Read Batak Dairi 4 Musa 17 Bible Online

4 Musa 17 - Batak Dairi bible

4 Musa 17

¹Nai nina JAHOWA mo taba si Musa,

²“Dokken mo kalak Israel memerèken bamu sipuluh dua tongket, gennep marga tersada tongket, si kennah berènken gennep pengulu marga.

³Suratken mo gennep gerar pengulu idi ipas tongketna i, janah gerar si Aron ipas tongket marga Lewi. Kennah lot ngo sada tongket i gennep pengulu marga.

⁴Embah mo karina tongket idi mi Undung-undungKu janah gamparken i lebbè Pèti Perpadanen, bekkas kecemmalenKu pejumpa dekket kènè.

⁵Mertunas mo tongket kalak siKupilih. Merkitè dalan bagi mo Aku petadiken ngut-ngut kalak sidak ngut-nguten taba kènè.”

⁶Ibagahken si Musa mo tersèngèt i bai kalak Israel. Nai iberèken pengulu kalak i mo bana sada tongket bai gennep sada pengulu marga. Sipuluh dua ngo karina tongket i, janah dekket ma mo ibagesenna tongket si Aron.

⁷Nai ibakin si Musa mo tongket idi mi bagasen Undung-undung JAHOWA kan lebbè Pèti Perpadanen.

⁸Sibarembenkenna, tikan mbengket si Musa mi bagasen Undung-undung JAHOWA i, iidah mo, ukum tongket si Aron, imo tongket marga Lewi, enggo mertunas. Mercaban ngo tongket i, merbunga, janah merbuahken buah ketapang sienggo ntua!

⁹Ibuat si Musa mo karina tongket i ninganna ipacidah taba kalak Israel. Idah kalak i mo barang kadè enggo masa, nai gennep pengulu, mersibuat tongketna balik.

¹⁰Kessa i nina JAHOWA mo mbang si Musa, “Gamparken mo balik tongket si Aron i i lebbè Pèti Perpadanen i. Kennah ipennep ngo tongket i mahan pernèngèten bai kalak Israel singgati mengalo i magahken, matè ngo kalak i mula oda ipetadi kalak i ngut-nguten.”

¹¹Iulaken si Musa mo bagè siniperèntahken JAHOWA.

¹²Nai nina kalak Israel mo taba si Musa, “Mula bagidi, enggo merjaya kami! Ripas mo kami!

¹³Mula kennah matè ngo kalak simenjolmiti Undung-undung JAHOWA, oda nè ngo keppè lot harapen nami.”