Read Batak Dairi 4 Musa 12 Bible Online

4 Musa 12 - Batak Dairi bible

4 Musa 12

¹Enggo ibuat si Musa sada kalak daberru Kus mahan sinibagesna, janah imo ibakin si Miryam dekket si Aron cida- lihen lako mengerèhèi si Musa.

²Nina kalak i mo, “Pana pellin tarap si Musa nai ngo kessa JAHOWA mengerana? Otang arap kita pè ndorok ngo Ia mengerana?” Idengkoh JAHOWA mo kadè sinicakapen kalak i.

³Ukum si Musa percerrep ukur kalohon ngo, mengelampoi karina jelma singgelluh i dunia èn.

⁴Nai sintempu idokken JAHOWA mo mbang si Musa, si Aron dekket si Miryam, “Laus mo kènè sitellu mi Undung-undungKu.” Nai laus mo kalak idi mi sidi,

⁵janah susur mo JAHOWA ibagasen binangun hembun. Jengjeng mo JAHOWA i pèntu Undung-undungNa janah idiloi mo si Aron bak si Miryam. Mi lebbè mo kalak i duana,

⁶janah nina JAHOWA mo, “Dengkohken mo ranangKu ènda! Mula lot i tengah-tengah ndènè nai nabi, Kupacidah mo diringKu bana ibagasen alaten-alaten, janah mengerana dekketsa merkitè nipi.

⁷Tapi oda ngo bagidi ukum naposongKu si Musa. Ia mo kalak sesetiana ibas bangsangKu.

⁸Janah mengerana ngo Aku hadep abè dekketsa, ntangkas oda merkoning-koningen. Soh mi rupangKu pè enggo ngo idah! Kasa pang kènè mengalo si Musa, naposongKu idi?”

⁹Melaga kalohon mo JAHOWA bai kalak i sidua, janah laus mo Ia.

¹⁰Sinderrang itadingken hembun i kessa Undung-undung JAHOWA, taridah mo mènter kenna sakit puru mahantu si Miryam; dagingna mbulan bagè kapas. Tikan itulihken si Aron dempak si Miryam janah idah enggo kenna sakit sibagidi ia,

¹¹nina mo mbang si Musa, “Tolong mo, tuan nami, ulang mo belli kami idersa kumerna dosa sikubahan kami ibagasen kemotoen nami i.

¹²Ulang mo belli ia bagè anak mbara baru tubuh enggo matè, dekket dagingna sitengah melala.”

¹³Nai pingko-pingko mo si Musa taba JAHOWA, “Alè Dèbata, kupengido, pemalum mo ia.”

¹⁴Ialoi JAHOWA mo, “Ukum icèduri bapana kin abèna, otang sidekkah pitu ari ia kennah menggongken kememalu? Liplip mo ia i perundung-undungen nai sidekkah pitu ari, janah enggo kessa i, ndorok mo ia balik mbengket.”

¹⁵Nai iliplip mo si Miryam i perundung-undungen idi nai sidekkah pitu ari, janah oda mèrèt bangsa idi i sidi nai mèma iduè si Miryam balik mi perundung-undungen.

¹⁶Nai itadingken kalak i mo Hazerot janah mermalam i padang gurun Paran.