Read Batak Dairi 4 Musa 10 Bible Online

4 Musa 10 - Batak Dairi bible

4 Musa 10

¹Nai nina JAHOWA mo mbang si Musa,

²“Bahan mo dua trompèt ipas pirak tingtingen nai lako mendiloi jelma nterrem mertumpu barang mendokken kalak i lako berkat.

³Mula duana isempul ndekkah, merlapaten mo i karina bangsa i kennah mertumpu mi gembarmu i lebbè pèntu Undung-undungKu.

⁴Tapi mula pellin sada sambing ngo kessa isempul, merlapaten pellin simpantasniasè ngo kennah mertumpu mi gembarmu.

⁵Mula merpostep-mpostep ngo sora sarunè i isempul, imo tandana kennah berkat marga-marga simerian kettan kebincaren.

⁶Mula isempul nola ma merpostep-mpostep peduakaliken berkat mo marga-marga si kettan Selatan. Jadi mula sora merpostep-mpostep merlapaten kennah berkat mo bangsa i,

⁷tapi mula ndekkah mersora merlapaten kennah mertumpu bangsa i.

⁸Kennah Imam dukak-dukak si Aron ngo menempul trompèt idi. Idi mo hatoren sikennah uèen ndènè soh sidekkah-dekkahna.

⁹Janah mula mergeraha kènè i nagerri ndènè lako mempertahanken diri ndènè mengalo musuh simengkubu kènè, sempul mo trompèt idi. Nai Aku, JAHOWA Dèbata ndènè, mo mengurupi dekket paluahken kènè ibas musuh-musuh ndènè nai.

¹⁰Bagi ma tupung ari kènè mersampang atè, imo tupung pèsta-pèsta Peltak Bulan dekket pèsta-pèsta ndènè sidèbanna i, kennah isempul ngo trompèt i sinderrang memèlèken pèlèen situtungen dekket pèlèen perdamèen kènè taba Aku. Nai Kuurupi mo kènè. Aku JAHOWA ngo Dèbata ndènè.”

¹¹I tahun peduaken enggo kessa itadingken bangsa Israel tanoh Mesir, i ari duapuluh bulan dua, kumèkè mo hembun i babo Undung-undung JAHOWA nai.

¹²Nai merotor mo kalak Israel berkat menadingken gurun pasir Sinai, janah mentadi mo hembun idi soh kessa kalak idi mi gurun pasir Paran.

¹³Idi dèng mo perlebbè kalohon berkat kalak idi merkitè perèntah JAHOWA tarap si Musa.

¹⁴Siperlebbè berkat imo soridadu siculèndung i terruh bandèra kesadaen Juda, mersada-sada nuhnuhen: Si Nahason anak si Aminadab menguluken nuhnuhen marga Juda,

¹⁵Si Netaneel anak si Zuar menguluken nuhnuhen marga Isasar,

¹⁶janah si Eliab anak si Helon menguluken nuhnuhen marga Zebulon.

¹⁷Nai irontas mo Undung-undung JAHOWA, janah berkat mo horong si Gerson dekket Merari simerembah Undung-undung idi.

¹⁸Nai berkat nola ma mo nuhnuhen siculèndung i terruh bandèra kesadaen marga Ruben, mersada-sada nuhnuhen: Si Elizur anak si Syedeur menguluken nuhnuhen: Marga Ruben,

¹⁹Selumiel anak si Zurisyadai menguluken nuhnuhen marga Simeon,

²⁰janah si Elyasaf anak si Rehuel menguluken nuhnuhen marga Gad.

²¹Enggo kessa i berkat mo kalak Kehat simerembah barang-barang simbadia. Mula soh kessa kalak i mi bekkas permalamen sirimbaru, enggo mo ipajek nola Undung-undung JAHOWA i sidi.

²²Nai mengèkut nola ma mo soridadu siculenggem i terruh bandèra kesadaen Efraim, mersada-sada nuhnuhen: Si Elisama anak si Amihud mo menguluken nuhnuhen marga Efraim,

²³si Gamaliel anak si Pedazur mo menguluken nuhnuhen marga Manasye,

²⁴janah si Abidan anak si Gideoni mo me- nguluken nuhnuhen marga Benjamin.

²⁵Perpodi berkat mo rombongen soridadu siculenggem i terruh bandèra kesadaen marga Dan. Kalak idi mo pertaram i podi karina pulungen idi. Merdalan mo kalak idi mersada-sada nuhnuhen: Si Ahiezer anak si Amisyadai menguluken nuhnuhen marga Dan.

²⁶Si Pagiel anak si Okhran menguluken nuhnuhen marga Asyer,

²⁷janah si Ahira anak si Enan menguluken nuhnuhen marga Naptali.

²⁸Idi mo persusun nuhnuhen kalak Israel, mersada-sada nuhnuhen gennep berkat kalak idi lako mbungkas.

²⁹Idokken si Musa mo taba silihna, si Hobab anak si Rehuel kalak Midian, “Naing berkat mo kami mi bekkas sinidokken JAHOWA naing berènkenna bai nami. Enggo iperbagah-bagah JAHOWA simerandal bai kalak Israel. Asa èkutken kènè mo, mèndè pè kubakin kami bai ndènè.”

³⁰Ialoi si Hobab mo, “Lias atè mo, tapi dok atèngku naing balik ngo aku mi kutangku.”

³¹“Ulang mo tadingken kami,” nina si Musa, “kènè ngo ndorok menuduhken dalan bai nami, kumerna kènè ngo bettoh-bettohen barang kan dikè kita ndorok mermalam i gurun pasir.

³²Mula dekket kènè, karina simerandal sinibakin JAHOWA taba kami, bagidi ma pè kubakin kami taba kènè.”

³³Enggo kessa itadingken bangsa Israel delleng Sinai, delleng kebekkasen JAHOWA, merdalan ngo kalak i tellu ari dekkahna. Pèti Perpadanen JAHOWA dak ijolo ngo ibaing kalak i lako menulusi bekkas perundung-undungen bai kalak i.

³⁴Mula berkat kalak i i bekkas perundung-undungen nai, dak i babo kalak i ngo tong hembun JAHOWA tikan mahar.

³⁵Gennep naing iembah kalak i Pèti Perpadanen i, idokken si Musa mo, “Kèkè mo ko alè JAHOWA, pesompar-baèrken mo musuhMu asa mperrus kalak simengkecegoken Kono.”

³⁶Janah gennep soh kessa Pèti Perpadanen idi i bekkas pentadien, nina si Musa mo, “Balik mo ko alè JAHOWA, mendahi bangsa Israel simerribu-ribu i.”