Read Batak Dairi Junus 2 Bible Online

Junus 2 - Batak Dairi bible

Junus 2

¹Ipas beltek ikan i nai, mersodip mo si Junus taba JAHOWA Dèbatana. Nina mo,

²“Ialè JAHOWA, ibagasen kesusahenku dilo-dilo ngo aku baMu janah ialoi kono ngo aku. Ibas dunia kalak simatè nai kupidoken ngo pengurupien, idengkohken kono ngo pengidoenku janah iperdatèken kono.

³Iambongken kono ngo aku mi bekkas simbages, soh mi terruh laut. I sidi mo aku icingkoi koser laè, ipenghempasken ombak dekket galombang ngo aku.

⁴Ningku mo ibagasen ukurku: Enggo ngo keppè ipelaus JAHOWA aku i hadeppenNa nai. Mak nèngè mo keppè idahenku bages simbadia bekkasNa merian i.

⁵Sennak ngo laè i sakat soh mi bibirku, laut mbellang menungkupi karina dagingku, rambah laut mengeliliti takalku.

⁶Susur ngo aku soh mi landasen delleng, mi banua siterkonci pèntu pengkeruhenna soh seggen. Ledja pengakapku ibas diringku, nai terèngèt janah dilo-dilo mo aku baMu. Nai sakat mo sodipku baMu, mi bagasen BagesMu Simbadia i. Nai ipekèkè ko mo aku ibagasen laut nai, alè JAHOWA Dèbatangku!

⁸Karina simenembah Dèbata sidèban siso merlapaten i, menadingken kono janah oda nè kasèa.

⁹Tapi endèenkenku mo endè pemojien baMu janah kupèlèken mo pèlèen baMu. Petupaenku mo karina sienggo kujanjiken. Kono ngo JAHOWA paluahken aku.”

¹⁰Nai kessa i nola, merkitè perèntah JAHOWA, iutahken ikan idi mo si Junus mi darat.