Read Batak Dairi 4 Musa 16 Bible Online

4 Musa 16 - Batak Dairi bible

4 Musa 16

¹Si Korah anak si Jizhar i horong si Kehat nai, marga Lewi, mengalo taba si Musa. Lot ngo tellu kalak menjungjungsa i marga Ruben nai, imo si Datan dekket si Abiram dukak-dukak si Eliab, dekket si On anak si Pelet, bagi dekket 250 kalak pengulu pungkuh-pungkuhna sinipilih jelma nterrem.

³Rebbakken mo kalak i laus menghadep si Musa dekket si Aron janah mendokken, “Enggo mi, alè Musa! Karina bangsa Israel sienggo ipilih ngo lako milik JAHOWA, janah itengah-tengahta karina ngo JAHOWA. Tapi kasa iètong kono datesen dirimu bai bangsa JAHOWA nai?”

⁴Mendengkohken idi, sujud mo si Musa mi tanoh janah mersodip taba JAHOWA.

⁵Nai nina mo taba si Korah dekket karina simengèkutkensa, “Baremben siceggen ibagahken JAHOWA mo banta barang isè milikNa, janah barang isè sinipejaèna baNa. Kalak sinipilihNa ipaduè ngo mendessingisa.

⁶Baremben ceggen kono dekket simengèkutken ko kennah memuat perdahupaen, domi mo i dekket rara api bak kemènjen, janah embah mi langgaten. Si idah mo i sidi baremben barang isè i tengah-tengahta nai sienggo ipilih JAHOWA. Enggo mo i, alè kalak Lewi.”

⁷

⁸Nai nola dèng ma nina si Musa mo mbang si Korah, “Dengkoh mo, alè kalak Lewi!

⁹Tah mada ngo dok atè ndènè soal kètèk pemilihen Dèbata Israel memilih kènè i tengah-tengah kalak Israel nai asa ndorok kènè menjolmitisa, janah merkebbas i Undung-undungNa, ninganna mengendengken bangsa Israel janah mengkebasi kalak i?

¹⁰Kono, alè Korah dekket karina kalak Lewi enggo terolih sangap sibagidi bai JAHOWA nai janah bagèndari ipaksaken kènè dèng ma asa gabè imam!

¹¹Mula ngut-nguten ngo kono dekket pengèkutmu meradepken si Aron, situhuna enggo mengalo JAHOWA kènè!”

¹²Nai ipasulak si Musa mo lako mengalengi si Datan dekket si Abiram, tapi nina kalak i mo, “Oda uè kami roh.

¹³Oda dèng ngo bias dok atèmu iarak kono kami mbungkas i tanoh Mesir singgabur idi nai lako memunuh kami i gurun pasir èn? Kennah dèng ngo dok atèmu perèntahenmu kami?

¹⁴Situhuna oda ngo mi tanoh nggabur kami iarak ko, barang pè memerrè bainami juma dekket pekken anggur gabè milik pusakka nami! Bagèndari naing iakkal-akkali kono dèng ngo kami. Malot i, oda uè kami roh.”

¹⁵Melaga kalohon mo si Musa janah nina mo mbang JAHOWA, “Ialè JAHOWA, ulang mo jalo pèlèen kalak i. Oda nung rogi kubaing barang isè pè bai kalak idi nai; sada kalodè poda lot nung kubuat bai kalak idi nai.”

¹⁶Nai nina si Musa mo mbang si Korah, “Roh mo ko baremben mi Undung-undung JAHOWA rebbak dekket si 250 kalak pe- ngèkutmu i. Si Aron pè i sidi ma mo. Kennah karina mo kènè mersiembah perdahupaenna. Bakin kènè mo kemènjen mi bagasenna, nai pèlèken kènè mo bai JAHOWA.”

¹⁷

¹⁸Nai karina mo kalak i mersibuat perdahupaenna, i sini mo dekket rara api bak kemènjen, nai mercènderren mo kalaki i pèntu Undung-undung JAHOWA rebbak dekket si Musa bak si Aron.

¹⁹Enggo kessa bagi ipepulung si Korah mo karina bangsa i, janah cènder mo kalak idi pehadep dekket si Musa bak si Aron i pèntu Undung- undung JAHOWA. Sintempu mènter idah kari- nana bangsa i mo cuhaya JAHOWA mercala-cala.

²⁰Nai nina JAHOWA mo taba si Musa dekket si Aron,

²¹“Laus mo kènè i tengah-tengah kalak idi nai; naing Kuripasken mo kalak idi bagèndari.”

²²Tapi sujud mo si Musa dekket si Aron mersembah merkuraja janah mendokken, “Ialè Dèbata, Kono ngo simemerèken kenggeluhen bai karina singgelluh. Mula pellin sada kalak sambing ngo kessa merdosa, punguren ngo Kono taba karina bangsa èn?”

²³Nai idokken JAHOWA mo mbang si Musa,

²⁴“Pasulak mo asa laus karina jelma i Undung-undung si Korah, si Datan dekket si Abiram nai.”

²⁵Nai idahi si Musa rebbak dekket pengulu-pengulu Israel mo bekkas si Datan dekket si Abiram.

²⁶Idokken si Musa mo taba kalak Israel, “Laus mo kènè i Undung-undung kalak jahat ènda nai janah ulang degges kènè barang kadè pè ibas ugasen kalak idi nai. Mula oda iuèi kènè, iripasken mo kènè rasken dekket kalak i kumernaken dosa-dosa kalak i.”

²⁷Nai mènter laus mo kalak Israel i undung-undung si Korah, si Datan dekket si Abiram nai. Tupung ma mo enggo mendarat si Datan dekket si Abiram janah cènder i gennep pèntu undung-undungna, rebbak dekket sinibages bak dukak-dukakna.

²⁸Nai nina si Musa mo, “Merkitè ènda bettohen ndènè mo, enggo ipasulak JAHOWA aku lako memaing karinana ènda janah karinana idi oda ngo hendakku sendiri i.

²⁹Mula ripas kalak idi bagè cara permatè biasa, oda pella lot hukumen barang kadè bai Dèbata nai, imo tandana oda sinipasulak JAHOWA aku.

³⁰Tapi mula ibakin JAHOWA ngo tah kadè siso pennah dèng idengkoh kènè sidekkahna èn, janah mula taka dua tanoh i lako memendut kalak idi rasken bak hartana, gabè gelluh-gelluhen kalak idi mbengket mi dunia kalak si matè, bettohen ndènè mo magahken mengalo JAHOWA ngo kalak idi.”

³¹Kejapkenna i enggo kessa pul si Musa mengerana, mèter mo ngangang janah ntaka mo tanoh siniterruh nènèh kalak i,

³²janah ibendut mo kalak i dekket sisimpangaen kalak i bak karina simengèkutken si Korah, dekket karina harta milik kalak idi.

³³Nai gerupuh mo kalak idi gelluh-geluhen mi bagasen dunia kalak simatè rasken karina harta milik kalak i. Balik mo merdemmu tanoh sintaka i, janah mersep mo kalak idi ibendut tanoh i.

³⁴Karina kalak Israel silot i sidi merlojangen tikanna mendengkoh derru-derru kalak i, “Itakè mperrus! Asa ulang ibendut tanoh i kita!”

³⁵Nai roh mo api ibaing JAHOWA mengelekkup si 250 kalak simemèlèken dahupa idi.

³⁶Nai idokken JAHOWA mo taba si Musa,

³⁷“Pasulak mo si Eleazar dukak Imam Aron lako mengagoi perdahupaen sitading ipas simesseng i nai janah menghamburken cirabunna mi bekkas sidèban, kumerna mbadia ngo perdahupaen idi. Karina ugasen idi imo pèlèen kalak sienggo ihukum matè kumerna dosana. Mbadia ngo karina ugasen idi kumerna enggo ipèlèken i hadeppen JAHOWA, kumerna i kennah idakdak ngo i lako mahan pengelampis langgaten i kan darat. Mahan pernèngèten mo simasa i bai kalak Israel.”

³⁸

³⁹Nai ibuat Imam Eleazar mo perdahupaen idi janah idokken mo kalak lako mendakdak menipis-menipis mahan pengelampis langgaten i kan darat.

⁴⁰Gabè mahan pernèngèten mono idi bai bangsa Israel magahken, laènken pinempar si Aron, sada kalak pè oda ndorok roh mi langgaten lako menutung dahupa bai JAHOWA. Kalak simengelausi hatoren idi kennah iripasken bagè si Korah dekket simengèkutkensa. Karinana idi ibahanken bagè sienggo iperèntahken JAHOWA bai si Eleazar merkitè si Musa.

⁴¹Sibarembenkenna ngalngalen mo karina bangsa Israel taba si Musa dekket si Aron. Nina kalak i mo, “Enggo ibunuh kono bangsa JAHOWA.”

⁴²Sinderrang tumpu i dèng kalak i mengalo si Musa dekket si Aron, tumulih mo kalak i mi Undung-undung JAHOWA, janah idah mo hembun menangkemmi Undung-undung idi, nai taridah mo cuha- ya pekiroh JAHOWA.

⁴³Laus mo si Musa bak si Aron mi lebbè Undung-undung JAHOWA,

⁴⁴nai nina JAHOWA mo taba si Musa,

⁴⁵“Tadingken kènè mo kalak idi. Ai naing Kuripasken ngo kalak idi i bekkas idi ma!” Mersembah merkuraja mo kalak i sidua,

⁴⁶nai nina si Musa mo taba si Aron, “Buat mo perdahupanmu, sini mo dekket rara api i langgaten nai janah bakin kemènjen i babona. Embah mo ndor taba bangsa i janah uluken mo Kerja mengido kesasaen dosa lako bai kalak i. Kettu mo! Enggo punguren JAHOWA janah wabba pè enggo tubenna masa.”

⁴⁷Iulaken si Aron mo kadè sinidokken si Musa. Lojang mo ia mi tengah-tengah bangsa simertumpu i janah enggo tubenna kenna sakit wabba. Nai ibakin si Aron mo kemènjen i babo rara api i, janah iuluken mo ulaen mengido kesasaen dosa bangsa Israel.

⁴⁸Nai mentadi mo wabba i, janah itengah-tengah kalak singgelluhna dèng dekket sienggo matè i ngo si Aron.

⁴⁹Buèna matè tikanna idi lot ngo 14.700 kalak, oda termasuk simatè tikan pengaloen si Korah.

⁵⁰Enggo kessa mentadi wabba i, balik mo si Aron mendahi si Musa i pèntu Undung-undung JAHOWA.