Laè Nil.

⁹Dapet mo tikkina, sundut mo mataniari tupung cèger ari, janah gellap mo tanoh èn tupung mahar. Aku JAHOWA Sintèmbul i ngo enggo mendokken i.

¹⁰Kerja-kerja ndènè Kuobah mo gabè bonek, dekket perendèenken ndènè gabè tangis milangi. Kubaing mo kènè asa mencukkur buk ndènè dekket menelluk laklak tanda bonek. Tosè mo kènè bagè partua menangisi permatè anakna sada-sada. Merpunca mo ari i ibagasen bonek kalohon.”

¹¹Idokken JAHOWA Sintèmbul i, “Dapet nè mo tikkina Kupemasa lèhè matè kocing i nagerri èn. Melèhè mo jelma, tapi oda lèhè pangaen. Muasen mo jelma, tapi oda muas laè. Melèhè bana muasen mo kalak idi mi tennahKu.

¹²Kadap mo jelma i utara nai mi selatan dekket i kebincaren nai mi kesunduten menulusi tennahKu, tapi oda jupa kalak i.

¹³Tupung ari i kalak poso dèng janah njuah-njuah pè pangsan mo kumarna muasen.

¹⁴Kalak simersumpah merkitè gana-gana Samaria mendokken, ‘Merkitè sembahen bangsa Dan’, barang, ‘Merkitè sembahen Bersyeba’ — geppah janah oda nèngè kèkè.”