Read Batak Dairi 4 Musa 18 Bible Online

4 Musa 18 - Batak Dairi bible

4 Musa 18

¹Nai nina JAHOWA mo mbang si Aron, “Kennah kono dekket dukak- dukakmu dekket kalak Lewi ngo menggongken kesalahen simasa i Undung-undungKu, tapi pellin kono dekket dukak-dukakmu sambing ngo kessa si kennah menggongken kesalahen ipas ulaen imam-imam.

²Kaka anggimu, marga Lewi, kennah dekket bakinenmu mahan pengurupi ibas mengulaken bahanna dekket bahaen dukak-dukakmu.

³Marga Lewi kennah mengulaken sipatut ulaenken kalak i meradepken kènè janah mengulaken bahaen kalak i i Undung-undungKu, tapi oda ndorok kalak idi menjolmiti langgaten barang pè mendegges ugas-ugasen simbadia i Bilik Simbadia. Mula ilausi kalak i hatoren hatoren i, tah kènè pè barang kalak i kennah matè ngo.

⁴Kennah rebbak mengendengken kalak idi dekket kènè janah mengulaken karina bahaen simerdemmu dekket karina perkebbasen ibas Undung-undungKu, tapi kalak siso iberèken hak, oda ndorok mengendengken rebbak dekket kènè.

⁵Pellin kono, si Aron dekket dukak-dukakmu ngo kessa sikennah mengulaken bahaen i Bilik Simbadia dekket i langgaten, asa ulang nèngè Aku melaga midah bangsa Israel.

⁶Situhuna, enggo Kupilih kaka-anggimu kalak Lewi ibas bangsa Israel nai gabè sibasa-basa bamu. Enggo ngo terkelini kalak i baKu, lako merkebbas i Undung-undungKu.

⁷Tapi pellin kono dekket dukak-dukakmu sambing ngo kessa ndorok mengkebasken ulaen bagè imam, ibas matcam bagè ulaen simerperdemuen mi langgaten dekket barang kadè sambing silot i Bilik Simbadia. Idi mo tanggung jababmu, kumerna enggo Kuberèken bamu ulaen imam. Barang isè siso lot hakna bagidi, ihukum matè ngo mula ijolmiti ugas-ugasen simbadia i.”

⁸Nai nina JAHOWA mo taba si Aron, “Èngèt mo! Karina pèlèen simerkedekoen siniberèken bangKu siso itutung, bamu mo idi. Idi mo jambarmu sienggo itentuken soh mi sidekkah-dekkahna. Idi mo Kuberèken bamu dekket bai pinemparmu.

⁹Ibas pèlèen simbadiana kalohon nai siso itutung i babo langgaten sikugerari èn, gabè bagianmu imo: Pèlèen hantaren, pèlèen kesasaen dosa dekket pèlèen gancih kerogien. Pèlèen simbadia ngo karinana idi gabè mahan jambarmu dekket jambar dukak-dukakmu.

¹⁰Simbadia ngo idi bamu, jadi kennah i bekkas simbadia ma ngo idi ipangan kono. Pellin anak laki ngo kessa ndorok kipangan i.

¹¹Karina pèlèen simerkedekoen sidèbanna i sinipèlèken kalak Israel taba Aku, bamu ngo tong idi. Kuberèken ngo idi bamu bak bai dukak-dukakmu anak laki dekket daberru. Merlakku ngo hatoren idi soh amman sumendah. Ndorok ngo ipangan kènè sisimpangaen siso melamun i.

¹²Kuberèken ngo bamu nasa simerandalna kalohon ibas siniperani perlebbè nai sinipèlèken kalak Israel taba Aku gennep tahun, imo minak zaitun, laè anggur dekket pagè.

¹³Bamu ngo karinana idi. Karina kènè sisimpangaen siso melamun ndorok ngo kipangan idi.

¹⁴Karina silot i tanoh Israel sienggo ikelini lako baKu, bamu mono idi.

¹⁵Karina jelma siperlebbè tubuh bagi ma bang pè pinakan sinipèlèken kalak Israel baKu, jambarmu ngo i. Tapi kennah ngo tebbusen ndènè dukak-dukak ndènè situaen, bagi ma anak pinakan siso ndorok panganen siperlebbè tubuh.

¹⁶Kennah itebbus ngo anak-anak sinderrang merumur sabulan dèng. Harga sienggo itetapken mi sidi imo lima riar pirak, mengèkutken arga simerlaku i Undung-undungKu.

¹⁷Tapi ukum lembu, biri-biri dekket kambing siperlebbè tubuh oda ndorok itebbus. Pinakan idi kennah bangKu ngo i, janah kennah ipèlèken. Pispisken mo darohna mi langgaten janah tutung mo pessohna mahan pèlèen. Bauna i mo pesennangken atèngKu.

¹⁸Ukum jukutna bamu mo i, dos bagè dada dekket kaè kamuhun ibas pèlèen sinihujuken taba Aku.

¹⁹Soh mi sidekkah-dekkahna ngo, karina pèlèen simerkedekoen siniembah kalak Israel baKu, Kuberèken bamu dekket bai pinemparmu daholi bak daberru. Merdalan ngo hatoren i soh sidekkah-dekkahna janah gabè perpadanen ntegguh siso ndorok mosar meradepken Aku dekket kono dekket pinemparmu.”

²⁰Nina JAHOWA dèng ma taba si Aron, “Oda lot kennaen harta tading-tadingen barang kadè ukum kènè. I nagerri siKuperbagah idi oda lot tanoh sinteppap gabè milikmu. Aku, JAHOWA, ngo sulangmu.”

²¹Nina JAHOWA mo mbang si Aron, “Karinana pèlèen nipersipuluh kalak Israel Kuberèken bai kalak Lewi. Idi mo jambar perbagianen kalak i kumerna mengendengken i Undung-undungKu.

²²Kalak Israel sidèbanna i oda ndorok nèngè menjolmiti Undung-undung i asa ulang perohken dosa dekket hukumen matè mi diri kalak i sendiri.

²³Mulai bagèndari nai pellin kalak Lewi ngo kessa ndorok menjamotken Undung-undungKu dekket memersan nasa tanggung jabab ibas ulaen idi. Merdalan ngo hatoren idi bai pinemparmu soh sidekkah-dekkahna. Kalak Lewi oda lot harta warisenna i Israel,

²⁴kumerna jambar perbagianen kalak i enggo Kuberèken karina pèlèen nipersipuluh sinipèlèken kalak Israel baKu kira pemerèken merkedekoen. Kumernana i mo asa Kudokken tersèngèt kalak Lewi oda terolih jambar warisen i Israel.”

²⁵Idokken JAHOWA mo si Musa pesakatken perèntah èn bai kalak Lewi: Mula ijalo kènè kessa bai kalak Israel nai pèlèen persipuluhen sinisohken JAHOWA bai ndènè mahan jambar ndènè, kennah berènken ndènè ngo sipersipuluh i sidi nai bai JAHOWA mahan pèlèen simerkedekoen.

²⁷Pèlèen simerkedekoen idi dos ngo i ètongen dekket pèlèen pagè rembaru dekket laè anggur rimbaru.

²⁸Merkitè bagidi kènè pè kennah ngo memèlèken pèlèen simerkedekoen bai JAHOWA, imo dèba ibas pèlèen persipuluhen kalak Israel nai. Kennah sohken kènè pèlèen simerkedekoen idi taba Imam Aron.

²⁹Berèken mo jambar simendèna kalohon ibas barang kadè sinijalo ndènè nai.

³⁰Enggo kessa iberèken kènè jambar idi, ndorok mo buaten ndènè silebbihna i, bagè sada kalak peruma-uma simemuat barang kadè sitadingna dèng enggo kessa iembah pèlèenna.

³¹Silebbihna idi ndorok mo ipangan kènè sisimpangaen barang i dikè sambing, sikira upah pengulaenken ndènè i Undung-undung JAHOWA.

³²Oda pella mersalah kènè mula ipangan kènè i, asal mo jambar simerandalna kalohon enggo ipèlèken kènè bai JAHOWA. Ulang lamuni kènè pèlèen simbadia kalak Israel merkitè kipangan barang kadè ibas pèlèen i nai sinderrang mak dèng jambarna simerandalna kalohon ikelini bai JAHOWA. Mula ilausi kènè perèntah idi, matè mo kènè.