Read Batak Dairi 4 Musa 14 Bible Online

4 Musa 14 - Batak Dairi bible

4 Musa 14

¹Suntuk bernginna i dak derko-derko mo bangsa Israel janah tangis-tangis.

²Ngut-nguten mo kalak i taba si Musa dekket si Aron janah nina, “Lotin mo kita matè i tanoh Mesir barang pè i gurun pasir èn! Dolien mo matè!

³Merkadè mo asa iarak JAHOWA kita mi nagerri i? Bakunè pè matè geraha ngo kita sikali èn nai itaban mo sinibagesta dekket dukak-dukakta. Otang lotien mo kita balik mi Mesir!”

⁴Nai mengerana mo kalak i samahsa, “Selloh mo sipilih sada kalak pengulunta asa balik kita mi Mesir!”

⁵Nai mersembah mo si Musa dekket si Aron i lebbè karina jelma nterrem i.

⁶Si Josua anak si Nun dekket si Kaleb anak si Jefune, dua kalak ibas perkakap idi nai, mengeribaki pakèen kalak i kerna bonek atèna.

⁷Nina kalak idi mo taba karina jelma nterrem i, “Sondel ngo mendèna tanoh sikuperdimata kami idi.

⁸Mula masèh atè JAHOWA banta, Iarak ngo kita mi sidi janah iberèken tanoh kaya janah nggabur idi banta.

⁹Ulang mo sialo JAHOWA, janah ulang mbiar meradepken kalak simerian i nagerri idi, kumerna murah sambing ngo siakap menaluken kalak idi. Ai enggo itadingken simengkeruduksa kalak i, janah JAHOWA ngo mengurupi kita. Jadi ulang mbiar.”

¹⁰Karina jelma nterrem i mengasup naing memintiri kalak i dekket batu lako pematèken. Tapi mènter sintempu mo idah kalak i roh ncilo cuhaya JAHOWA mi babo Undung-undungNa.

¹¹Idokken JAHOWA mo mbang si Musa, “Sadikè dekkah nai ndia kalak èn dak mengalo Aku? Soh ndigan ngo ndia kalak èn oda tok baKu, tukasi pè enggo bagi matcam bagèna Kubaing kelengangen i tengah-tengah kalak i?

¹²Kuripasken mo kalak i merkitè wabba. Tapi ukum kono Kubaing mo gabè bapa sada bangsa mbellen janah kuaten daripada kalak i!”

¹³Nai nina si Musa mo mbang JAHOWA, “Ialè JAHOWA, nahan idengkoh kalak Mesir nola mo idi! Keppèken merkitè kuasaMu enggo iarak Kono kami mbungkas i nagerri idi nai,

¹⁴janah ibagah-bagahken kalak i nola mo bai jelma nterrem sininagerri ènda, simendengkoh Kono ngo alè JAHOWA, mendengani kami. Enggo ma ngo idengkoh kalak idi enggo ipacidah Kono dirimu bai nami tikan merdalan Kono i lebbè nami ibagasen hembun bagè binangun tikan mahar, dekket ibagasen api bagè binangun tikan berngin.

¹⁵Mula ibunuh Kono karinana bangsaMu ènda, nai dokenken bangsa-bangsa sienggo pennah mendengkoh tersèngèt kemahantuenMu idi mo

¹⁶ibunuh Kono ngo bangsaMu i gurun pasir kumerna oda sanggup Kono mengarak kalak i mi nagerri sienggo ijandiken Kono.

¹⁷Kumerna i, alè JAHOWA, kupido, pacidah mo kuasaMu bainami janah pesaut mo kadè sienggo niperbagahMu. Enggo idokken Kono,

¹⁸‘Aku, JAHOWA, hanjar ngo melaga. Kupacidah ngo masèh atèngKu dekket mendè basangKu mertinèncuk. Kuampuni ngo jelma simerdosa dekket simengalo Aku. Kasi pè bagi, Kubalesken ngo dosa pertuana taba dukak-dukak dekket kempu-kempuna, soh mi cundut petelluken dekket pe-empatken.’

¹⁹Bagèndari pè, alè JAHOWA, kumerna belgahna masèh atèMu dekket mendè basaMu, pengidoenku, ampuni mo dosa-dosa kalak èn bagè sienggona kessa nai itadingken kalak i tanoh Mesir.”

²⁰Nai ialoi JAHOWA mo, “Selloh mo mu- la bagi, Kuampuni mo kalak i bagè sini- pengidomi.

²¹Tapi Kubulabanken ibas diringKu janah kumerna Aku singgelluh i janah merkuasa i dunia èn,

²²ukum kalak èn sada kalak poda nè nggelluh lako mbengket mi nagerri sienggo Kuperbagah bai empung kalak i. Kumerna oda uè tunduk kalak i baKu, janah dakdak iempet mengunjuni Aku. Keppèken enggo mo idah kalak i cuhayangku simerkillok idi, dekket kelengangen-kelengangen siKubaing i Mesir dekket i gurun pasir.

²³Malot i! Oda ndorok ibengketti kalak i aur i. Barang isè bai kalak idi nai simengalo Aku, sada kalak poda ndorok mendedoh i.

²⁴Tapi ukum naposongKu si Kaleb oda ngo bagi ia. Hot ngo setia ia bangKu. Kumerna i Kuembah ngo ia mi nagerri sienggo ibengketti idi. Bagèndari merian i tanoh ndèas i ngo kalak Amalek dekket kalak Kanaan. Tapi gabè milik pinempar si Kaleb, naposongKu mo ladang i. Baremben kennah molih janah laus nola mo kènè mi padang gurun menuju dempak Teluk Akaba.”

²⁶Nai nina JAHOWA mo taba si Musa dekket si Aron,

²⁷“Soh ndigan ngo jelma jahat i dak ngut-nguten taba Aku? Karina pehehui kalak i enggo Kudengkoh.

²⁸Kennah aloi kènè kalak i bagèen: Nina JAHOWA, ‘Kusumpahken ibas diringKu singgelluh Kubaing mo taba kènè bagè sinidokken ndènè i i lebbèngKu. Aku, JAHOWA, enggo mengeruapken i.

²⁹Enggo dak ngut-nguten kènè taba Aku.

³⁰Kumernana i kennah matè mo kènè, janah bangkè ndènè pè mersara-sara mo i padang gurun ènda. Laènken si Kaleb dekket si Josua, sada kalak poda bai ndènè nai simerumur duapuluh tahun mi babo ndorok mbengket mi nagerri sienggo Kuperbagah idi bai ndènè.

³¹Enggo idokken kènè kennah tertaban mo dukak-dukak ndènè. Tapi kalak idi mo naing Kuarak mi nagerri siso kadi kènè i, janah gabè lebbuh kalak idi mo nagerri idi.

³²Tapi ukum kènè matè i gurun pasir ènda mo.

³³Empatpuluh tahun dekkahna kennah mampar-ampar dukak-dukak ndènè i gurun pasir. Kumerna oda setia kènè, gabè ndersa mo iakap dukak-dukak ndènè, soh lebbè matè kalakna siperpodi bai ndènè nai.

³⁴Gongenken ndènè mo kinidersa kumernaken dosa ndènè i empatpuluh tahun dekkahna; sitahun iètong lakon sidari ibas gennep empatpuluh ari sienggo ipakkè kènè lako mengkakapi tanoh idi. Ibettoh kènè mo barang bakunè rasana mula Aku kessa me- ngalo kènè!

³⁵Kusumpahken mo magahken kennah pesautenKu ngo i taba kènè kalak jelma jahat simertaki lako mengalo Aku. Matè i gurun pasir èn mo kènè karina. Aku, JAHOWA ngo, enggo mendokken i.’ ”

³⁶Kalak sienggo ipasulak si Musa lako mengkakap tanoh idi, balik merembah berita siso tuhu tersèngèt nagerri i, janah idi mo memakin kalak Israel ngut-nguten taba JAHOWA. Kumerna i ihukum JAHOWA mo kalak idi gabè matè mo kalak idi kenna sakit.

³⁸Ibas sisipuluh dua kalak perkakap idi nai pellin si Josua dekket si Kaleb nai ngo kessa nggelluh.

³⁹Enggo kessa ipesakat si Musa tennah JAHOWA taba bangsa Israel, merhendem mo bangsa idi janah melui.

⁴⁰Sibarembenkenna njengkas kalohon dèng, merkebbas-kebbas mo kalak i naing menangkeng mi babo ndelleng. Nina kalak idi mo, “Tuhunna ngo enggo merdosa kami. Tapi bagèndari enggo kebbas kami lako laus mi bekkas sinituduhken JAHOWA.”

⁴¹Tapi nina si Musa mo, “Kasa nola bagèndari nggèut kènè menonja perèntah JAHOWA? Oda lot gunana sinibaing ndènè i.

⁴²Ulang kènè laus! Italuken musuh ndènè i ngo kènè kumerna oda idengani JAHOWA kènè.

⁴³Tikan juhap kènè dekket kalak Amalek dekket kalak Kanaan idi, matè mo kènè ipergerahaen idi. Oda uè JAHOWA mendengani kènè kumerna oda kènè nggèut tunduk baNa.”

⁴⁴Tapi tong ngo ijuljulken kalak Israel idi menuju mi babo ndelleng idi, tukasi pè si Musa dekket Pèti Perpadanen i oda mèrèt i perundung-undungen idi nai.

⁴⁵Nai ijuhap kalak Amalek dekket kalak Kanaan simerian i sidi mo kalak Israel janah italuken bak iletlet mo kalak i soh mi Horma.