Read Batak Dairi 4 Musa 13 Bible Online

4 Musa 13 - Batak Dairi bible

4 Musa 13

¹Nai nina JAHOWA mo taba si Musa,

²“Pasulak mo tersada kalak pungkuh-pungkuhna i gennep marga Israel nai lako merkakap tanoh Kanaan sinaing Kuberèken bai kalak Israel.”

³Rembang mi perèntah Dèbata idi, ipasulak si Musa mo kalak i gurun pasir Paran nai. Karinana ngo kalak idi pungkuh-pungkuh i tengah-tengah kalak Israel nai: [Marga] — [Simenguluken] Ruben — Si Syamua anak si Zakur Simeon — Si Safat anak si Hori Juda — Si Kaleb anak si Jefune Isasar — Si Jigal anak si Josep Efraim — Si Hosea anak si Nun Benjamin — Si Palti anak si Rapu Zebulon — Si Gadiel anak si Sodi Manasye — Si Gadi anak si Susi Dan — Si Amiel anak si Gemali Asyer — Si Setur anak si Mikhael Naptali — Si Nahbi anak si Wofsi Gad — Si Guel anak si Makhi

¹⁶Idi mo perkakap sinipasulak si Musa lako mengintèken nagerri idi. Si Hosea anak si Nun igancih si Musa gerarna gabè si Josua.

¹⁷Sinderrang ipasulak si Musa kalak idi berkat, itennahken mo bai kalak i, “Merdalan mo kènè dempak utara, menuju kan Selatan tanoh Kanaan, nai terrus mi bekkas simeruruk-uruk.

¹⁸Inteken kènè mo barang bakunè nagerri idi, tah mbuè pengisina barang cituk, tah mergegoh ngo kalak i barang ndotè.

¹⁹Perèso kènè mo tah merandal ma nagerri idi barang tah oda, janah tah merian i kuta-kuta siso merparik ngo pengisina i barang ibas kuta mbelgah simerparik.

²⁰Pepihir kènè mo ukur ndènè. Tengen kènè tah nggabur tanohna janah mbuè kayuna. Ulang kènè lupa merembah situk buah silot i sidi.” Tupung tubenna mosin anggur ngo tikanna i.

²¹Nai laus mo kalak i dempak Utara janah mendatèken nagerri i mulai i padang gurun Zin i Selatan nai mi Utara soh mi kuta.

²²Mula-mula laus mo kalak i mi kan Selatan nagerri i janah sakat mo mi kuta Hebron sini-ianen kalak Ahiman, kalak Sesai dekket kalak Talmai, pinempar si Enak. Kuta Hebron ipajek pitu tahun sinderrang mak dèng kuta Zoan i Mesir.

²³Nai sakat mo kalak i mi lembeng Eskol, i sidi ipastik kalak idi mo sindahan buah anggur mbotong kalohon, sanga kennah iosong dua kalak ibas sada kayu. Iembah kalak idi ma mo dèba buah ndalima dekket buah kayu ara.

²⁴Igerari mo bekkas i Lembeng Eskol kumarnaken ranting anggur sinipastik kalak Israel i sidi.

²⁵Enggo kessa iperdimata kalak i nagerri idi empatpuluh ari dekkahna, balik mono perkakap idi,

²⁶janah ibagahken mo bai si Musa, si Aron dekket karina bangsa Israel situpung mertumpu i Kades, i padang gurun Paran. Isukutken kalak i mo kadè sienggo idah kalak i dekket ipacidah mo buah siniembah kalak idi.

²⁷Nina kalak idi mo taba si Musa, “Enggo mo kuperèso kami nagerri idi janah enggo kuidah kami kaya ngo tanohna janah nggabur, janah ènda mo situk buah-buahen kuembah kami i sidi nai.

²⁸Tapi kalak mergegoh ngo pengisi nagerri i. Mbelgah-mbelgah ngo kuta kalak i janah merparik. Janah dèng ma, kuidah kami ngo jelma pinempar ntuara i sidi.

²⁹Kalak Amalek simerian kettan Selatan nagerri i, kalak Het, Jebus, dekket kalak Amori merian i bekkas kan simerurukna; nai ukum kalak Kanaan mengiani suak arur biding laut dekket i arur mengèkut-ngèkut laè Jordan ngo.”

³⁰Tapi ipepos si Kaleb mo ukur kalak sikekelsohen taba si Musa. Nina si Kaleb mo, “Kennah sijuhap ngo nagerri i janah sitaban bagèndari, kerna cukup ngo gegohta lako menaluken kalak idi.”

³¹Tapi nina kalak sirebbakken balik dekket si Kaleb idi mo, “Oda tupèh, oda tellap kita lako menjuhap kalak idi. Mergegohen ngo pengisi nagerri idi daripada kita.”

³²Nai ipesar kalak idi mo berita luap bai kalak Israel tersèngèt nagerri sienggo ikakapi kalak idi. Nina kalak idi mo, “Mermara kalohon ngo nagerri i, bang meradepken jelma pengisina pè. Kalak sikuidah kami nisidi pè mbelgah kalohon ngo dagingna.

³³Kuidah kami kalakna bagè ntuara, imo pinempar kalak Enak. Ukum kami dosken balang nai ngo mertimbangken kalak idi, janah pasti bagidi ma ngo iakap kalak i mengidah kami.”