Read Batak Dairi Amos 9 Bible Online

Amos 9 - Batak Dairi bible

Amos 9

¹Kuidah mo JAHOWA cènder i gembar langgaten. Iperèntahken mo, “Palu mo ngkellek kalohon koncir tihang BagesKu asa dumegger karina èmpèr. Bulakken tihang-tihang i mi babontakal jelma nterrem. Siso matèna dèng, Kubunuh mo i pergerahaen. Sada kalak poda ndorok mperrus, sada kalak poda mpellut.

²Mula pè ipuspusken kalak i mi dunia simatè, Kuruah ngo kalak i. Mula pè laus kalak i mi langit, Kupesusur ngo kalak i isidi nai.

³Mula ciboni kalak i i pucuk Delleng Karmel, Kutulusi janah Kutangkup ngo kalak i. Mula ciboni kalak i mi henjellen laut, Kuperèntahken mo naga laut lako menebbi kalak i.

⁴Mula itaban musuh pè kalak i, Kuperèntahken mo asa ibunuh ma kalak i. Enggo Kuhatken mengeripasken kalak i, janah oda urupen kalak i.”

⁵Dumegger tanoh èn janah bonek pengisina, kumara igerrit JAHOWA Sintèmbul janah Perkuasa. Bagè Laè Nil naik pasang dekket surut bagi mo kalak i menaik nai ndabuh.

⁶Ibahan JAHOWA BagesNa ndaoh i abang-abang ibaing ngo i babo tanoh èn langit bagè perbintoha janah laè i laut nai iorèken mi darat, gerar simemaing i kariNa imo JAHOWA.

⁷Idokken JAHOWA, “Alè bangsa Israel, Kuperdatèken ngo kalak Sudan tosè bagè kènè Kuperdatèken. Enggo Kuarak kalak Palistin i Kreta nai dekket kalak Siria i Kir nai tosè bagè kènè Kuarak i Mesir nai.

⁸Aku, JAHOWA Sintèmbul i sidang memperdimata karajaen Israel simerdosa èn, janah Kupetumpat mo kalak i i babo tanoh èn nai. Tapi oda ngo karina pinempar si Jakob Kuripasken. Aku, JAHOWA ngo sienggo mendokken i.

⁹Kubaing mo perèntah dekket menapi bangsa Israel bagè kalak menapi pagè i ndèru. Lako pelausken karina siso merguna i tengah-tengah kalak i nai, Kukucuk mo kalak idi i tengah-tengah bangsa.

¹⁰Kalak jelma perdosa i bangsangKu nai mendokken, ‘Oda padiaten Dèbata kita idempang olpek.’ Tapi, situhuna ibunuh mo kalak i ibas geraha.”

¹¹Idokken JAHOWA, “Roh mo tikkina Kuolihken mo kerajaen si Daud. Ukum bagèndari tosè ngo kerajaen i bagè bages merumpak. Tapi Kupelias mo pagar batuna janah Kupajek nola mengolihi, asa bagè sienggona.

¹²Ikuasai kalak Israel mo nagerri Edom sitadingna dèng dekket karina bangsa milikKu arnia. Aku, JAHOWA, ngo enggo mendokken i janah pesautenKu ngo idi!”

¹³Idokken JAHOWA, “Roh mo tikkina ndor kalohon mbelgah pagè gabè oda merpentadien nèngè mosin peranien. Kayu anggur pè ndeppur mbellen, gabè pukpuk mo jelma memerroh laè anggur. Menèktèken mo laè anggur i delleng-delleng nai janah marir i uruk-uruk nai.

¹⁴Kubaing mo bangsangKu Israel mengolihi nduma. Ipekadè kalak i nola mo mengolihi kutana sienggo merontas i, nai merian i sidi mo kalak i. Isuani kalak i mo pekken-pekken anggur, janah mengènum laè anggurna. Menuan-nuani mo kalak i janah kipangani hasilna.

¹⁵Kubaing mo bangsangKu mengiani nagerri sienggo Kuberèken bai kalak i. Oda ilompat nèngè kalak i i sidi nai. Aku, JAHOWA Dèbata kalak i ngo enggo simendokken i.”