Read Batak Dairi 4 Musa 11 Bible Online

4 Musa 11 - Batak Dairi bible

4 Musa 11

¹Tikan sidari itebenai bangsa i mo kekelsohen taba JAHOWA kumerna kesuliten-kesuliten kalak i. Mendengkohken kelsoh-kelsoh kalak idi, gabè melaga mo JAHOWA janah roh mo ibaing api i babo kalak i. Rarat mo api idi i tengah-tengah kalak i janah melekkup mo dèba perundung-undungen idi.

²Muo-uo mo kalak i mengido tolong taba si Musa. Nai mersodip mo si Musa taba JAHOWA, nai mèntep mo api idi.

³Kumernaken simasa i, igerari mo bekkas i Tabera, kumerna i sidi mergollah-gollah api JAHOWA i tengah-tengah kalak i.

⁴I perdalanen kalak Israel i, lot ma ngo dèba dekket kalak sidèban. Sekkel kalohon ngo kalak i naing mangan gulè, janah kalak Israel pè enggo ma tubenna kekelsohen. Nina kalak i mo, “Iah, kum lot nemmu gulè banta!

⁵Terèngèt ngo kita tikala mangan ikan i Mesir oda pella menokor, bagi ma cèmun, tabu nggala, ganderra, babang merah dekket babang putih!

⁶Keppè bagèndari enggo makin kerri gegohta kumerna oda lot pangaen laènken pellin manna sambing ngo siidah.”

⁷Ukum bentuk manna idi bagè batu botik kètèk-kètèk ngo, rupana narih mbentar ialang nggersing.

⁸Tikan berngin merurusen ngo manna i rebbakken dekket hembun mi bekkas perundung-undungen. Siceggen kessa kumasèbut mo kalak i mi jèhè mi julu pepulungken manna i, nai igiling mo barang itutu mahan nditak, janah ibakin mo gabè kuè cengko menipis. Rasana bagè kuè sinipanggang merdengan minak Zaitun.

¹⁰Nai idengkoh si Musa mo kalak Israel i ngut-nguten, ninganna mercènderren mer- pulguk-pulguk i lebbè Undung-undung kalak i. Nai punguren mo JAHOWA gabè marsak mo ukur si Musa.

¹¹Nai idokken mo taba JAHOWA, “Kasa bagèen susahna aku ibaing Kono? Tah oda sennang atèMu mengidah aku? Kasa kin baku iampèken Kono tanggung jabab tersèngèt karina kalak i?

¹²Aku kin pana mengkandong barang menubuhken kalak i? Kasa idokken Kono aku bagè sada kalak pendèdah mertempi anak mbara, asa gabè kennah aku dakdak mendèdah kalak i sidekkah i perdalanen mi tanoh siniperbagahMu bai empung kalak i?

¹³Tengen mi, pukpuk kalak i merdengeng-dengeng mengido gulè. Nai idikè nai mo kubuat gulè lako bai kalak i karina?

¹⁴Oda sanggup aku memersan tanggung jabab bagi belgahna; mbotongsu ngo ulaen i baku!

¹⁵Mula tong ngo ibaing kono bangku bagèen alè JAHOWA, masèh mo atèmu baku; lotin mo patèken aku ndor asa ulang nèngè kugongken sindersa èn.”

¹⁶Nai nina JAHOWA mo taba si Musa, “Pepulung mo i tengah-tengah bangsa Israel nai pitupuluh kalak pengetuai siniakui kalak i pengulu bangsa i. Arahken mo kalak i mi hadeppenKu ibagasen Undung-undungKu, nai dokken mo kalak i cènder i sidi i gembarmu.

¹⁷Susur pè Aku janah mengerana dekket ko i bekkas idi, janah dèba kuasa sienggo Kuberèken bamu, berènkenKu mo bai kalak i. Asa ndorok kalak i mengurupi kono memersan tanggung jabab mi bangsa i, janah oda pella pellin kono memersan.

¹⁸Bagèndari pè dokken mo ènda bai bangsa idi: Uras kènè mo diri ndènè baremben, asa mangan gulè kènè. Enggo idengkoh JAHOWA kènè tangis janah kekelsohen sekkel naing kipangan gulè, janah idokken kènè mendèen nasip ndènè sinderrang i Mesir. Bagèndari naing iberrè JAHOWA ngo gulè bai ndènè, janah ndorok mo ipangan kènè.

¹⁹Mangan gulè mo kènè oda pellin sidari barang dua ari, barang lima ari barang sipuluh ari, barang oda pellin duapuluh ari tupèh,

²⁰tapi dom sibulan dekkahna pangaen ndènè, sanga cioen kènè janah mutah-utah ganankenna. Masa pè bagidi kumernaken enggo itulak kènè JAHOWA silot i tengah-tengah ndènè. Janah dèng ma kumernaken enggo tangis kènè i hadeppenNa janah kekelsohen kumerna menadingken tanoh Mesir.”

²¹Nai nina si Musa mo taba JAHOWA, “Bangsa sikuuluken ènda buèna 600.000 kalak. Bakunè asa idokken Kono ndorok berènkenmu bai kalak idi mangan gulè cukup sidekkah sibulan?

²²Idikè nai mo lot lembu dekket biri-biri bagi buèna sèaten lako pebessurken kalak i? Cukup ma karina ikan sinilaut pangaan kalak i?”

²³Ialoi JAHOWA mo, “Tah iètong ko ngo merbatas kuasangKu? Idahenmu mo barang tah tuhuna ngo siKudokken idi barang oda!”

²⁴Nai karuar mo si Musa janah ibagahken mo bai bangsa i kadè sienggo idokken JAHOWA. Ipepulung si Musa mo pitupuluh pengulu janah idokken mo kalak idi cènder i sikuliling Undung-undung JAHOWA.

²⁵Nai susur mo JAHOWA ibagasen hembun janah mengerana taba si Musa. Ibuat JAHOWA mo dèba kuasa sienggo niberèkenNa bai si Musa janah iberèken bai sipitupuluh kalak pengulu idi. Sinderrang susur Tendi JAHOWA mi babo kalak i, itebenai kalak i mo tenggo-tenggo bagè nabi, tapi oda pella ndekkah.

²⁶Dua kalak ibas sipitupuluh pengulu idi nai, si Eldad dekket si Medad, tading ngo i perundung-undungen janah oda laus rebbak dekket kalak sidèban i mi Undung-undung JAHOWA. Ibas perundung-undungen idi susur mo Tendi mi babo kalak i, janah kalak i sidua pè tenggo-tenggo mo bagè nabi.

²⁷Nai mènter lojang mo mi ruar sada kalak anak perana lako memagahken bai si Musa kadè simasa bai si Eldad dekket si Medad.

²⁸Si Josua anak si Nun, sienggo mengurupi si Musa mulai anak perana nai, mendokken taba si Musa, “Dokken mo mentadi kalak i, Pa!”

²⁹Ialoi si Musa mo, “Kasa pella ipikirken Ko aku? Kuharapken nola dèng ngo asa nemmuken iberèken JAHOWA TendiNa bai karina bangsaNa, janah pebangkitken kalak i karina gabè nabi!”

³⁰Nai balik mo si Musa mi perundung-undungen rebbak dekket sipitupuluh kalak pengulu Israel idi.

³¹Nai sintempu mo roh angin ibaing JAHOWA i laut nai; ikabangken angin i mo lèto ngkabang cerrep kalohon; pella sada mèter i babo tanoh i nai. Merkabangen mo lèto i i babo perundung-undungen i sanga barang piga-piga batu i sikulilingna.

³²Suntuk arinkenna i, suntuk bernginna dekket suntuk ari mengèkutna nola, kumasèbut mo kalak i karina mencekaki lèto i. Gennep jelma menangkup sicitukna mo seribu kilo. Icinar kalak i mo lèto i i sikuliling perundung-undungen idi asa ngkerrah.

³³Sidekkah lot dèng mbuè gulè mahan pangaen, gabè melaga mo JAHOWA taba bangsa i, janah ipesempa mo sakit uabba taba kalak idi.

³⁴Nai igerari mo bekkas idi, “Pendèbaen Pendilat,” kumerna i sidi ikuburken kalak simatè kumerna pendilatna.

³⁵I sidi nai mbungkas mo bangsa i mi ladang Hazerot, nai mermalam i bekkas idi.