Read Batak Dairi Junus 4 Bible Online

Junus 4 - Batak Dairi bible

Junus 4

¹Situhuna oda ngo sennang atè si Junus bagi pemaing Dèbata; baliksa gabè melaga ngo ia.

²Nai mersodip mo ia, “Alè JAHOWA, otang ngo enggo kudokken kin sinderrang mak dèng berkat kan bagesku nai, magahken pasti baingenmu bagèen? Kumernaken idi mo aku mènter mperrus mi Spanyol! Kubettoh ngo Dèbata perkelleng janah permasèh atè kono, persobar, perlamlam, janah dak ngo uè menondati takina lako menghukum.

³Bagèndari pè, alè JAHOWA, belli mo aku matè, kerna dolien mo aku matè, ulang nai ngo nggelluh.”

⁴Ialoi JAHOWA mo, “Oda lot dalanna kono gabè melaga bagidi.”

⁵Nai kessa i laus mo si Junus dempak kebincaren kuta i, ninganna dogok i sidi. Ibahan mo sada sapo-sapo janah culenggem ibagasen, ninganna memèma-mèma barang kadè sinaing masa i kuta Niniwe.

⁶Nai ipeturah Dèbata JAHOWA mo sada suan-suanen simenjoror simemaingken percilenggemmen bai si Junus gabè sennang mo pengakapna. Tuhu mo gia, sennang kalohon pengakap si Junus meradepken suan-suanen idi.

⁷Tapi sibarembenkenna siceggen kalohon dèng, ibaing Dèbata mo sada goya kipangani urat suan-suanen idi, dungna gabè males mo.

⁸Enggo kessa mbincar mataniari, ibaing Dèbata mo roh angin nggara menempul i kebincaren nai. Sanga ngo naing-naing pangsan si Junus kumerna itipa nggara ari oda kalih bagè ilekkup takalna iakap. Gabè mendellè mo ia janah dolien mo matè dok atèna. Nina mo, “Sellohen mo aku matè ulang nai ngo nggelluh!”

⁹Tapi idokken Dèbata mo tabasa, “Oda ngo nemmu patutna ko bonek kumernaken suan-suanen idi!” Ialoi si Junus mo, “Kasa oda? Patut mo gia aku gabè melaga kalohon sampè matè.”

¹⁰Nai nina JAHOWA mo tabasa, “Turah ngo suan-suanen èn ibas sada berngin sambing; janah males ngo ia sibarembenna nola; oda ngo kono giam petubuhkensa. Tukasi pè bagidi bonek ngo iakap kono kerna males ia.

¹¹Makinsa nola mo Aku oda bonek memikirken Niniwe, kuta simbellen i. Kerna laènken pinakan kalak i siso terkira i bilangenna, lot dèng ma ngo i sidi lebbih 120.000 kalak nai anak siso ndorok dèng menandai kadè simerandal dekket jahat.”