Read Batak Dairi Junus 1 Bible Online

Junus 1 - Batak Dairi bible

Junus 1

¹Ipas sidari, mengerana mo JAHOWA taba si Junus, anak si Amitai.

²Nina mo, “Laus mo ko mi Niniwe, kuta simbelgah i, lako me- ngasupsa, kerna Kubettoh jahat kalohon ngo pengisi kuta i.”

³Tapi keppè mi kuta sidèban nola ngo si Junus laus lako pedaohken dirina bai JAHOWA nai. Berkat mo ia mi Jope, janah tupung ma mo jumpasa i sidi keppel naing berkat mi Spanyol. Enggo kessa igarar ongkosna i dalan, mengket mo ia mi keppel i, nai merkeppel mo ia rebbakken dekket simerembah keppel i mi Spanyol, lako pedaohken dirina bai JAHOWA nai.

⁴Susur mo si Junus mi bekkas kettan terruh kalohon janah galè i sidi, nai lènek mo ia terpeddem. Kessa i ibaing JAHOWA mo roh angin kalisungsung mi babo laut i, nai masa mo kaba-kaba mahantu gegohna, menumbur keppel i sampè naing mpulka. Buradan kalohon mo sidasa keppel idi janah derko-derko mengido tolong, mendahi dèbata sinisembahna gennep. Lako mengorui botong keppel i asa ulang karam, ipengambongi kalak i mo embahen keppel i mi bagessen laut i.

⁶Tikan susur simerembah keppel i mi bekkas kettan terruh, idapet mo si Junus i sidi tupung meddem. Nai nina mo, “Bakunè ma ngo kono i ndorok meddem enggo bagèen masa! Ndungo ko! Mersodip mo ko taba dèbatamu lako mengido tolong. Isè bettohen tah masèh giam ètongenna taba kita asa ulang mago kita.”

⁷Enggo kessa mi babo si Junus dekket simerembah keppel i, nina sinikeppel i mo samah kalak i, “Aci, mertendung mo kita asa sibettoh barang isè simersalah maingken asa sempa banta bagèen!” Mertendung mo kalak i, janah kenna mo tupung serrang gerar si Junus.

⁸Nai idokken kalak i mo bai si Junus, “Tuhuna ngo kono merulah asa roh mara èn? Idikè nai ngo pana kono? Bangsa dikè nai ngo ko? Kasa kono mbengket mi sèn?”

⁹Ialoi si Junus mo, “Kalak Heber ngo Aku, JAHOWA ngo sikusembah, Dèbata sinisorga, simenghanaken laut dekket tanoh ngkerrah.”

¹⁰Nai kessa i isukutken nola ma mo barang bakunè asa laus ia mperrus menadingken JAHOWA. Mendengkoh i gabè makin mbiar mo sinibagasen keppel i, janah mendokken tabasa, “Melancangsu ma mo pemakinmu idi!”

¹¹Ninganna i muat engngetna mo kaba-kaba i, nai ikusoken sinikeppel idi mo tabasa, “Kadè mo kubakin kami bamu asa mentadi kaba-kaba ènda?”

¹²Ialoi si Jona mo, “Ambongken kènè mo aku mi bagasen laut, mènter mentadi ngo nahan kaba-kaba i. Kerna enggo satdar aku bagèndari, magahken aku ngo memaingken asa sempa kaba-kaba ènda taba kènè.”

¹³Tapi dak tong dèng ma ngo igegohi sidasa keppel i tuk gegohna lako mengkayuhkeh keppel i mi biding laut. Tapi muat menggasana ngo kaba-kaba i, dungna magosia sambing mo keledjaen kalak i.

¹⁴Kerna i dilo-dilo mo kalak i taba JAHOWA, “Alè JAHOWA, kupido kami bamu, ulang mo duè kami mago kerna naing memuat kessah kalak siso lot memaing kesalahen barang kadè pè taba kami. Alè JAHOWA, enggo ibakinken kono kadè sinipegeddo ukurmu.”

¹⁵Nai iambongken kalak i mo si Junus mi bagasen laut. Nai mentadi mo kaba-kaba i oda nè menggasa.

¹⁶Gabè mbiar kalohon mo sidasa keppel idi taba JAHOWA, janah enggo kessa kalak i mi darat, ipèlèken kalak i mo pèlèen dekket menjanjiken mermatcam bagè sibaingen bai JAHOWA.

¹⁷Ninganna i ipasulak JAHOWA mo sada ikan mbellen memendut si Junus. Nai merian ibagasen beltek ikan i mo si Junus tellu ari tellu berngin dekkahna.